O Elsón

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Iste articlo tracta sobre o lugar d'o Elsón. Ta atros articlos que contienen «o Elsón» en ista Biquipedia, se veiga O Elsón (desambigación).
O Elsón
Lugar d'Aragón

As casas d'o Elsón, en a boira.
Entidat
 • País
 • Provincia
 • Comarca
 • Municipio
Lugar
 Aragón
 Uesca
Sobrarbe
l'Aínsa-Sobrarbe
Partiu chudicial Boltanya
Población
 • Total

18 hab. (2018)
Altaria
 • Meyana

686 m.
Distancia
 • 95 km
 • 27,7 km

enta Uesca
enta l'Aínsa
Codigo postal 22394
Chentilicio elsonés/-sa
Fiestas 10 d'aviento
Patrons Santa Olaria de Mérida
Parroquial
 • Diocesi
 • Arcipestrau

Uesca
Semontano-Sobrarbe
Ríos Susía
Coordenadas
O Elsón ubicada en Aragón
O Elsón
O Elsón
O Elsón en Aragón

O Elsón (prenunciau /ol'son/, anque tamién ye frecuent sentir o nombre sin l'articlo, y alavez o prenuncian /el'son/;[1] oficialment, en castellano, «Olsón»[2]) ye un lugar aragonés d'o municipio de l'Aínsa-Sobrarbe, en a comarca de Sobrarbe y a provincia de Uesca.[3] A suya población ye de 18 habitants (2018[2]).

O Elsón fue capital d'un municipio que tamién se deciba o Elsón, present en os censos dende a constitución d'os achuntamientos modernos en 1834 dica la suya absorción en o municipio d'Alto Sobrarbe en a decada de 1960.[4] O municipio se formaba con as localidaz d'o Elsón y dos aldeyas: Mondot y Chabierre d'o Elsón.

Cheografía[editar | modificar o codigo]

O Elsón ye a 686 metros d'altaria sobre o nivel d'a mar, en as estribacions de a sierra de Sant Benedet por a man de a valle d'o río Susía. Fa parte, en chunto con as suyas aldeyas Mondot y Chabierre y con a resta de nuclios d'a valle (Castillón, Lamata, etc.) de a subcomarca que se'n diz o Viello Sobrarbe, que s'extiende d'entre o centro-sud y o sud-sudueste de a comarca de Sobrarbe.

A mayoría de casas d'o Elsón se troban en alto, por a baixant sud-sudueste d'un tozal que sinyorea la ilesia de Santa Olaria, que ye a zaguer altura de o sarrato que en dicen d'o Elsón, que desepara por una man a valleta d'o barranco de Sant Chils, y por l'atra o barranco Solano.

O nuclio d'o Elsón no tiene una estructura urbana compacta. Forman a población dos barrios prencipals. La uno, dito barrio d'Abaixo, se troba debaixo de o tozal a on s'envista en l'altura a ilesia, arredol d'una fuent natural que dimana de a penya. L'atro, o barrio d'Alto u barrio d'a Ilesia, o forman as casas deseparadas arredol de dos carreras que divierchen en formando una Y dende una placeta, que en dicen a Plaza d'Abaixo u Plaza Baixa, que ye a on remata la pista d'acceso a lugar, y se i puede puyar chusto por a man cuentra de o tozal de por a on que s'accede a lo barrio d'Abaixo.

As dos carreras se deseparan tot enfilando-se, cadaguna, en dirección a os dos cerrez que dominan a población, pus ista se troba en o grau d'entre os dos. As casas d'o barrio d'Alto se consideran dos barrios diferents (tres si se considera o barrio d'a Fuent, que son cualques casas deseparadas a on remata la carrera d'o sudeste), y cadaguna tiene a suya propia plaza, anque si se conta con a distancia y diferenciación que tiene o dito barrio d'Abaixo millor valdría parlar de dos subbarrios que de barrios diferents.

A ilesia d'o Elsón se puede veyer dende buena cosa d'a comarca, como en ista imáchen feita en Mondot.

En a carrera que marcha camín ta'l sudeste, o barrio d'a Plaza d'Abaixo, se troba l'edificio que fizo de casa d'a Villa cuan o Elsón teneba achuntamiento. Existen casas nobles en os tres subbarrios de o barrio d'Alto.

Historia[editar | modificar o codigo]

Como en muitas poblacions pasa, se tiene as primeras noticias d'existencia d'o Elsón relacionadas con o suyo castiello. Se troba documentau en o sieglo XI baixo reinau de Remiro I[5] con os nombres de «lo Elson» y «Eleson» y se'n tiene conoixencia d'os tinents que tuvo dica las zaguerías d'o sieglo XII (en 1182 muere o suyo tinent Pero de Sant Vicente[5]).

En o sieglo XVI o Elsón yera un lugar con numerosos infanzons, y d'alcuerdo con os testimonios arquitectonicos que mos n'ha quedau, como a suya portentosa ilesia, teneba prou riqueza.[6] En 1626 acuden ta Balbastro tres infanzons de a localidat, Sinyó Miguel Blanc,[7] Sr. Cosme de Mata[7] y Sr. Chuan Miguel,[7] que arriban a las Corz convocadas en un grupo que vienen toz de Sobrarbe.

