Haitón de Korykos

De Biquipedia
(Reendrezato dende Frai Haitón)
Ir a la navegación Ir a la búsqueda
Haitón de Korykos
Haitón entregando a lo papa Climent V la suya obra "La Flor de las Ystorias d'Orient", como informe sobre os mongols.
Haitón entregando a lo papa Climent V la suya obra "La Flor de las Ystorias d'Orient", como informe sobre os mongols.
Información personal
Calendata de naixencia ?
Calendata de muerte 1320?
Ocupación Monche, historiador y conestable

Haitón de Korykos u Frai Haitón estió un noble armenio naixito en lo sieglo XIII y muerto a principios de lo sieglo XIV que se fació monche y escribió un extenso informe sobre los mongols y los pueblos d'Asia adrezato a lo Papa Climent V con lo títol "La Flor de las Ystorias d'Orient", que en los suyos tiempos fue tradueito a los principals idiomas de cultura d'Europa Occidental, incluito l'aragonés.

Yera lo sinyor de la ciudat portuaria de Korykos (actual Kiz Kalesi) y miembro de la familia reyal de lo reino d'Armenia la Chica u Cilicia-Armenia, sobrín de lo rei Haitón I y primo de lo suyo succesor Haitón II, contra qui conspiró en 1293, habendo d'exellar-se en l'anyo 1294 en Chipre, on s'unió a l'Orden de los Premontrés de l'Abadía de Bellapais, decisión que no fació goyo a la Ilesia Armenia.

Haitón se'n fue ta Piteus, on residiba lo Papa Climent V y i esdevinió lo prior de l'Orden de los Premontrés. Predicó una nueva cruzata pa recuperar Tierra Santa en colaboración con los mongols. Mientres yera en Francia escribió un tractato cheografico d'Asia, lo primero de la Edat Meya, titulato Histoire merveilleuse, paisante et récréative du grand empereur de Tartarie, Grand-Khan. Escribió tamién La Flor de las Ystorias d'Orient, en la qual exposa las razons d'una alianza entre Armenia la Chica, lo Prencipato d'Antioquía y lo Imperio Mongol en 1259-1260:

Quando Aloon se fue reposar vn anyo con sus ge(n)tes enla ciudat de Rosais el enuio por el Rey de Erminia que vinies a el car el tenia de yr a reçebir la t(ier)ra santa et tornar la alos xp(ist)ianos el Rey ayton de buena memoria fue mucho alegre de aquestas nueuas et aplego grant huest de valientes ho(m)bres de cauallo et de piet Car en aquel tiempo el regno de Erminia era en ta(n) bue(n) stamiento que el fazia .xij .mil. hombres a cauallo et .vc. mil. hombres a piet

Dimpués de l'asesinato de lo rei Haitón II en l'anyo 1307, Haitón de Korykos tornó ta Cilicia-Armenia y esdevinió lo conestable.