Alamans

De Biquipedia
Ir ta: navego, busca
Expansión de los alamans ocupando primero los Agri Decumates y dimpués travesando las mugas de lo Imperio Román.
Lo Ducato de Suebia habitau por alamans y lo Reino de l'Alta Borgonya habitau en part por alamans en lo sieglo X.

Los alamans estioron una confederación de pueblos chermans (suebos, cuados, semnons, teutons, eudusos, etc...) muitos d'ellos procedents de la zona de Brandemburgo que s'establioron enta l'anyo 213 en l'Agri Decumates (entre l'alto Danubio y lo Rin meyo), mugando con lo Imperio Román y que dimpués fuoron sozmesos por los Francos, esdevenindo part de los Volksdeustche, que por corrimiento de nombres en francés, occitán, catalán y aragonés ye conoixiu como "alemán".

Historia[editar | editar código]

A zaguers de lo sieglo II emigroron ta lo Sud forachitaus por los godos y arriboron en l'Agri Decumates en l'anyo 213. Dende l'anyo 260 feban incursions travesando los Alpes y plegando ta la redolada de Milán. En l'anyo 271 facioron una incursión en Italia, vencioron a Aurelián en la Batalla de Placentia, pero Aurelián consiguió aturar-los en la Batalla de Fano cerca de lo río Metauro, y los esconfió d'una traza decisiva en la Batalla de Pavía. Probo lis cerró lo paso por los Alpes en l'anyo 277 ya de pa cutio. Dende ixe inte los alamans quedoron restreitos a territorios a lo norte d'os Alpes, controlando un territorio a l'este d'o Rin dende o Lago Gostanza dica lo Main.

En lo sieglo IV preboron d'establir-sen en la marguin ezquierda de lo Rin. Estilicón consiguió renovar un tractau de paz con los alamans en 396/398, pero habió de retirar tropas romanas de lo limes renán a partir de l'anyo 401 pa protecher Italia contra los godos. En l'anyo 406 los suebos, vandalos y alans travesoron lo limes renán invadindo lo Imperio Román d'Occident, y aparentment por ixos tiempos los alamans aproveitoron la ocasión pa travesar-lo tamién y ocupar Alsacia y lo Palatinato.

A pesar de lo tractau de paz, lo cheneral román Flavio Aecio habió de refusar un nuevo ataque de lo grupo alamán de los chutungos contra la provincia de Recia en l'anyo 430 y lo emperador Machorián aturó en l'anyo 457 bandidos alamans que heban travesau los cuellos de los Grisons. Los alamans tamién feban incursions enta lo noroueste en dirección Colonia, dica que los francos los aturoron en la batalla de Tolbiacum (496).

Por no poder atacar a los francos los alamans adrezoron las suyas incursions enta l'ueste y sud y creyoron nuevas comunidatz en Alsacia, Lorena, Franco Condato y Suiza Alemana. Qualques capitostes alamans s'adrezoron enta lo sud enta l'alta Italia y las planas de Recia, a on que Teodorico o Gran lis permitió d'establir-sen en un contexto de retacule de los romans enta los Alpes. Adintro de lo reino Ostrogodo se formó una "Alamania" que lo rei Vitiches entregará a la fin a los francos entre 536 y 537.

En l'anyo 506 Clododeu ocupó los territorios alamans de lo Palatinato, Hesse y Maine, lo que fizo emigrar enta lo Sud a muitos alamans. La existencia de lo reino de los Burgundios en l'alto Roine aturaba los posibles abances de los alamans por Suiza, manimenos en l'anyo 532 la batalla de Autun suposó la incorporación de lo territorio burgundio a lo reino Franco en l'anyo 534, lo que permitió que los alamans tornasen a abanzar por Suiza.

En l'anyo 536 los alamans fuoron sozmesos por los francos, encara que los francos no controlaban bien que Alsacia y lo Palatinato. Bell grupo d'alamans continó l'abance entra lo Sud y Sudueste derrotando a contes francos cerca de Friburgo enta l'anyo 610, devez que belatros penetraban pos las foces y congustros de lo Chura en Franco Condato y s'establiban en Besançon. La mayoría de los alamans no travesoron ni lo Chura ni los Vosgos.

La cristianización de los alamans estió tardana y no encomenzó dica zaguers de lo sieglo VI; en lo sieglo VII no yera tant completa como en Francia u Bavera. Los territorios habitaus por alamans yeran cubiertos por la diocesi de Cuira en Recia y por las diocesis de Basilea y diocesi d'Estrasburgo en Alsacia. Los atros territorios de l'Este habitaus por los alamans no teneban que una diocesi, en Augsburgo. La colaboración de los monarcas Merovinchios y los bispes de Cuira permitió la creyación de la diocesi de Costanza. En tiempos de los Carolinchios las diocesis de los territorios habitaus por alamans deixoron d'estar sufraganias de l'Archidiocesi de Milán y pasoron a depender de l'Archidiocesi de Maganza.

Encara se feba mención de los alamans como pueblo en lo sieglo IX; lo territorio de los alamans constituiba lo Ducato de Suebia. Los alamans se fusionoron a la fin con los atros pueblos chermanicos vecins fendo part de los Volksdeustsche como la suya Stämne Sueba. En l'actualidat los descendients d'esta Stämne son dividius politicament entre Francia, Alemanya, Suiza y en menor mesura Austria, y tienen como luengache tradicional l'alamanico, sin deixar de conoixer u emplegar en a escritura y contextos formals l'alemán estándar (con a excepción d'Alsacia).

Etnonimo[editar | editar código]

Lo etnonimo de los alamans significa en luenga chermanica occidental "totz los hombres libres". En la Francia Occidental la denominación de “alamán” s'estendilló a totz os pueblos chermanicos de l'este por estar los alamans uno de los pueblos chermanicos con qui teneban més contacto cheografico kos galo-romans, (con los francos teneban més contacto social como clase dirichent que contacto cheografico en lo cabo noreste). Dende lo francés, lo arpitán y l'occitán, en catalán, aragonés y castellán tamién prenioron la denominación d'alamán pa denominar tamién a los atros pueblos chermanicos d'Europa Central, (Saxons, Frisons, Turinchians, Franconios, Baverans) y Chermania pasó a dicir-se en todas estas luengas Alemanya.

Mencions en fuents aragonesas[editar | editar código]

Fan mención de los alamans en la traducción herediana de Historia Langobardorum:

et algunas otras Ciudades enlas encontradas delos gallos entre aq(ue)sta et sueuia la qual (la qual) es patria delos alamans ues trasmontana posadas estan dos prouincias ac[']o es Recia primera Recia segu(n)da Entre las alpes en las quales propiament abitan los Retos