Exea d'Albarracín

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

Exea d'Albarracín
Municipio d'Aragón
Anvista de la Ilesia de lo Carmen y de lo parque infantil.
Entidat  • País  • Provincia  • Comarca	Municipio  Aragón  Teruel Sierra d'Albarracín
Partiu chudicial	Teruel
Superficie	57,45 km²
Población  • Total	434 hab. (2013)
Altaria  • Meyana	1031 m.
Distancia  • 23 km	enta Teruel
Alcalde	Manuel Alamán Ortiz
Codigo postal	44110
Coordenadas	40°24’39’’N 1°20’47’’U
Exea d'Albarracín Exea d'Albarracín en Aragón
Web oficial

Exea d'Albarracín (Gea de Albarracín en castellano) ye un municipio de la provincia de Teruel, situau en la comarca de la Sierra d'Albarracín. La suya población ye de 410 habitants (2013), en una superficie de 57,45 km² con una densidat de 6,91 hab/km²

Toponimia

D'acuerdo con Antonio Ubieto Arteta s'escribió Exea entre 1609 y 1646 y Gea dende 1713 dica 1860, prenendo l'apelativo de Albarracín dende 1873. L'analís de la documentación amuestra que l'uso ye muito mes antigo de l'apelativo, y que antes de 1609 ya se trobaba formas como Exea coexistindo con Xea y Ixea.

En lo Fogache de 1495 s'escribe un epigrafe Exea seguiu d'atro epigrafe moros de Xea.

En la versión de lo fuero de Teruel de lo sieglo XVI se replega un texto de 1461 de las Cortz de Calatayú y s'escribe Exea de Albarrazín.

En las Cronicas de los Chueces de Teruel s'escribe Xea y Xea d'Albarrazín:

M° CCC XXXIIIJº Don Bernat Duget fué el conzejo de Teruel sobre Xea de Albarazin quemóla por quel Seyor della prisó honbres presos de termino de Teruel.

tomó preso a Lois Perez de Cuevas vecino de la Puebla, el qual usava de Juez en las aldeas, viniendo de Xea enta la Puebla.

, corrieron en la plaça de Teruel un novillo que compraron de los moros de Xea.

Encara en 1761 s'escribió un texto con lo títol Madres Capuchinas del Convento de Exea de Albarracin.

Tomás Lafuente Pérez interpreta este toponimo a partir de lo latín EXIRE y significaría "salida" referindo-se a una salida natural de la Sierra d'Albarracín.

L'uso de l'apelativo d'Albarracín encara que esporadico puet remontar-se a la baixa Edat Meya, en lo Fogache de 1405 ordenau en las Cortz de Maella s'escribe Exea de Albarazi:

...recebido de los hombres del lugar de Exea de Albarazi, que yes de la honorable dona Francisqua de Heredia...

Cheografía

La localidat de Exea d'Albarracín ye situada chunto a lo cauz de lo río Guadalaviar auguas enta baixo de la zona de foces que ha escarbau salindo de la Sierra d'Albarracín. Lo glacis d'Exea d'Albarracín ye a piet d'esta sierra y baixa enta la depresión de Calatayú-Teruel, constituindo part d'un semontano.

Un sector que bi ha a lo sud de lo termin municipal d'Exea d'Albarracín ye Sierra Carbonera, segmento de la Sierra d'Albarracín con materials paleozoicos y que contina en lo termin municipal de Bezas.

Lo sinclinorio churasico d'Exea d'Albarracín-Alustante desparte los anticlinals d'Aragoncillo-Sierra Menera a lo nord-este y Santa María del Espino-Sierra Carbonera a lo sudueste

Mugas

Lo suyo termin municipal muga con Bezas, Albarracín, Cella, y con una manga de lo termin d'Albarracín correspondient a Las Casiellas de Bezas.

Historia

En 1166, Alifonso II lo Casto cedió a Calvet de Biel tierras y dreitos en la redolada d'Albarracín pa pagar-li l'aduya en una futura conquiesta d'Albarracín que no se produció. Exea ye entre las tierras que li da.

Insuper vero dono tibi aldeyam de Exeia, cum omnibus suis terminis populatis et heremis, et cum montibus et silvis et aquis, et sotis, et cum ingressibus et exitibus universis, hec atque omnia serie sicut superius continetur.

En 1284 lo rei Pero III d'Aragón conquirió la Senyoría d'Albarracín y cedió lo lugar d'Exea a lo noble castellano Diego López de Haro, enemigo cerrino de lo sinyor d'Albarracín Juan Núñez de Lara. La localidat mantenió la categoría de "lugar" por lo menos dica 1306, y cambió de mans unas quantas vegadas.

Lo 24 de mayo de 1428 lo rei Alifonso V d'Aragón dió la villa d'Exea a Chuan Ferrández d'Heredia.

Entre 1446 y 1495 perteneixeba a la Sobrecollida de Teruel. Lo fogache de 1495 indica que bi heba 7 fuegos de cristianos y 94 fuegos de moros de Xea.

Lo 20 d'agosto de 1610 fuoron forachitaus d'Exea d'Albarracín 2260 moriscos. Lo vuido poblacional lo plenoron nuevos pobladors cristianos navarros, castellanos, valencianos, catalans y andaluces.

En 1646 perteneixeba a la Vereda de Mont Albán. Entre 1711 y 1833 perteneixió a lo Correchimiento d'Albarracín.

Demografía

Evolución demografica

2003 2004 2005 2006 2007 2008 2009 2010 2011 - - - - - - - - -

2012 2013 2014 2015 2016 2017 2018 2019 2020 - 410 - - - - - - -

2021 2022 2023 2024 2025 2026 2027 2028 - - 434 - - - - - - -

1990- : población de dreito. Fuent: Intercensal en l'INE, Series de población en l'INE y Relación d'unidatz poblacionals en l'INE.

Administración

Reparto de concellers

Eleccions municipals
Partiu	1979	1983	1987	1991	1995	1999	2003	2007	2011
Partido de los Socialistas de Aragón									3
Partido Aragonés									3
Partido Popular									1
Total									7

Alcaldes

Lista d'alcaldes

Lechislatura	Nombre	Partito politico
1979–1983	León Sáez Pascual	Unión de Centro Democrático
1983–1987	Leoncio Pérez Ramos	AP
1987–1991	Leoncio Pérez Ramos	AP
1991–1995	Francisco Meléndez Malo	Partido Aragonés
1995–1999	Francisco Meléndez Malo	Partido Aragonés
1999–2003	Francisco Meléndez Malo	Partido Aragonés
2003–2007	Francisco Meléndez Malo	Partido Aragonés
2007–2011	Antonio Navarro Marimón	PSOE
2011–2015	Manuel Alamán Ortiz	Partido Aragonés
2015–2019	Manuel Alamán Ortiz	Partido Aragonés
2019–2023	Santiago Rodríguez Gracia	PSOE

Puestos d'intrés

• Ilesia de lo Carmen (sieglo XVIII).
• Aqüeducto romano.
• Convento d'os Carmelitas (sieglo XVII).
• Convento d'as Capuchinas (sieglo XVII).
• Casa Gran (u casa d'os Reis d'Aragón).
• Ermita de Sant Roc (sieglo XVIII).
• Ermita de Sant Antón (sieglo XVII).

Fiestas

• Sant Isidro Labrador, 15 de mayo.
• San Bernal (patronals), 20-24 d'agosto.

Liendas

• Lienda d'o palacio subterranio.