Selva

Ta atros emplegos se veiga Selva (desambigación).

Fayar u selva de fayos

Una selva u bosque ye una superficie con una gran densidat de árbols. En realidat, existen asabelas definicions de selva. Ditas comunidatz de plantas cubren grans arias d'a Tierra y funcionan como habitads animals, moduladors de fluixos hidrolochicos y conservadors d'o suelo. Actualment, as selvas ocupan, alto u baixo, o 30% d'a superficie d'a Tierra, encara que son reblando en as zagueras decadas por a creixent explotación forestal, como ye o caso en l'Amazonia d'o Brasil.

A sobén, s'esferencia entre una selva natural u selva primaria y una selva artificial u selva antropizata, en considerando que a selva natural ye libre d'as influencias humanas, mientres que a segunda ye mesmo modelata por l'acción de l'ombre. Sindembargo, cal parar cuenta en que ista esferencia ye muit poco realista, y más en Europa, a on o estato actual d'as selvas ye conseqüencia d'una actividat humana de sieglos en as selvas. Puet estar que en Europa os zaguers monts con selvas primarias se troben en bellas rechions montanyosas d'Eslovaquia; bellos eixemplos de selvas naturals en atros lugars d'o mundo son l'Amazonia en Brasil, bosques tropicals en as marguins d'o río Congo en Africa u bellos bosques boreals en o Canadá.