Historia de Crimea

A historia de Crimea se caracteriza por a converchencia d'influencias que dimanan tanto d'as estepas euroasiaticas como d'os Balcans y Anatolia y l'afluencia y transito de diferents pueblos d'orichens dispars. Bi ha textos escritos referents a la Peninsula de Crimea dende l'antiguedat y o mesmo pai d'a Historia, Herodoto, parla d'os habitants d'a peninsula. En a historia de Crimea se veye una dicotomía entre a costa sudeste, (d'influencia mediterrania), y o resto d'a isla, (relacionato con o mundo d'as estepas euroasiaticas).

Crimea en l'antiguedat

Ta más detalles, veyer l'articlo Tauricaveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

Antigas colonias griegas en a costa norte d'a Mar Negra.

En l'antiguedat yera conoixita como Taurica u Taurida, d'o griego Ταυρίς, Ταυρίδα. As zonas montanyosas d'a costa sud yeran habitatas por un pueblo que recibió o nombre de tauri y as rechions interiors yeran habitatas por os scitas, consideratos como invasors posteriors a los tauri y a los cimerios que vivioron a lo norte d'a peninsula.

En o sieglo V a.C os griegos encomenzoron a creyar colonias en as costas de Crimea. Os dorios de Heraclea fundoron Χερσόνησος (Khersonesos) en l'actual Sebastopol y os chonios de Mileto fundoron Feodosiya y Panticapaeum (tamién dito Bosforo). En l'anyo 348 a.C amaneixió o Reino d'o Bosforo Cimerio, que tenió relacions con Atenas. A fins d'o sieglo II a.C o rei scita Esciluro establió a suya capital en Neapoli (actual Simferopol; o Reino Scita de Neapoli estió a zaguera entidat politica importancia que tenioron os scitas., pero ya con muita influencia cultural griega, y fue sozmeso a vasallache por Mitríades d'o Ponto.

O Reino d'o Bosforo Cimerio esdevinió tributario de Roma y dimpués fue anexionato. Os romans fundoron a colonia de Charax pa defender Khersonesos. Encara en tiempos de Nerón os gobernador Plautio Silván Elián habió d'intervenir contra os scitas, que de cabo quan representaban un periglo pa Khersonesos.

Invasions barbaras y presencia bizantina

Crimea en o sieglo XV (texto en francés): a linia amariella representa a muga de l'anterior "Thema de Khersón" en l'Imperio Bizantín, a linia y os puntos royos representan as mugas y ciudatz d'o Principato de Teodoro respectivament, os puntos verdes son ciudatz d'o Khanato de Crimea y os puntos blancos as colonias chenovesas (Gazera).

Quan l'Imperio Román cayó en decadencia Crimea fue invadita u ocupata por diferents pueblos como os godos (anyo 250), os hunnos (376), os bulgaros (dende o sieglo IV dica sieglo VIII), os gazaros (sieglo VIII), o estato d'a Rus de Kiev (sieglos X y XI), os cumans (1050) y os mongols (1237). Os bizantins preboron de mantener u reconquerir os territorios costers d'o sud. En a decada de l'anyo 830 baixo o mandato de Teofilo os territorios recuperatos por os bizantins fuoron organizatos como o Thema Chersōnos o Thema de Khersón. A mitat d'o sieglo X a part oriental de Crimea fue conquiesta por Esviatoslau I de Kiev y esdevinió part d'o principato de Tmutarakan adintro d'a Rus de Kiev. En ixos tiempos os varegos d'a Rus de Kiev y os bizantins de Kherson entroron en contacto, contactos que reflecta a traducción aragonesa d'o "Libro de los Emperadors":

et por aq(ue)sta razon enuio a Rosia el fillo del gouernador chero(n) qui auia nombre Calochero de que el senyor de los rosos enuio una huest contra los burguaros la qual a feyto grant danyo et destruccion a las terras & castellos de los burguaros et leuaron gran despulla et catiuaron muyta gent et apres tornaron a su terra et el seguient anyo el senyor de los Rosos enuio huest contra los burguaros la qual a feyto grant danyo como la primera

En l'anyo 988 o principe Vladimir I de Kiev destruyó a ciudat bizantina de Kherson u Chersones. Os Venecians fundoron colonias por tota a costa: Cembalo (Balaklava), Soldaia (Sudak), Cherco (Kerch) y Caffa (Feodosiya).

