Allium cepa

De Biquipedia
Ir ta: navego, busca
«Cebolla» reendreza ta iste articlo. Ta atros usos de «cebolla» se veiga Cebolla (desambigación).
Allium cepa
Allium cepa 004.JPG
Cebolla
Denominacions populars
Cebolla
Estato de conservación
Status iucn2.3 LC.svg
Seguro (IUCN)
Clasificación scientifica
Dominio:
Eukaryota
Reino:
Plantae
División:
Magnoliophyta
Clase:
Liliopsida
Orden:
Asparagales
Familia:
Amaryllidaceae
Subfamilia:
Allioideae
Tribu:
Allieae
Chenero:
Allium
Especie:
Allium cepa
Descripción
Allium cepa
L., 1753

A cebolla[1] (d'o latín <CEPULLA/CIPULLA; scientificament Allium cepa (L., 1753)) ye una planta herbacia monocotiledonia d'a familia d'as amarilidacias, en a subfamilia d'as alióidias, cautivada por o suyo bulbo comestible; a cebolla propriament dita.

Descripción[editar | editar código]

A cebolla ye una planta perén que se torna reproductora a'l segundo anyo de vida, fase a la qual, d'entre os eixemplars cautivaus, no se'n gosa deixar arribar sique a bells poquetz que se fa servir ta producir a simient d'as anyadas succesivas.

Como todas as especies d'o chenero Allium, as cebollas tienen un teixiu meristematoso de forma discoidal que se conoix como disco caulinar, que fa de primordio ta toda a planta. O disco caulinar produz as radices adventicias blancas tan tipicas d'as amarilidacias, que s'afunden en a tierra dica bells 60 cm, anque son prou fráchils y se gosan romper quan a cebolla se ranca ta cullir-la.

As fuellas naixen tamién dende o disco caulinar, directament, y l'apariencia de falso trallo que tiene a parte meya de a planta ye producto d'a estructura cilindrica que condicionan as fuellas exteriors, modificadas, que actuan como cuticla (dimpués, con a cebolla seca, serán a pela exterior) a on que as verdaderas fuellas (as verdes) se i troban pilladas por a base.

O bulbo d'a cebolla ye una estructura d'almagazemamiento de nutrients que fa parte d'as fuellas (as napas de cebolla son as bases d'as follas). Por tanto, as fuellas d'a cebolla tienen dos partes diferenciadas, a parte basal que se fa más gorda a malas que va pasando o tiempo porque almagazema nutrients, y a parte distal, verde y fotosintetica, que amaneix por alto d'a tierra y que forma a parte que se vei de a planta.

As flors brostan en una inflorescencia pedunculada, solo en a segunda anyada quan a cebolla ye sembrada. As cebollas ta consumo, que se culle a la primer anyada, no gosan fer a florada. A inflorescencia ye una umbela, anque exteriorment s'asemella a una bola, y as flors, chiquininas y de color blanca-verdisca, son hexameras; con 6 petalos y 6 sepalos cadaguna. A simient va incluida en un fruito capsular, y as simients individuals son negras y diminutas.

Cada cebolla que se deixa madurar ta simient en fa qualques cientos, de forma que ta una expleitación domestica con bell par de cebollas que se deixe en o huerto en i ha de sobras ta sembrar-ne a l'anyada siguient.

Cautivo[editar | editar código]

En comparanza con o suyo parient l'allo, a cebolla no se puede reproducir vechetativament, pus o bulbo no el tienen segmentau y no bi ha dients que sembrar-ne. Por tanto, a sola forma ta sembrar cebollas ye en emplegando a simient.

A simient de cebollas se gosa sembrar en setiembre, y porque os cebollinos chicorrons recient escapaus son muit febles y se malmeten con facilidat, ye muit habitual de sembrar-los en un plantero y tresladar-los t'a huerta quan ya son una micarrona más desarrollaus, d'entre noviembre y principios de l'aviento. As cebollas chovens hinvernan en a tierra, u si se fa la siembre tardana, en aviento en o plantero, hinvernan como cebollizons y se gosan tresplantar en marzo u abril en a tierra.

