Bulgaros (pueblo nomada)

De Biquipedia
Ir ta: navego, busca
Victoriosos soldatos protobulgaros asasinan a os suyos oponents romans d'orient (bizantins), d'o Menolochio de Basilio II, sieglo X.

Os bulgaros nomadas u protobulgaros estioron un pueblo nomada que habitaba en as estepas d'Europa Oriental. Una parte d'ellos trescruzó o Danubio invadindo o Imperio Román d'Orient y ocupando Moesia, a on se fusionó con a población sedentaria eslava y traco-romana contribuindo a la formación d'o pueblo eslavo bulgaro. Atra parte d'ellos formoron un reino en a Cuenca d'a Volga que duró dica a invasión mongola d'o sieglo XIII. Se suposa que yeran un pueblo turquico relacionatos con os hunnos y os chuvaixes y que tamién han contribuito a la formación d'os pueblos tartres d'a Volga.

L'arqueolochía documenta en o sieglo VI a presencia d'una cultura atribuible a los bulgaros nomadas en as estepas ponticas, vicins orientals d'os eslavos. Corresponden a los bulgaros as tumbas prencipescas de Perescepino, Glodosy y Voznesenka, con vaixiellos bizantins, armas y choyas.

Pareixe que i heba a lo menos quatro brancas u cuatro zonas con población bulgara:

  • En a val d'o Kubán.
  • Os Utrigurs, que dimpués quedaría establita en o baixo Kama.
  • Os Cutrigurs, a lo norte d'o Baixo Danubio.
  • Una branca que yera por Europa centro-oriental y que entró en Italia con os longobardos.

Enantes d'a deseparación definitiva d'as dos brancas supervivients d'o pueblo bulgaro nomada heban plegato en un apocheu baixo o khan Kubrat. A invasión d'os Gazaros los deseparó.[1]

O estato Bulgaro de Mesia[editar | editar código]

Enta l'anyo 670 una branca d'o pueblo bulgaro baixo o mando d'o Can Asparukh crució o Danubio y ocupó o norte d'a provincia romana de Mesia. Os bizantins no podioron evitar-lo y rematoron acceptando a perda d'este territorio. Os bulgaros facioron liga con siet tribus eslavas que yeran en a ribera d'o Danubio, y se creyó un estato que esdevinió o primer Imperio Bulgaro. O prencipe bulgaro Tervel establió buenas relacions con Chustinián II y firmó un tractato comercial con Costantinoble.[2]

O can Crumo (801-814) pautó con Carles Magno y atacoron chuntos a los avaros, desfendo o estato avaro, pa dimpués repartir-sen Panonia entre Bulgaria y l'Imperio Carolinchio con o río Tizsa como muga.[2]

A introducción d'o cristianismo como relichión oficial d'o primer Imperio Bulgaro con una liturchia en eslavo fació que os bulgaros, de luenga turquica, s'eslavizasen y que con o tiempo totz os pueblos eslavos d'o estato bulgaro esdevenisen un pueblo solo conoixito tamién como "bulgaros".

Referencias[editar | editar código]

  1. Hermann Kinder, Werner Hilgermann, Manfred Hergt Atlas Histórico Mundial. De los orígenes a nuestros días Akal, 2007. p 117
  2. 2,0 2,1 Gabriela Makowiecka, Estanislao Macowiecki La Cultura Eslava Editora Nacional

Bibliografía[editar | editar código]