Bestué

De Biquipedia
(Reendrezato dende Bestuer)
Ir ta: navego, busca
Bestué
Localidat d'Aragón
135.Bestué - plano cheneral.jpg
O nuclio de Bestué, dende o camín per on se be plega.
Entidat
 • País
 • Provincia
 • Comarca
 • Municipio
Lugar
Flag of Aragon.svg Aragón
Flag of Huesca (province).svg Uesca
Sobrarbe
Puértolas
Población
 • Total

22 hab. (2005)
Altaria 1228 m.
Distancia
 • 4 km
 • 21,5 km
 • 140 km

enta Puértolas
enta L'Aínsa
enta Uesca
Codigo postal 22362
Parroquial
 • Diocesi
 •Arciprestato

Balbastro-Monzón
Sobrarbe
Variedatz dialectals de l'Aragonés Ista fualla ye escrita en l'aragonés d'a valle de Puértolas.

Bestué ye un lugar (foneticament [bɪs'twe] u [bes'twe] (AFI), enantes tamién prenunciato Bestuere, AFI: [bɪs'twæɾe]) d'o municipio de Puértolas (Sobrarbe, Uesca). A suya población actual ye de 22 habitandes.

Carrera baixo d'una arcada (Casa Petit) en o nuclio de Bestué.

O lugar de Bestué, que de natural de troba a l'aldo d'un garrot (a dita Siarra Muala) d'a valle 'Puértolas, ye o zaguer nuclio d'a dita valle ta quando se mira de puyare ta as estibas d'a Montanya (de) Sensa (os pratos d'atrás d'o Castiello Mayor y as Sestrals), ixo ye o motivo que s'haiga puesto declarare parte dintro d'as linias exteriors de l'Aria de protección d'a Biosfera asociatas d'o Pargue Nacional d'Ordesa y o Monde Perdito, significando esto que totas as actividatz que se be pueden fer en es arredols be son bien controlatas.

Cartels en a plaza d'o lugar enforman a es vesitandes d'as arresas de caminata, y tamiés d'es orichens cheolochiques d'o paisache d'a valle, y con d'especial atención en as vistas que se'n tiene en alto d'o barrango d'Arirés y as Sestrals.

Surden d'astí, o lugar, bells d'es camins (de caminare) que dentran en o dito Pargue. Pistas ta a Sensa y d'altros ta a par d'Escuaín, es primeros en puyando per a ermita de Sant Miquel per baixo d'as Col·larualas (tartera d'o Castiello Mayor) que permiten tamién de pasare ta a valle d'Anyisclo per a forca d'a Collata d'a Plana Canals. Ixo ye, o pas mes simple de fer-se ta a cabezera d'o Canyón, per a rota d'o dito cubillar de Sant Vicenda (que be d'estare transcrición de Santa Vicenta, pos asinas en dicen en castellano en a valle en l'actualidat). Tamién s'adube de Bestué adebant o camín d'a Mallata d'a Fueva, con un altro cubillar recuesto debaixo o Garrot Campana ta es qui queresen caminare ixe lumo d'as Sestrals.

Cheografía[editar | editar código]

A par d'as collatas (A Colluguana y O Chinestral/Chinistral -pende qui el transcriba-) que forman es barrangues d'Arrés (u Arirés) que afluyen mes luego o Bellós, Bestué finca en a garra d'a dita Siarra Muala, en a versande sud-occidental d'o Castiello Mayor, como mure per alto o puesto a on s'achuntan o barrango 'Pocís (asinas se be prenuncia Pocins en a valle de Puértolas), enveyendo o bato dito a Collata d'Ixeto dende alto estando. A'l canto o lugar be hai tamién un puntalet dito penya d'Ordials u punta d'Ordials, que ye un surtidero d'as faixas per alto de l'Arirés.

