Roca sedimentaria
|
Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla. |
As rocas sedimentarias son rocas que se forman por l'acumulación de sedimentos que, sozmesos a procesos fisicos y químicos (diachenesi), esdevienen materials de consistencia més dura.
Se forman en cuencas sedimentarias, que pueden estar continentals u marinas. Tienen una disposición en capas u estratos, que en luengache popular lis dicen faixas porque vistas en una lenera pareixen faixas paralelas de materials rocosos.
Cubren més d'o 75 % d'a superficie terrestre, formando una cobertura sedimentaria sobre una base formata por rocas margaticas y, en menor mida, metamorficas. Manimenos, lo suyo volumen total ye chicot quan se comparan sobretot con as rocas magmaticas.
As rocas sedimentarias se caracterizan por dos rasgos esencials:
- Presentan una estructura estratificata, con capas produeitas por lo caracter progresivo pero tamién discontinuo d'o proceso de sedimentación. Ixas capas se dicen estratos.
- Contienen a sobén fósils, y a vegatas son formatas por acumulación de fosils.
A més as rocas sedimentarias gosan estar més permiables, sobretot as detriticas, lo que favoreixe a circulación y acumulación d'augua sotorrana y atros fluidos como os hidrocarburos.
Pueden clasificar-sen por lur chenesi en:
- Rocas detriticas, formatas por acumulación de trozos d'atras rocas que s'han erosionato y han depositato por gravedat. As rocas detriticas se clasifican por la mida d'os trozos de roca, y de mayor a menor son almendrons, piedras d'arena, siltitas y archilitas.
- Rocas organochenas, formatas con restos de sers vivos. As més abundants s'han formato a partir de partz duras mineralizatas, manimenos belatras s'han formato a partir de partes organicas y son las rocas organicas como o carbón u o petrolio.
- Rocas quimicas u rocas de precipitación quimica, formatas por deposito de sustancias que enantes yeran disueltas. Un eixemplo en son as evaporitas u rocas formatas por sals acumulatas por sobresaturación de l'augua d'a mar.