Godos

Iste articlo tracta sobre o pueblo chermanico. Ta o lugar d'o municipio de Torreciella se veiga Godos (Xiloca).

Territorios historicament habitatos por os godos antes d'a invasión hunna; en verde l'aria d'orichen, en royo o territorio d'a cultura de Wielbark, en narancha o territorio d'a cultura de Chernyakhov.

Os godos estioron un pueblo chermanico oriental orichinario d'o sud de Suecia que emigró ta Europa Centro-Oriental y creyó un estato centrato en l'actual Ucraína con influencia dende a Mar Negra dica a Mar Baltica en tiempos d'o Baixo Imperio Román. A presencia d'os godos en Ucraína crebó a continuidat territorial d'os pueblos sarmatas. Os godos quedoron dividitos en dos brancas: os godos de l'este u ostrogodos y os godos de l'ueste u visigodos. O territorio inicial d'o estato godo centroeuropeu antes d'a deseparación en dos brancas corresponde la cultura de Chernyakhov. A invasión d'os hunnos empentó a las dos brancas d'os godos enta l'Imperio Román en a suya quasi totalidat. Os godos tenioron una cristianización primerenca en relación a atros pueblos chermanicos y esdevinoron arrians. Luitaban principalment a caballo, y talment prenioron este costumbre en part por coexistencia con os sarmatas. A luenga d'os godos ye dita "gotica".

Os godos encomenzoron a presionar as provincias romanas de Dacia, Moesia Inferior y Tracia dende l'anyo 238, y dende ixe anyo representoron un problema defensivo pa os romans. En tiempos de Decio un exercito organizato de godos baixo o mando de Cniva trescruzó o Danubio y entró en Moesia y Tracia pa saqueyar-las, en l'anyo 250 asitioron y saqueyoron Filipopoli (Plovdin) y en verano de 251 derrotoron a los romans de camín ta casa en a Batalla d'Abrittus. Os godos tornoron a trescruzar o Danubio en expedicions de saqueyo en os anyos 260 y en 267-268. Encara que os emperadors Claudio II y Aurelián consiguioron refusar estos ataques, Aurelián decició abandonar a provincia de Dacia antes de l'anyo 273.

En ixos tiempos os godos quedoron dividitos en dos grupos. Os que bi heba a l'este d'o Dniester esdevinioron os greutungos u "ostrogodos". Os que bi heba a l'ueste d'o Dniester y en os territorios abandonatos por os romans a lo norte d'o Danubio yeran conoixitos como tervinchios u vesos y bell tiempo dimpués como "visigodos". Dimpués de fer-se esta división muitas d'as mencions romanas a "godos" en cheneral se refieren en realidat a los ostrogodos.

Mencions en fuents aragonesas y navarras

En as cronicas medievals aragonesas y navarras abundan referencias a los reis visigodos, a l'egual que en atras cronicas medievals d'a Peninsula Iberica. Os visigodos son a sobén mencionatos simplament como godos.

En os textos d'a escuela de Chuan Ferrández d'Heredia son freqüents as mencions a las dos brancas de godos: videgodos ("visigodos") y ystregodos ("ostrogodos"). Manimenos a vegatas los confunden, sobretot quan coinciden nombres de reis como Teodorico. A vegatas mencionan a los ostrogodos simplament como godos.

Un eixemplo de mención antes d'a deseparación definitiva en as dos brancas se troba en "Historias contra los Paganos" quan mencionan as primeras incursions d'os godos en l'Imperio Román y a perduga de Dacia:

Et toda grecia et Macedonya et ponto et asia por la copiosa multitut delos godos fuero(n) destruydas Car dacia dalla del danubio pora todo tiempo se p(er)dio

En a "Grant Cronica de Espanya", compilación historica de Chuan Ferrández d'Heredia bi ha una curiosa explicación sobre a división en as dos brancas:

& escriuieron el nascimiento. delos godos & delos uidegodos & delos ystregodos. Las quales gentes / ya sea que fuessen todos de una ysla & de una generacion. empero huuieron asi diuersos nombres por que los que eran de medio d(e)la ysla fueron clamados godos. & los dela part d(e)l sol ixient uidegodos & los d(e)la part de sol ponent ystregodos. .

Os textos aragoneses transmiten a confusión tardana entre chetos (dacos) y godos y d'esta traza en a "Cronica de Sant Chuan d'a Penya" os presonaches historicos dacos son mencionatos como reis godos. En a "Grant cronica de Espanya" dicen:

sa(n)t ysidoro q(ue) fue d(e)la gen(er)acio(n) d(e)los godos / q(ue) fue gra(n)t doctor e(n) todas scie(n)cias / q(ue) e(n) lures sc(r)ipturas no(n) fiziero(n) me(n)c'io(n) d(e)los godos si no(n) ta(n)to q(ue) iosaf(us) dize q(ue) fuero(n) clamados getas & sa(n)t ysydoro dize q(ue) fu(er)on clamados citas.

Bibliografía

• Francisco Beltrán Lloris: Los germanos. Historias del Viejo Mundo, num. 15. Historia 16.
• María Victoria Escribano Paño: Los godos en Aragón. CAI 100.