As fincas de cautivo d'a localidat, que tradicionalment heban o puesto en faixas per o sud-este d'a dita, dica baixar-se-ne enta o barrango Pocins. Be están nombres d'es cambos Sant Quílez en a man que mira ta Puértolas, y L'Habanera es que son en as garras d'o Castiello Mayor. De frende d'estes, as faixas d'O Raso y O Solano son ya cosa de Puértolas, y Es Pueis d'a Solana per on éstas baixan dica l'Arirés (parde que huei be tiene cosa que selvas perque no s'ha cautivato en tiempos) per a falda d'o tozal de Puértolas.

A capella chicolona de Sant Quílez (actualment, vírchen d'es vicos), en o camín d'a surtida d'o lugar ta es campetz d'o canto d'o nuclio, que les da o nombre a as faixas d'ixe canto d'a Sierra Muala.

Ta o canto norueste, as faixas d'a Solana (de) Sant Miquel (que en quitan o nombre d'a ermita que be hai), con a solana d'as horas centrals d'es días, acompanian o caminare per as cabanneras antigas que s'adentran en o Pargue Nacional, huei "senders balizatos" como informan es cartels, pasando per o canto d'as gleras d'As Col·larualas, y plegan t'alto ta a Sensa

A debant d'estes puestos, o paco o Tumarruago, marca como parede d'as Sestrals que ye, a on termina a valle de Puértolas. Anque ye una garra de pendiants grandes, la ocupa una fayera-caixigar bien densa, que prene colors bien vistosas en l'agüerro.

Toponimia[editar | editar código]

Seguntes Rohlfs ye un caso de terminación -ué dezaga d'o hipotetico antroponimo Vestus, que ye en a base de Vestonius (documentato en Galia) y Vestinus (documentato en Galia y Hispania). Un chentilicio Bestius a sobrevivito en o toponimo Bestiac d'Ariège.

Monumentos[editar | editar código]

Ilesia de Bestué consagrata a l'alvocación de Sant Pero.
  • A ilesia d'o lugar, d'a primera metat d'o sieglo XVII, consagrata a l'alvocación de Sant Pero que muestra en a frontera bellas aspilleras y matacans -como tamién en hai altras en esta parte de Uesca- que se fayoron marchar ta esfensar-se mesmo d'es lacayos que ta par d'alavez feban tantismo mal en estas valles, como d'es soldatos franceses que pardiciporon en as litadas d'as guerras franco-espanyolas d'ixes anyos.
  • L'antiga ermita de Sant Quílez, d'o S.XVI, que luego en cambioron l'alvocación ta a virchen, y huei en dicen La virchen d'es Vicos/Barrios. Se troba en estremo meridional d'a localidat, en surtindo-se-be per o camín viello d'o barrango.
  • Casa Barrau, casona monumental d'a plaza d'o lugar, propiedat d'es qui en estioron os senyors en habe sieglos. La fayoron contruire per l'amo Antón Barrat (alavez, diz que ixe yera l'apellito) en l'anyo 1566, tal como se be leye en as volandreras, ixo ye, as losas estraplombatas d'es tellatos, on que bi tienen gravatos debuixos y simbols protectors, amés d'a calendata quan la fayoron. En l'arcada d'a puerda d'o patio, un escudo d'armas (d'ixes que se feban enantes) tiene una B en chunto con as quatre baras d'Aragón en una d'as metaz, y en l'altra, un onso u bestia semilar.

Historia[editar | editar código]

Finestra de Casa Barrau, on se be leye l'anyada de construcción, 1566, y o nombre de l'alavez amo d'a casa, Antón Barrat.

Bestué amaneixe numbrosamende en as fuents d'o renaiximiento perque es suyos infanzons feban parte d'o concello de Puértolas, institución que estando diferent d'el que huei pensenos que ye un concello yera bien importande ta l'administración d'es lugars y propiedatz comunes d'una valle. Ta par d'alavez mirando, es concellos yeran reunions d'os amos d'as casas con propiedatz ta l'arriendo de pastueras y selvas ta qualques actividatz que se be hesen de fere. En o caso concreto de Puértolas, yera prencipal perque yera el qui decidiba qué cosas se feban en as estibas d'a Sensa y tota a montanya d'as Tres Serols, que ixo ye una d'as mes grans estesions de pratos en esta parte d'o Pireneu.