En o sieglo XIII a Republica de Chenova prenió o control d'estas colonias, controlando o comercio d'a Mar Negra por dos sieglos. Tamién en o sieglo XIII os territorios d'o Thema de Khersón no ocupatos por os chenoveses s'organizoron como o Principato de Teodoro con capital en Doros y a primerías part de l'Imperio de Trapisonda. As zonas interiors yeran baixo control d'o Khanato d'a Horda d'Oro, scisión de l'Imperio Mongol. En as zonas interiors se creyará una nueva identidat etnica arredol d'un nuclio poblacional cumán gobernato por una clase dirichent d'orichen mongol y de relichión musulmana, os tartres de Crimea. En o sieglo XIII Frai Haitón menciona como "Tierra Gazera" en La Flor de las Ystorias d'Orient probablement a tota a peninsula de Crimea, car os chenoveses no perdioron ixas colonias en tiempos de l'Imperio Mongol y d'o Khanato d'a Horda d'Oro y las mantenioron dica que l'Imperio Otomán las invadió con a intención de tener continuidat territorial con o Khanato de Crimea.

…regno de Cumania, el entro en el regno de Rosia et prisolo et conquisto la tierra gazera et el regno de Vulgaria. Apres caualgo entro al regno de Ongria et aqui trobo algunos cumanianos et prisolos. Apres de aquest…..

Khanato de Crimea

Ta más detalles, veyer l'articlo Khanato de Crimeaveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

O Khanato de Crimea en l'anyo 1600

En o sieglo XV os habitants de l'interior y norte de Crimea s'organizan como un khanato autonomo, o Khanato de Crimea, que resistió més tiempo que atros khananos tartres a presión de l'Imperio Ruso por tener a protección de l'Imperio Otomán. En o sieglo XVIII Catarina II de Rusia s'encerrina en ixamplar l'Imperio Ruso por o sud a costa d'o Khanato de Crimea, rematando por conquerir tota a peninsula de Crimea en l'anyo 1783.

Crimea en l'Imperio Ruso

Dimpués de l'anexión encomenzó a cambiar a estructura etnica d'a población. Fuoron fundatas nuevas ciudatz, muitos rusos y cristians d'atras nacionalidatz s'establioron en Crimea, y muitos tartres crimeus emigroron a lL'Imperio Otomán. l'Imperio Ruso teneba Sebastopol una important base naval. En a Guerra de Crimea (1854-1855) os angleses, franceses asitioron esta base naval. En o periodo zarista a costa sudeste de Crimea esdevinió un important puesto de vacanzas pa os rusos, destacando Yalta.

Periodo sovietico y actual

Dimpués d'a Revolución Rusa se creyó a Republica Socialista Sovietica Autonoma de Crimea dentro de Rusia en a que os tartres crimeus yeran minoritarios. A invasión alemana d'a URSS dió esperanzas a los nacionalistas tartres crimeus y colabororon en gran part con os invasors alemans. Crimea estió scenario d'unas operacions en as que briló o chenio melitar d'Erich von Manstein, con una brilant victoria alemana en a Batalla de Sebastopol, ciudat presa por os alemans o 4 de chulio de 1942. Tartres crimeus d'ideyolochía panturquista siguioron a los alemans en a suya campanya por o Caucas. Manimenos os alemans habioron de retirar-sen d'o Caucas y de Crimea. A colaboración d'ixos tartres con os alemans fue a excusa que posó Stalin pa deportar-los ta Asia Central en mayo de 1944, suprimindo-se a republica socialista sovietica autonoma, que esdevinió una simple oblast dentro d'a Republica Socialista Sovietica de Rusia.

En l'anyo 1954 esta oblast pasó a depender d'a Republica Socialista Sovietica d'Ucraína. En febrero de l'anyo 1991 fue reestablito o estatuto de "Republica Socialista Sovietica Autonoma", pero dentro d'Ucraína, que poco dimpués declaró a independencia. En a Ucraína independient s'ha permeso de tornar dende Asia Central los tartres crimeus, que se suposa que yeran uns 250.000 ya a primerías de l'anyo 1994.

Bibliografía

• André Sellier, Jean Sellier "Atlas de los pueblos de Europa Central". Acento editorial.