Cocoma

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Dos cocomas.

Cocoma u cogoma ye una denominación popular chenerica ta os potrecons de cualques especies de fongos basidiomicez de mida meyana y gran, de regular perteneixents a la orden Agaricales, que brostan de santmigaladas y no son guaire apreciaus ta minchar, en existindo-ne beluns que dica resultan verenosos. Tienen como caracteristica millor cheneral de toz ellos a coloración blanquinyosa u amarellisca, con escratas marrons u pardas en bellas fases d'o suyo creiximiento, restas d'a cuticula que les i gosa tapar a corona mientres a primer parte d'o suyo creiximiento.

Con ista denominación, que pareix que fa parte exclusiva d'o lexico patrimonial en as comarcas orientals de l'Alto Aragón (fundamentalment, Sobrarbe y Ribagorza) y no s'ha puesto documentar en garra altra comarca, se nombra especies diferents y sin garra mas vinclo filochenetico d'entre ellas que de perteneixer en a orden Agaricales, como en son cualques miembros d'os cheneros Lepiota, Amanita, Macrolepiota u Agaricus, sin garra mas relación que o suyo aspecto externo.

Os términs «cocoma» y «cogoma» son dos casos de contraposición de conservación y sonorización, respectivament, d'a consonant oclusiva xorda intervocalica K y se gosan producir en diferents lugars en as dos comarcas. A forma sonorizadera «cogoma», a demés, conoix tamién una variant vulgar en a que s'elide la -G- y queda como «cohoma» en bels lugars d'a val d'a Cinca. Ista forma s'ha puesto documentar como «coma» en L'Aínsa.

Se veiga tamién

• Macrolepiota procera
• Chlorophyllum brunneum
• Agaricus (os champinyons)
• Marasmius (as muixardinas)