Sistema morfoclimatico periglacial

De Biquipedia
Ir ta: navego, busca
"Río de rocas" en Hawk Mountain (Pensilvania); una forma de lo terreno a la qual, en la Sierra d'Albarrazín, se le diz berrocal u borrocal.

Lo Sistema morfoclimatico periglacial ye un conchunto d'achents y procesos cheolochicos externos que actuan en arias circunpolars y en l'alta montanya de latitutz baixas y meyas. L'achent cheolochico dominant de lo sistema morfoclimatico periglacial ye l'augua de deschelo,[1], y la temperatura meya anyal ha d'oscilar arredol de los 0º C,[2] lo que permite la existencia de ciclos de chelo-deschelo.

Encara que la parola "periglacial" etimolochicament signifique estar amán de las cheleras, lo periglacialismo no siempre se desvién amán de las cheleras, puet dar-se en zonas montanyosas con prou altaria pa que i faiga frido y se i produgan ciclos de chelo-deschelo pero no pa que se i desemboliquen cheleras.[3] Un clima muito frido pero seco y con pocas nevadas tamién puet fer que bi haiga cheleras y bi haiga periglacialismo.

Periglacialismo en la Peninsula Iberica[editar | editar código]

Lo periglacialismo ye encara important en lo cabalto de la Cordelera Cantabrica, de los Pireneus y de Sierra Nevada, estando menos important en lo Sistema Iberico.

Mientres las glaciacions quaternarias los procesos periglacials estioron importants en lo Sistema Iberico, Monts de Toledo[2] y Sistema Central.

Periglacialismo en los Pireneus[editar | editar código]

En l'actualidat lo cabalto de los Pireneus ye un puesto a on se producen procesos periglacials y se considera que l'ambient periglacial encomienza en los 2.300-2.400 m.[4] Manimenos puet haber-ie procesos periglacials més abaixo.

Bi ha procesos periglacials como la crioturbación y la chelifracción y diferents formas de terreno d'orichen periglacials activas como cheleras rocosas.

Periglacialismo en lo Sistema Iberico[editar | editar código]

Encara bi ha procesos periglacials de poca importancia en altarias por dencima de los 1000 m en los Puertos de Bezeit, Sierra Carrascosa, Sierra de Sant Chust, Sierra de Cucalón, Sierra de Chabalambre, Monts Universals y atras zonas de la compleganza de lo río Guadalaviar. Lo clima se fa mes propicio pa los procesos periglacials dende los 1.400 m en la Sierra de Castelfrío y en la Sierra de Gúdar. Manimenos, la escaseza de precipitacions fan que lo periglacialismo siga menos important que lo que podríanos pensar.[5]

Lo periglacialismo ye eficaz a altarias por dencima de los 1.800 m, pero se reduce a la chelifracción y lo pikrake tipicos de los pacos de la Sierra d'Albarrazín y la Sierra de Chabalambre.[5]

Gran part de las formas periglacials d'acumulación que bi ha en la Sierra d'Albarrazín y la Sierra de Castelfrío se formoron en la zaguera glaciación u Würm.[5]

Referencias[editar | editar código]

  1. (es) Francisco Anguita Virella, Fernando Moreno Serrano: Procesos geológicos externos y geología ambiental. Editorial Rueda, 1993. pp46
  2. 2,0 2,1 (es) Francisco Anguita Virella, Fernando Moreno Serrano: Procesos geológicos externos y geología ambiental. Editorial Rueda, 1993. pp79
  3. (es) Eumenio Ancochea Soto, Francisco Anguita Virella, Fernando Moreno Serrano: Geología Procesos Externos. Editorial Edelvives, 1990.
  4. (es) Fernando Biarge, José María García Ruiz, Ana Biarge: Roca viva. El modelado del paisaje pirenaico. Diputación de Huesca, 2001. pp190-193
  5. 5,0 5,1 5,2 (es) Jose Luís Peña Monne et al.: Geomorfología de la Provincia de Teruel. Instituto de estudios turolenses, 1984. pp117-120

Bibliografía[editar | editar código]