Lactarius deliciosus

De Biquipedia
Ir ta: navego, busca
Lactarius deliciosus
L. deliciosus
Potrecón de L. deliciosus.
Estato de conservación
Status iucn2.3 LC.svg
Seguro.
Clasificación scientifica
Dominio: Eukaryota
Reino: Fungus
Filo: Basidiomycota
Clase: Homobasidiomycetes
Subclase: Homobasidiomycetidae
Orden: Russulales
Familia: Russulaceae
Chenero: Lactarius
Especie: L. deliciosus
Nomenclatura binominal
Lactarius deliciosus
L., 1758

O robellón u rebollón (d'o latín rubellĭo, rubellōnis; «royisco». Scientificament Lactarius deliciosus (L., 1758)) ye un potrecón comestible que amaneix en as selvas de pins en tot lo territorio d'Aragón, en estando muit apreciau en gastronomía, y practicament un d'os pocos fongos que siempre s'ha cullido ta consumo humano en l'Alto Aragón.

O robellón se gosa distinguir con facilidat por a suya color royisca u narancha, con una caracteristica distribución d'aniellos concentricos de pigmentación más oscura en a corona, que i pueden ser más u menos marcaus en pendendo d'o eixemplar. As laminas son royiscas tamién, pero de color uniforme en comparanza con a cara superior d'a corona. A corona fa d'entre 4 y 16 cm de diametro, y asobén se muestra como concava en a suya cara superior, podendo tener a ladera mas u menos deformada y poco uniforme en a suya forma. O trallo ye vuedo por á dintro, y no creix si que dica os 4 u 6 centimetros d'altaria, con un diametro muit pocas vegadas superior á os 3 cm.

Como con altros fongos pasa, quan se talla u se fa garra ferida en os teixidos, se produce una oxidación que les fa prener una color bella cosa más verdisca. En as feridas, libra látex de color narancha u royisca.

Imáchens[editar | editar código]

Nombres[editar | editar código]

En Aragón, a especie L. deliciosus recibe diferents nombres. Os más comuns, manimenos, son os que derivan d'o etimo latino rubellĭo, -ōnis, que fan alusión a la color d'o potrecón. «Robellón» y «rebollón» son parolas que s'alternan aleatoriament en o vocabulario de bellas comarcas, sin que i haiga garra preferencia por la una u l'altra, y pasa asobén que se'n puede sentir de boca d'un mesmo parlador as dos formas en una mesma conversa. Se documenta a forma «robellón» en lugars tan distants d'entre si como Suelves[1] en o Viello Sobrarbe, Vio y Buerba[1] en a val de Vio (Sobrarbe), Santa Liestra,[1] Benás[1] u Cosculluela de Fantova[1] en a Ribagorza, Castelserás[1] y Torrociella d'Alcanyiz[2] en o Baixo Aragón, u Tramacastiella de Tena[1] en l'Alto Galligo. «Rebollón» s'ha puesto documentar en a Torrociella d'Alcanyiz[1][2] en o Baixo Aragón, L'Almunia de Donya Godina[1] en a Val de Xalón, en Radiquero[1] y Biarche[1] en o Semontano de Balbastro, Gallocanta[1] en o Campo de Daroca, etc. el que muestra una destribución bella cosa más ubiqua, anque cal decir-lo en o Sobrarbe as dos parolas s'intercalan en as conversas sin garra preponderancia, y probablement pasa igual en belaltras comarcas. Emparentada con as anteriors, en Ansó y Fago (Chacetania) se i documenta «rebichuelo».[3]

Manimenos, en bells puntos, se i puede documentar una forma menos especifica, tamién refierta á la coloración, que ye fongo royo.[1] En bells nuclios d'as Cinco Villas aragonesas diz que se i reconoix tamién o termin «mizclo».

Se veiga tamién[editar | editar código]

Referencias[editar | editar código]

  1. 1,00 1,01 1,02 1,03 1,04 1,05 1,06 1,07 1,08 1,09 1,10 1,11 1,12 (an) VIDALLER TRICAS, Rafel, Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza 2004. ISBN 978-84-89862-35-7
  2. 2,0 2,1 (es) QUINTANA i FONT, Artur et al., El Aragonés residual del bajo valle del Mezquín (2ª Ed.); Ayuntamiento de Torrecilla de Alcañiz. Torrociella d'Alcanyiz, 2004. ISBN 84-606-3647-X
  3. (es) BARCOS, Miguel Ánchel, El Aragonés Ansotano: estudio lingüístico de Ansó y Fago; Gara d'Edizions. Zaragoza, 2007. ISBN 978-84-8094-058-0

Vinclos externos[editar | editar código]