Demografía[editar | modificar o codigo]

Evolución demografica
1992 1994 1996 1997 1998 1999 2000 2001 2002
- - - - - - 24 29 28

2003 2004 2005 2006 2007 2008 2009 2010 2011
28 25 26 26 25 24 24 23 -

2012 2013 2014 2015 2016 2017 2018 2019 2020
- - - - - - - - -

2021 2022 2023 2024 2025 2026 2027 2028 -
- - - - - - - - -

1990- : población de dreito.
Fuent: Intercensal en l'INE, Series de población en l'INE y Relación d'unidatz poblacionals en l'INE.

Monimentos[editar | modificar o codigo]

A ilesia de Santa Olaira (s. XVI), conoixida popularment como a «Catedral de Sobrarbe».[8][9]

O monimento prencipal en o Elsón ye a suya ilesia. A ilesia de Santa Olaria, que en buena cosa de Sobrarbe se conoix como a «Catedral de Sobrarbe»[8][9] por a suya monumentalidat, ye un templo de grans dimensions devantau en estilo barroco[9] en o sieglo XVI y firmau por Chuan Tellet en 1546,[9] mayestro d'obras tamién en a ilesia de l'Asumpción de Castillón de Sobrarbe.

A ilesia, que ye declarada Bien d'Intrés Cultural (codigo SIPCA 7-INM-HUE-003-907-002) como enantes en fue de Monumento Nacional espanyol, tiene una portalada renaixentista completament atipica en a montanya altoaragonesa, y pinturas a'l fresco y un retablo de piedra de os sieglos XVI y XVII.

Dezaga de a ilesia, y tamién en l'altura d'o tozal, i ha las restas d'o castiello d'o Elsón (SIPCA 1-INM-HUE-003-907-012), d'o sieglo XI[5] y d'o cual no en queda de piet sique dos trocez de lienzo y as rastras de piedras por tierra en o que podeba haber estau o perimetro fortificau.

Amás, en os arredols d'o Elsón i ha cuatro cruces de sól que tamién son consideradas Biens d'Intrés Cultural, o que fa que o Elsón sia un d'os lugars de Sobrarbe con mas cantidat de construccions declaradas Bien d'Intrés Cultural.

Imáchens[editar | modificar o codigo]

Toponimia[editar | modificar o codigo]

D'alcuerdo con o investigador Manuel Benito Moliner, o toponimo «o Elsón» tien orichens antroponimicas en latín en o nombre de bel propietario: *ELISEUS > Elsón,[10] pero tamién podría venir de a forma diminutiva *ELISEO(NE) > Elsón.

O nombre de lugar tendría as suyas oríchens en a epoca tardo-romana u visigotica.

Fiestas[editar | modificar o codigo]

Referencias[editar | modificar o codigo]

  1. (es) TOMÁS ARIAS, Chabier. El aragonés del Biello Sobrarbe. Instituto de Estudios Altoaragoneses. Uesca, 1999. ISBN 84-8127-095-4
  2. 2,0 2,1 (es) «Olsón» en a subpachina «Relación de unidades poblacionales» d'o Insituto Nacional de Estadística; consultada o 5 de septiembre de 2011.
  3. (es) Catálogo de pueblos y municipios de Aragón. Estadística de población y nomenclaturas toponímicas entre 1900 y 2004 (PDF), Gubierno d'Aragón, 2005, ISBN 84-7753-366-0, p.356
  4. (es) «Olsón» en a subpachina «Alteraciones de los municipios en los Censos de Población desde 1842» d'o Instituto Nacional de Estadística, consultada o 5 de septiembre de 2011
  5. 5,0 5,1 5,2 (es) Voz «Castillo de Olsón» en a Gran Enciclopedia Aragonesa online; consultada o 5 de septiembre de 2011.
  6. (es) SOLSONA, Fernando (coord.). ("Asociación Río Susía"). Descubriendo el valle del río Susía. Ed. PRAMES; Zaragoza, 2008. ISBN 978-84-8321-972-0
  7. 7,0 7,1 7,2 (es) «Casas e infanzones de Sobrarbe»; consultada o 5 de septiembre de 2011.
  8. 8,0 8,1 (es) «Aínsa-Sobrarbe» en «Municipios», en o portal oficial de a Comarca de Sobrarbe; consultau o 5 de septiembre de 2011.
  9. 9,0 9,1 9,2 9,3 (es) «Arte del Renacimiento y barroco» en o portal TurismoSobrarbe.com; consultau o 5 de septiembre de 2011.
  10. (es) Índice de pueblos del Alto Aragón, el orígen de sus nombres. Por Manuel Benito Moliner. Consultau o 12 de chulio de 2012.
  11. 11,0 11,1 11,2 (es) «Calendario festivo» en a pachina oficial d'a Comarca de Sobrarbe; consultada o 5 de septiembre de 2011.
  12. (es) Pachina sobre «Olsón», aparentment escrita por un natural de a localidat; consultada o 5 de septiembre de 2011.

Se veiga tamién[editar | modificar o codigo]

Vinclos externos[editar | modificar o codigo]