Magnoliophyta
De Biquipedia
| Magnoliophyta | ||||||||
|---|---|---|---|---|---|---|---|---|
0.jpg) Una magnolia. Se considera que as Magnolias tienen un modelo arcaico de flor en o que as diferents estruturas (sepalos, petalos, estambres, carpelos) se troban en un exe elicoidal en cuenta d'estar en coronas como as atras anchiospermas, feito que se considera més rezient |
||||||||
| Clasificazión zentifica | ||||||||
|
As Magnoliophyta y Anchiospermas son una subdibisión d'o reino Metaphyta formato por as plantas con flors bertizilatas e que dimpués d'a polinizazión e fecundazión forman fruitos a lo tiempo que se desembolica a simient dentro d'ellos.
Tipicament os bertizilos son cuatre:
- Cáliz, formato por sepalos.
- Corola, formata por petalos.
- Androzeu, formato por estambres.
- Chinezeu, formato por carpelos.
Bi ha gran bariedat de flors y en belunas pueden mancar beluns d'estos bertizilos. Por exemplo en as flors que no sigan tipicament ermafroditas una flor masculina no tendrá chinezeu, e una flor femenina no tendrá androzeu.
Os estambres son pedunculatos en cuenta de tener forma de fuella como en atras espermatofitas.
Os carpelos se fusionan formando una estrutura con forma de botella, o pistilo, con una cambra dentro dita obario con os obulos dentro. L'obario se desembolica dimpués d'a fecundazión d'os obulos fendo-se més grant y esdebenindo o fruito.
Os obulos d'as anchiospermas presentan primero güeito zelulas aploides, (una oosfera, dos sinerchidas, dos polars e tres antipodas), pero dimpués se desbién que as dos zelulas polars se fusionan orichinando un nuclio diploide, con o que o lumero de zelulas haploides se reduze a seis.
A polinizazión ye un prozeso complexo, con formazión d'un tubo polinico dende o estigma d'o pistilo dica os obulos, pasando por tot o estilo. Por este tubo polinico biachan dos nuclios haploides.
A fecundazión en as anchiospermas ye doble: Uno d'os nuclios que biachan por tubo polinico fecunda a la oosfera de l'obulo (que dimpués se desembolicará orichinando o embrión d'a simient, que ye diploide), e l'atro a un nuclio diploide present en l'obulo (que dimpués se desembolicará formando l'albumen d'a simient, que ye triploide).
Mientres se ye desembolicando a simient, (l'obulo fecundato e maturo), as parez de l'obario se fan més gruesas e l'obario esdebién o fruito.
As fuellas d'as anchiospermas son muito bariatas e tipicament son laminars e no paralelinerbias.
[editar] Bibliografía
R.F.Scagel et al.- EL REINO VEGETAL. LOS GRUPOS DE PLANTAS Y SUS RELACIONES EVOLUTIVAS. Editorial Omega.
