Hispania romana

Diocesi d'Hispania en a reorganización territorial de Dioclecián.

Hispania romana ye una traza de referir-se a los territorios d'a Peninsula Iberica (Hispania) en o periodo que yera baixo dominación romana, periodo que encomenzó en l'anyo 218 aC (desembarco román en Ampurias) y remató a principios d'o sieglo V quan os visigodos (que controlaban o sur de Galia y Hispania), s'independizan de Roma. As diferents demarcacions romanas en territorio d'Hispania esdevinioron una entidat territorial unificata por primera vegata baixo Dioclecián, quan se creyó a Diocesi d'Hispania.

En o periodo román d'Hispania cambeya a organización politica d'o territorio y a estructura social d'a población d'una traza irreversible. Os habitants nativos prenen a cultura, constumbres y luenga d'os conquiridors romans, (que vienen acompanyatos d'un cierto numero de población itala), en un proceso conoixito como romanización y que tien como consequencia que a mayor part d'os habitants d'a peninsula dende ixe inte sigan pueblos latins pa cutio.

Cabeza d'una antiga estatua romana de bronze. Trobata en o templo román d'o Cabezo d'Alcalá, en Zaila (Baixo Martín).

Dimpués d'a conquiesta romana d'Hispania, este país esdevinió una part fundamental d'o Imperio Román, aportando recursos materials y humans, representando por muitos siglos una d'as partz més estables d'o mundo román y l'orichen de bells gobernants d'o Imperio, como Trachán y Teodosio I.