Perque ye tan coneixito d'ixes tiempos, sabenos, per eixemplo, qué población teneba o lugar en l'anyo 1495, que se be contoron 23 fuegos, ixo ye, as casas que be heba que estasen habitadas.

Probablemende, en o sieglo XV, quan que s'estrableyoron as buegas d'as esplotacions d'a valle, quan comenzoron as epocas peyors d'enfrentamientos y barallas con altros concellos vecins (Bielsa, Bio-Fanlo). Ésta época estió importande en a historia d'a valle, perque morió l'amo feudal d'o senyorato sin descendencia (1430) y alavez es qui yeran propietarios mes grans fendo parte d'o concello el podioron comprar.

Ye perque Bestué yera o pas natural ta as pastueras d'a Montanya Sensa y l'alta cabelera d'o río Yaga (o río d'a valle de Tella) que ganore ixa importancia, perque es pastors que puyaban d'a tierra plana bien que be heban de pasare y no poco a menut se quedaban es meses que heban de mirare per o bestiar, fendo que be prosperesen as fondas y casas d'hospicio ta fer-be a vida. A importancia en o pas enta a Sensa tamién fayó que estás tan importande que controlar-lo en as barallas con es vecins y que se be fesen bells estroces en ixes anyos de mans d'os lacayos pagatos d'altras partes ta dar garra mal a es amos d'ixa tierra.

Escudo d'Armas d'una d'as casas d'a localidat. As profesions relacionatas con as armas son temas que a menut be son representatos.

O sieglo XVI estió de bien seguro a epoca mes conflitiva de totas, fendo a banda as falcadetas con valles vecinas que tamién alavez las tenioron, ye a epoca que o bandolerismo y as ampras d'hombres d'armas pagatos ta fer-le mal a es intereses. Feitos como es que escaixoron en 1503, 1519 y 1527, con gran mal ta as presonas y perchudicio de posesions materials. Cosa no se'n sabe de qui mandoron fer ixas fayenas, pero as fonts que el replegan diz que nombran presonalidatz de l'Aínsa y puestos d'es arredols. Totz ixes maldatos fayoron que, mes luego que no tarde, se ligás d'organizare partidas d'hombres armatos (ixes somatens que canta a Ronda de Boltaña, pos asinas se recuerdan encara as ampras "buenas" d'es concellos en o Sobrarbe, paisanos en o decir d'es documentos) que miraban ta defender es suyos intereses. As ampras armatas d'o concello de Puértolas se mantenioron en activo -sin saber si guaire constandes, feitos como a ocupación d'a valle de Broto per os gascons, etc- dica pasata a Guerra d'o Francés, en a qual luitoron contra d'es franceses.

A belicosidat d'ixes tiempos se veye bien en es foratos que tiene a frontera d'a ilesia, ta disparar-ne a o traviés, y altros edificios como Casa Barrau, fortificata como ta resistir en o caso que la setiesen.

Fiastas[editar | editar código]

Demografía[editar | editar código]

Evolución demografica
1495 1986 2001 2005
23 (f) 21 21 22
Dica o sieglo XVIII as poblacions de medeban con fuegos (f), ixo ye, as casas que be heban en o lugar, no pas as presonas.

Se veiga tamién[editar | editar código]

Commons-logo.svg
Se veigan as imáchens de Commons sobre Bestué.


Lugars d'o municipio de Puértolas
Belsierre | Bestué | Biés | Escalona | Escuaín | Huertas de Muro | Muro de Bellós | Puértolas | Puyarruego | Santa Chusta | Santa María