Hirundinidae

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Hirundinidae
Volandrina golroya (Hirundo rustica).
Clasificación scientifica
Dominio: Eukaryota Reino: Animalia Filo: Chordata Clase: Aves Orden: Passeriformes Familia: Hirundinidae Vigors, 1825
Cheneros
Atticora Cheramoeca Delichon Haplochelidon Hirundo Neochelidon Notiochelidon Petrochelidon Phedina Progne Psalidoprocne Pseudochelidon Ptyonoprogne Riparia Stelgidopteryx Tachycineta

Os hirundinidos (cientificament, en latín, Hirundinidae) son una familia de paixaros de chicota mida, d'entre 11 y 22 cm de lonchitut corporal, con alas largas con os extremos en punta, muit capables ta o volido y con gran capacidat maniobradera. Lo cuerpo el tienen fusiforme y a sobén as plumas d'a coda las i tienen bifurcadas. O pizco el i tienen curto, poco protuberant en respecto a la cara, pero como tienen mandibulas amplas el pueden obrir con un anglo important cuan cazan. Totas as especies concabidas en a familia son insectivoras, depredaderas d'invertebraus que pueden cazar cuan vuelan.

Son animals cosmopolitas, con distribución cuasi global, anque muitas especies son migraderas en latituz temperadas y subtropicals. Per a suya buena traza ta o volido, pueden viachar milenta kilometros en as suyas migracions. Bellas especies fan, anyalment, migracions intercontinentals entre Europa y Africa, Asia y Oceanía u Nordamerica y Sudamerica. Una altra caracteristica de bels hirundinidos ye la construcción d'os suyos niedos, que cualques especies penchan d'os rafes de lenatos y tellaus. Belaltras, manimenos, es fan soterranios, excardando galerías en tierra en os terreros y marguins sedimentarias.

Nombre

En aragonés, como tamién pasa con belaltras luengas romanicas, os hirundinidos reciben bels nombres que les son chenericos, y con frecuencia no designan garra especie concreta sino que s'emplegan ta nombrar o tipo morfolochico cheneral que totas ellas presentan, fendo que pueda asumir-se como denominación millor significadera ta tota la familia que no ta destinguir garra especie. En iste sentido, os nombres que se gosa sentir incluyen formas como volandrina (encara en uso en muitos nuclios de Ribagorza y Sobrarbe) y bels derivaus («gulundrina» en Rodellar (Semontano de Balbastro), «vulundrina» en Luesia (Cinco Villas) y Pandicosa (Alto Galligo)) y golondrina/golandrina, muit chenerals en Aragón. Totas ixas formas dimanan d'o nombre latín ta istes animals, <HIRUNDO, a traviés de formas deminutivas d'o tipo <*HIRUNDINA, que posteriorment en a evolución fonetica habrían adquiesto una consonant velar inicial ta refirmar a suya pronunciación, como ye normal en aragonés: «gurundina» ye una forma arcaica hipotetica que gosa plasmar ixe fenomeno. D'alcuerdo con isto, as formas «gulundrina» y relativas serían as orichinals en aragonés, y as formas que han substituyiu ixa consonant con una /b/ (v) l'habrían feito per connexión con o verbo «volar».

Nombres con aspecto de catalanismo lexico (como «aurineta» u «engrineta», en catalán estándard «oreneta») s'han puesto documentar en municipios de parlar catalán, en a Francha de Levant, como Zaidín y Ontinyena, y anque suelgan apareixer en os lexicos aragoneses no s'han de considerar pas como parolas patrimonials d'a luenga aragonesa, sí que d'a catalana en Aragón.

Imáchens

• 
  Delichon urbica
• 
  Hirundo rustica
• 
  Riparia riparia con os niedos en forma de galería
• 
  Delichon urbica recullendo archila ta fer-se niedo
• 
  H. rustica volando
• 
  Niedo de D. urbica
• 
  H. rustica
• 
  Petrochelidon pyrrhonota

Vinclos externos

• Wikispecies tiene un articlo sobre Hirundinidae.
• Se veigan as imáchens de Commons sobre os hirundinidos.

• Datos: Q39861
• Multimedia: Hirundinidae / Q39861
• Especies: Hirundinidae