Fragaria

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Fragaria
Fragaria spp.
Denominacions populars
Fragueras, martuelleras, martuellers, magorieras
Clasificación cientifica
Eukaryota
Plantae
Magnoliophyta
Magnoliopsida
Rosales
Rosaceae
Maloideae
Fragaria
Descripción
Fragaria
L., 1735

Fragaria ye un chenero de plantas rosacias no-lenyosas de port herbacio, que popularment se conoix como fragueras[1] u martuelleras[1], con cualques especies cautivadas ta la producción de a suya fruita caracteristica, a fraga. A voz martuello se reserva ta la fruita d'os eixemplars silvestres. En aragonés se gosa fer diferencia d'entre as Fragaria domesticas y as que creixen en estau silvestre, y se diz fragueras nomás a las domesticas, reservando-se o termin martuelleras ta las salvaches[2].

As especies de Fragaria son fácilment hibridables d'entre ellas. A especie predominant y silvestre en Europa, Fragaria vesca, o martuellero proprimaent dito, estió a primera en domesticar-se. Manimenos, en l'actualidat a mayor parte d'a producción de fragas ta consumo dimana d'una fraguera hibrida, Fragaria x ananassa, que fa las fragas mas grans y aromaticas, por o que ha gosau desplazar a la martuellera.

Descripción[editar | modificar o codigo]

As fragueras son plantas perens que pierden as partes aerias d'agüerros y remanen soterranias en l'hibierno ta re-brostar de primaveras. En a epoca vechetativa, se presentan como una roseta de fuellas superficials y tallos florals, con fuellas composadas de tres foliolos ovals con as laderas aserradas, de color verde intensa.

Os fruitos de Fragaria, as fragas, son en realidat pseudofruitos de tipo poliaquenio, que en Botanica reciben o nombre especifico d'eterios.

Fitonimia[editar | modificar o codigo]

A denominación cheneral en aragonés ta las variedaz domesticas, y documentada amplament por a mayor parte d'o territorio, ye o fitonimo «fraguera»[1] (lat. <FRAGARIA, de <FRAGA, con o mesmo significau). Con ista denominación s'ha documentau en Echo, en Aragüés de lo Puerto, en Buerba, en Vio, en Fanlo, en Chistén[3], en Torres y en Balbastro[1], en as comarcas d'a Chacetania, Sobrarbe, Ribagorza y o Semontano de Balbastro, o cual indica una distribución mayoritaria por l'Alto Aragón.

En a val d'Ansó s'emplega un termin particular y, aparentment, exclusivo de a dita val: «magoriera», derivau de a palabra que emplegan os ansotanos ta referir-se a la fruita d'istas matas, «magoría»[1][4], que ye un basquismo.

A denominación de «martuelleras» u «martuellers/-os» s'aplica a os eixemplars que creixen en estau silvestre[2], y dimana de martuel/martuello, una voz de radiz prerromana[3] que se debió d'incorporar a'l latín local de l'Alto Aragón con una forma hipotetica con desinencia en -ELLU, pus muestra a tipica dicotomía de formas -ello/-el que han adoptau belatras palabras aragonesas que han evolucionau dende voces latinas que a teneban, como castiel/castiello.

Imáchens[editar | modificar o codigo]

Referencias[editar | modificar o codigo]

  1. 1,0 1,1 1,2 1,3 1,4 (an) VIDALLER TRICAS, Rafel, Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza 2004. ISBN 978-84-8986-235-7
  2. 2,0 2,1 (es) BLAS GABARDA, Fernando y ROMANOS HERNANDO, Fernando, Diccionario Aragonés: Chistabín-Castellano; Gara d'Edizions. Zaragoza, 2008. ISBN 978-84-8094-061-0
  3. 3,0 3,1 (es) MOTT, Brian L.. Diccionario etimológico chistabino-castellano castellano-chistabino. Institución «Fernando el Católico». Zaragoza, 2000. ISBN 84-7820-553-5
  4. (es) BARCOS, Miguel Ánchel, El Aragonés Ansotano: estudio lingüístico de Ansó y Fago; Gara d'Edizions. Zaragoza, 2007. ISBN 978-84-8094-058-0

Vinclos externos[editar | modificar o codigo]