Cruz de suelo
.JPG)
Una cruz de suelo u, localment, cruz de «sól»,[1] ye un monumento d'indicación territorial que s'emplegaba tradicionalment ta sinyalar bell punto d'interés, en o costau d'un camino en l'acceso á bell lugar u villa u mesmo á bella partida de mont que perteneixese á o lugar u villa, y que indicaba la pertenencia d'ixe puesto (ixe «suelo») á lo termín d'os vecinos que el feban devantar. Se soleban fer como obra a vecinal, pus nunca u quasi nunca indicaban una propiedat privada sino comunal d'os vecinos d'o lugar u d'a villa.
Por o motivo d'a suya construcción, se puede considerar formas redueitas d'os peirons tan freqüents en toda a cheografía aragonesa, anque fendo diferencia con istes, as cruces de suelo se construiban con materials locals y sin guaire ostentacions, estando que ye raro que se i haigan incorporaus garra obchectos relichiosos mas que no bella cruz que mesmo gosa estar de piedra picada u fierro colau en o país, sin ni virchens ni cristos ni garra altras figuras como se'n gosa poder trobar en bells peirons. Como peirons, consisten d'una pedana de piedra en a que se i ha gosau alzar un pilón picau que en conchunto no pasan t'alto d'os 3 u 3,5 metros d'altaria, y que incorpora (d'isto ye d'á on les viene o nombre) una cruz en pirol en l'altura.
Imáchens[editar | modificar o codigo]
Referencias[editar | modificar o codigo]
- ↑ En bell nuclio de Sobrarbe se conoix con iste nombre que incluye a parola «sól», que podría tractar-se d'una variant arcaica no diptongadera d'a parola patrimonial «suel» (que dimana d'o latín «solum»), parola que encara se siente en uso en a comarca (Blas & Romanos; Diccionario Chistabín; 2008) u bien d'un catalanismo lexico introdueito en epoca desconoixida («sól» ye a parola catalana ta decir «suelo»). Se puede trobar personas que den referencia d'ista forma en Puyarruego (en dó existe un puesto en a ribera d'a Yesa que encara fa lucir o toponimo «cruz de sól»), en Puértolas y en Arro.