A cullita se fa dende as zaguerías de mayo dica chulio, tot pendendo de as variedatz cautivadas. En a Peninsula Iberica a variedat más primerenca ye a que se diz «babosa»[1], que siempre ye feita ta recullir-la enantes de a quinzena de mayo[2]. A variedat más tardana, que s'arreplega de verano, se conoix en Aragón como «valenciana» u «cebolla de grano».[3]

En Aragón[editar | editar código]

En o territorio que en l'actualidat ye Aragón s'ha cautivau a cebolla lo menos dende a epoca d'a dominación romana.[3] A cebolla amenista una tierra grasa, aireada y con mutos nutrients; ni masiau seca ni masiau humeda, por o que ye un producto costoso de producir de forma extensiva.[3].

Manimenos, en as zonas de regano en a Comunidat Autonoma se consolidó en o sieglo XX un sector especializau en a producción de cebollas de forma extensiva que encara opera en l'actualidat. Os principals nuclios de producción cebollera en Aragón son Taust, Pedrola, Gallur, Noviellas y Luceni, con a destacada excepción de a huerta de Fuents d'Ebro,[3] lur productors s'han organizau en una Denominación d'Orichen Protechida.

Historicament, Aragón estió a principal productora de cebollas d'Espanya en os anyos 1960 y en comenzar os anyos 1970, con quasi un 19,9% de quota de mercau en 1970, quan comenzó o declive. O sector cebollero aragonés perdió muito mercau d'entre os anyos 1972 y 1977, con una quota de nomás o 5,1% d'o mercau espanyol en 1977.[3]

A superficie dedicada a la producción extensiva d'ista hortalicia ha rondau bellas 2.000 Ha dende 1979[3] dica 1999,[4] con una producción d'entre 20.000 y 40.000 cebollas por cada hectaria y anyada (entre 40 y 80 millons de cebollas en Aragón cada anyada, 35.514 Tm en 1999[4]). A mayoría de cautivos extensivos de cebollas, en Aragón, se concentran en a val de l'Ebro: 1.250 Ha i heba en a provincia de Zaragoza en 1979, contra as 300 Ha de Uesca y as 263 que en teneba Teruel.[3]

Nombres[editar | editar código]

Cebolla grillada.

En Aragón, a denominación plenament dominant ye «cebolla», tanto en aragonés como en castellano d'Aragón, sin estar garra castellanismo. Ye a sola forma que se conoix como propia en a mayor parte d'o territorio, destacando especialment zonas tan conservaderas como o Pireneu central y vals como Chistau, Tena u Echo.

«Cebolla» ye una forma propia de totz os idiomas romances d'o grupo ibero-romance occidental, tanto de l'aragonés como d'o castellano y l'asturleyonés, y tamién se troba en o gallego y o portugués. O termin dimana d'o latín <CEPULLA/CIPULLA, una forma diminutiva de <CEPA (que ye cebolla en latín cheneral) que s'emplegaba más en o latín de l'interior d'Hispania que en a resta de l'Imperio. Muit relacionau con a etimolochía latina de «cebolla», en a comarca d'a Chacetania se troba o toponimo «Garcipollera», que viene de o latín <VALLE(M) CIPULLARIA y significa literalment a «Val Cebollera» u a val a on que se criaba cebollas.

As formas «bruno» y «burno» s'han documentau exclusivament en a villa d'Ansó,[5][1] en o extrimo nort-occidental de l'Alto Aragón.

Imáchens[editar | editar código]

Referencias[editar | editar código]

  1. 1,0 1,1 1,2 (an) VIDALLER TRICAS, Rafel, Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza 2004. ISBN 978-84-89862-35-7
  2. (es) «El Cultivo de la Cebolla»; consultau o 16 de mayo de 2012.
  3. 3,0 3,1 3,2 3,3 3,4 3,5 3,6 (es) Voz «Cebolla». Gran Enciclopedia Aragonesa (TOMO III). Unión Aragonesa del Libro, Unali S.L. Zaragoza, 1981. ISBN 84-85656-10
  4. 4,0 4,1 (es) Dentrada «Cebolla» en a Gran Enciclopedia Aragonesa online; consultada o 16 de mayo de 2012.
  5. (es) BARCOS, Miguel Ánchel, El Aragonés Ansotano: estudio lingüístico de Ansó y Fago; Gara d'Edizions. Zaragoza, 2007. ISBN 978-84-8094-058-0

Se veiga tamién[editar | editar código]

Vinclos externos[editar | editar código]