Cerro

De Biquipedia
Ir ta: navego, busca
Un cerro, prolargau en a sierra d'o Midi de Siguers (Arièja, Pireneu francés).

En aragonés, un cerro u cierro[1] ye una punta inferior a dintro d'una sierra u sarrato en a que i existe belaltras alturas más envistables, de dimensions u caracteristicas muit diferenciadas en respective a ell. S'emplega o termín «cerro» p. ex. ta nombrar puntas de menor altura que fan parte de sierras en as que i existe alturas con a punta de penya viva u despullada, emplegando-se ta nombrar aquellas que en estando más baixetas u menos abruptas, conservan o vechetación dica la punta.[2] Asobén, s'emplega iste termín tamién ta nombrar garrotz prenunciaus en a baixant d'o sarrato, laterals u marguinals y no propiament sobre a lumera.

Una documentación antiga d'ista parola en aragonés medieval provién de La Zaida, ye de 1285 y pertanye a los textos d'o monesterio de Rueda y, como en muitos textos a on sale a parola cerro, i trobamos a ideya de diferents puntas prolongatas en o terreno:

[...] de mullon en mullon va y traviesa la val de cavalgadores dreyto a la sabina que está del otra part, et de la sabina puya cerro a cerro al otro pino esmoxado.

Etimolochía[editar | editar código]

«Cerro» ye una parola d'etimolochía desconoixida (Juan Antonio Frago Gracia la fa remontar a lo latín <CIRRUS*). Ye parola común en as luengas romances d'a peninsula Iberica, anque con significaus que gosan variar en matices de rechión ta l'altra. Asinas, en castellán pareix que a definición mas acceptada ta o termín sería d'una punta de poca altura y deseparada (anisolada) de qualsiquier sarrato u formación, a la contra de como s'emplega en aragonés, y en significando el que en aragonés recibe millor nombre de «pueyo», «tozal» u «cabezo».

Manimenos, en arias en o sud-este castellanizadas dende antigo, a parola cerro ha substituiu clarament a pueyo pa dicir un tozal anisolau, tal como se veye en o Castiello d'el Pueyo que bi ha asociau a l'actual toponimo Cerro de San Esteban. Talment siga o mesmo caso o Cerro del Pu en Villar d'el Cobo, que podría remontar-se a El Pui.

Se veiga tamién[editar | editar código]

Referencias[editar | editar código]

  1. (an) Casaus Parrilla, Chesús y Miguel Ballestín, Pascual: Dizionario Aragonés de Terminos Cheograficos; Gara d'Edizions. Zaragoza, 2008. ISBN 978-84-8094-059-7
  2. (es) Lasaosa Susín, Ramón et Ortega Martínez, Miguel: Miradas desde Tella; Ayuntamiento de Tella-Sin + Mancomunidad del valle de Gistaín + Ediciones Imago. Zaragoza, 2003. ISBN 978-84-88518-61-7