Terrero (cheomorfolochía)
Terrero ye como se diz en parte de l'Alto Aragón a un modelato cheolochico que se desembolica en as archilas quan no bi ha prou vechetación pa aturar a fuerza d'as auguas que circulan por a ladera quan pleve.
Os terrers se pueden formar en zonas semiaridas con poca vechetación u en zonas con clima humido quan s'ha perdito a vechetación por causas tanto naturals como humanas. Quan l'augua de plevia caye con fuerza (feito normal en zonas semiaridas) l'augua esgarrapa con facilidat as archilas, que no gosan estar cementatas, y creya un denso rete de chicotz galachos que se fan més grans ladera enta baixo y acaban tenendo conexión con barrancos u torrents.
En a Depresión de l'Ebro son muito comuns, por l'abundancia de terrenos archilosos desforestatos. Tamién son comuns en as cuencas marguinals d'o Sistema Iberico como por eixemplo arredol de Teruel. En l'Alto Aragón se desembolican a sobén en os Salagons d'Arguis quan desaparixe a vechetación, porque os salagons tienen una fracción archilosa que queda sola quan se disuelve a fracción calsinosa.
