Radiz
De Biquipedia
- Esta pachina trata sobre la radiz como organo d'as plantas. Ta altros emplegos d'o termino se beiga Radiz (desambigazión).
A radiz (plural radizes, d'o latín radix, radĭcis) ye l'organo bascular soterranio d'as plantas basculars. A suya funzión prenzipal no ye si que d'absorber l'augua e nutrientes ta la planta, anque tamién en desarrolla secundariamente d'altras como son a fixazión de l'organismo en o sostrato. As radizes son organos lur creiximiento manifiesta cheotropismo positibo (ixo ye, que buscan afundar-se en tierra) e fototropismo negatibo (que fuyen d'a luz). A radiz, en forma de radicula, gosa estar tamién o primer teixito embrionario en desarrollar-se e lo primer organo en amaneixer en a cherminazión.
En Aragón, en l'ambito de l'agricultura, se i gosa emplegar tamién o termino bena ta referir-se-ie. Ixa denominazión demana d'a resemblanza en l'aparenzia d'entre l'organo bechetal e los propios basos sanguinios d'o ser umano. En as plantas cautibatas més chiquetas como tamién en as yerbas, muitas d'ellas con radizes filamentosas e muit numerosas, o termino bena á sobent no s'usa si que ta denominar l'aparello radicular entiero d'a planta, o «radigamen», que ye como apareix d'a maniera més usual cuan se pica una gleba ta rancar-las. En os árbols, a bena tamién puet estar a radiz lignificata qu'amaneix á ran d'o suel. En o semontano se documenta a parabra «benamen» ta dizir «radigamen».
