Brinzón

De Biquipedia
Ir a la navegación Ir a la búsqueda
Iste articlo tracta sobre o erizón u arizón que ye una planta punchuda. Ta veyer altros usos d'o termín, se veiga Erizón (desambigación).
Una mata de brinzón Echinospartum horridum en a val de Tella.

En Aragón, se conoix con o nombre chenerico de brinzons, abrizons, erizons u alberizons á un conchunto d'especies diferents de matas con port arbustivo que perteneixen á la familia Fabaceae y tienen per caracteristica comuna a suya gran densidat y ramificación, con brancas curtas y muit punchudas que les dan un aspecto caracteristico de «bola» u «coixín» atipido á la mata. En o caso d'especies como Echinospartum horridum, se'n suele trobar en l'alta montanya, á partir d'os 1000-1200 metros, enradigaus en terrenos deficils, en as penyas y dica en as tarteras, en do resisten a persistencia d'a nieu más meses que no altras especies de Fabaceae, anque difuera d'o Pireneu la denominación tamién s'aplica a belaltras especies que se i troban con más freqüencia en ixes territorios, como bellas especies d'o chenero Genista que guardan una forma cacha.

Os brinzons pueden tener fuellas ocasionalment, que son muit menudas y coriacias, anque la mayoría d'exemplars no en tienen. Igual como as suyas parients as aliagas y as chinestras, floreixen de forma copiosa en primavera, con flors caracteristicament labiadas, de regular amariellas. Reciben ista denominación popular bellas especies que perteneixen á cheneros diferents, como Echinospartum horridum u Genista pumila.

Nombre[editar | editar código]

O nombre popular que s'emplega ta designar istas plantas varía quantiosament en pendendo d'os puntos cheograficos en os que se rechistra, u dica con as familias u presonas individuals que el digan, pasando que á sobén una mesma presona gosa emplegar una, dos u dica tres variants d'a parola sin sisquiera pensar-ie. Quasi todas as variants pareix que derivan d'una forma refirmada en a estructura punchuda y arronchada d'as matas d'istes vechetals, talment dimanando de formas relacionadas con o «erinzón» (d'o latín «erinaceus») u «erizón» (d'o latín «ericĭus»). En conexión con tot isto, as formas más arcaicas podrían estar as que tienen a forma «erinzón», d'as que dimpués s'habrían dido formando ixas altras, como «brinzón» (documentada en a val de Vió,[1] en a val de Broto,[1] en a val de Tella[1] y que tamién s'emplega en Puértolas, en o Sobrarbe) y dende ista «abrinzón», con ganancia d'una A popular, que s'ha puesto documentar en a val de Chistau.[1] A forma «abrizón», que pierde a N, s'ha documentau tamién en a val de Chistau.

A denominación «erizón», con a suya variant vocalica «arizón», se documentan en a Chacetania (Chaca,[1] Puent d'a Reina,[1] Fago[1]) y en l'Alto Galligo (Borrés[1]), pero tamién en o Semontano de Balbastro (Salas Altas,[1] Radiquero,[1] Alquezra[1]) y en a part meridional d'o Sobrarbe (Sasa de Surta,[1] en o Viello Sobrarbe, y Boltanya[1] en a val de l'Ara). A forma «alizón» se documenta en Nocito[1] (Plana de Uesca) y en Oliván[1] (Alto Galligo), pero tamién en Fanlo[1] y en Yeba[1] en a val de Vió (Sobrarbe), en Oto,[1] Torla[1] y Broto[1] en a val de Broto, en as que tamién se i diz indisticntament «brinzón/abrinzón».

A forma «alberizo» ye minoritaria y se'n da treslau d'haber-la sentido en Fosau,[1] en A Fueva, pero en ixa subcomarca d'o Sobrarbe i ye más freqüent a forma «alberizón»,[1] que como en altros casos coexiste con as formas «abrinzón» y «brinzón» que se dicen en altros puntos d'a comarca.

Imáchens[editar | editar código]

Referencias[editar | editar código]

  1. 1,00 1,01 1,02 1,03 1,04 1,05 1,06 1,07 1,08 1,09 1,10 1,11 1,12 1,13 1,14 1,15 1,16 1,17 1,18 1,19 1,20 1,21 (an) VIDALLER TRICAS, Rafel, Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza 2004. ISBN 978-84-8986-235-7