Soto

Iste articlo tracta sobre os sotos como formacions de selva asociada a l'augua. Ta atros usos d'a parola «soto» se veiga Soto (desambigación).

Un soto.

Soto (d'o latín <SALTU) ye a parola tradicional, común en as luengas iberorromanicas occidentals, con a que se conoix a una formación vechetacional tipicament de ribera que se trobe en contacto con bell barranco, río u torrent u, menos vegadas, con un estanyo.

Os sotos gosan estar formaus por selva caducifolia de bellas especies concretas que no abundan sique en os arredols de l'augua (un ecosistema que se diz, propriament, selva de ribera u selva en galería).

En Aragón

En zonas de buena cosa d'Aragón (como a val d'Ebro), os sotos en as riberas de os ríos son as solas selvas caducifolias que se troba en muitos kilometros de forma natural, pus a falta d'augua ye un factor limitador d'o creiximiento vechetal en a resta d'o territorio, y sacando-ne formacions menors de pins, chinipros u sabinas, ye un medio dificil a on que no se troba guaires árbols.

En a montanya de l'Alto Aragón, anque i ha más formacions de caixigos y belatras especies caducifolias, os sotos son tamién envistables a distancia por estar composaus d'especies diferents d'a resta, y amaneixen con freqüencia asociaus con viveros y fuents, no so que en o fundo d'as vals, sino tamién en as versants.

Son especies d'árbols tipicas de os sotos:

• O chopo, a tremolera y, en cheneral, totz os albars.
• Os albernices.
• A sarguera y, en cheneral, totz os salces.
• As avellaneras
• As tamarizas (infreqüents en l'Alto Aragón).
• Bell acirón, como Acer opalus.
• Os urmos.

Se veiga tamién

• Caixigar.
• Carrascal.
• Barda.