Calsinera
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
La calsinera[1][2] ye una roca sedimentaria definida por la presencia mayoritaria de lo mineral calcita. Bi ha calsineras orichinadas por la precipitación quimica y calsinas biochenicas.
Petrochenesi
La mayor part de las piedras calsineras s'han orichinau en plataformas continentals en relación a l'actividat de sers vivos, ye lo caso de las que bi ha en lo Sistema Iberico (antiga plataforma continental de lo Mar de Tethys), y de lo Prepireneu). Bi ha unas calsineras d'orichen continental que s'han puesto formar en lagos (como las calsineras lacustres de la depresión d'Ebro), en ambients karsticos (travertins, tovas travertinicas, espeleotemas), y en suelos (mallacans).
Bi ha puestos en las plataformas continentals a on la sedimentación ye cuasi de tot carbonatada y por ixo se dicen plataformas carbonatadas. Pa que la sedimentación siga carbonatada de tot se precisa una temperatura alta que afavorixca l'actividat de los sers vivos y que no bi haiga ríos importants que se recullan en la redolada[3] aportando sedimentos terrichens.
La formación de calsineras no se puet producir en auguas muito profundas porque la concentración de lo bicarbonato calcico depende estreitament de la temperatura d'una traza que las auguas marinas calidas son saturadas y las mars fredas son subsaturadas n'esta sal.[4] La linia que desparte las zonas de saturación y subsaturación ye la lisoclina. Dencima de la lisoclina lo carbonato calcico puet precipitar pero dichós la lisoclina se tiende a disolver.
Cheomorfolochía
En Aragón, forman lo principal de lo paisache en la mayor part de lo Sistema Iberico oriental, (en as provincias de Valencia, Castellón, Cuenca, Teruel) de las sierras prepirenencas y de las muelas de la depresión d'Ebro.
Lo paisache con calsineras puet estar un paisache karstico si predominan los fenomenos karsticos, u puet estar un paisache estructural si mos trobamos a las calsineras como nivels resistents con cinglos chunto con atros materials creyando muelas si son d'alto u baixo horizontals u cuestas si bi ha una inclinación menor de 45º.
Utilidaz
Las piedras calsineras tienen muitos emplegos, y lo mes tradicional ye sacar calsina calentando-la en fornos ditos calsinars.
Denominacions tradicionals
En aragonés medieval esta roca se deciba calcina, como actualment encara li se diz a la mezcla de calso y arena, y de la mesma traza que en muitas luengas no bi ha palabras pa diferenciar lo cheso cheolochico (un mineral u una roca no formada que por ixe mineral) de lo cheso como material de construcción. Un curioso eixemplo de la parola calçina lo veyemos en lo "Libro de Marco Polo" pa referir-se a las calsineras de los paisaches karsticos de China:
Probablement la palabra calsina haiga perdiu en aragonés actual lo significau petrografico, y s'ha documentau la palabra calsinera en aragonés chistabín y en benasqués pa dicir la roca (piedra calsinera, pedra calsinera[2]). Tamién existe l'adchectivo calsinoso[2] pa referir-se a tot lo que contienga calso y que ye aplicable a piedras (hi hei moltes pedres que son calsinoses[2]).
La perda de lo significau petrografico de la palabra calcina ha feito que en aragonés bi haiga un amplo ventallo de denominacions tradicionals que fan referencia a aspectos parcials que no son constants en la roca, como la color, y no tienen valura petrografica, como por eixemplo:
- Piedra de ruello (ansotano).
- Piedra (de) ferranca (semontanés oriental).
- Clarisca.
En los Monegros, las calsineras abundan en lo cabalto de la sierra d'Alcubierre y tienen un orichen lacustre. Los monegrins en dicen piedra de campanil por estar duras y producir un soniu caracteristico con lo martiello y piedra de clarezca por estar blancas.
Referencias
- ↑ (es) BLAS GABARDA, Fernando y ROMANOS HERNANDO, Fernando, Diccionario Aragonés: Chistabín-Castellano; Gara d'Edizions. Zaragoza, 2008. p 140ISBN 978-84-8094-061-0
- ↑ 2,0 2,1 2,2 2,3 (es) Ángel Ballarín Cornel: Diccionario del Benasqués. Institución Fernando el Católico, Zaragoza, segunda edición 1978. p 240
- ↑ (es) Eumenio Ancochea Soto, Francisco Anguita Virella, Fernando Moreno Serrano: Geología Procesos Externos. Editorial Edelvives, 1990, pp 181-182
- ↑ (es) Francisco Anguita Virella: Origen e historia de la Tierra. Editorial Rueda, 1988, pp 18-19
Bibliografía
- (es) Francisco Anguita Virella: Origen e historia de la Tierra. Editorial Rueda, 1988.