Berrocal

De Biquipedia
Ir a la navegación Ir a la búsqueda
A la ezquierda se vei un berrocal producto de la meteorización fisica d'unas quarcitas y que ha dau nombre a la localidat de Berrueco en lo Xiloca.

Un berrocal u borrocal ye una forma de lo terreno con piedras grans u un paisache a on abundan u destacan unas piedras grans. En Castiella se refieren a sobén a caos graniticos que s'han formau por meteorización esferoidal, en lo Sistema Iberico terolano se refieren a tarteras, pedrizas y ríos de piedras d'atras litolochías.

Etimolochía[editar | editar código]

Las parolas berrocal y berrueco se consideran d'orichen celta, con presencia d'un sufixo -ueco < -ŎCCU, que acompanya a vegadas a parolas d'orichen prerromán. En lo "Diccionario d'Andolz documentan la parola borruco d'uso actual en aragonés ribagorzán, podendo-se interpretar u cambio de sufixo por lo sufixo -uco < -UCCU. Manimenos tamién existe la posibilidat d'haber-se produeito lo fenomen de metafonía antiga que afecta a parolas como pozo-puzo, tormo-turmo, fondo-fundo y atras. En la microtoponimia de Nuez d'Ebro trobamos Barruecos y Val de Barrueco; tamién bi ha un Barruecos en lo termin municipal de Zaragoza.[1]

En la Sierra d'Albarrazín bell autor documentan l'uso de la parola berrocal y la suya variant borrocal con lo significato aproximau de "tartera" u "costera de mont cubierta por grans bloques de piedra", y en concreto l'ALEANR rechistra este uso en Noguera y en lo norte de la Sierra d'Albarrazín, a on abundan estas formacions.[2]. Seguntes atras fuents l'uso de la parola berrocal y la variant borrocal en la Sierra d'Albarrazín s'aplica a los ríos de piedras (herencio de condicions periglacials quan la zaguera glaciación). Los ríos de piedras son bien representaus en la Sierra d'el Tremedal: Bronchales, Oriuela, en las costeras de Caimodorro, y en Orea (Guadalachara). Como los ríos de piedras se forman por confluencia de tarteras en un fondón ye posible que a parola berrocal s'aplique a los dos conceptos cheomorfolochicos. En Bronchales trobamos lo microtoponimo El Berrocal y/u El Borrocal en lo cabo sureste.

Referencias[editar | editar código]

  1. (es) Juan Antonio Frago Gracia: Toponimia navarroaragonesa del Ebro (IV): Orónimos ISSN 0210-5624, Vol. 30-31, 1982 , pachinas. 23-62 [1]
  2. (es) José Manuel Vilar Pacheco: Lexico y cultura popular de la Sierra de Albarracín. Centro de estudios de la Comunidad de Albarracín, 2008

Veyer tamién[editar | editar código]