Juniperus thurifera

De Biquipedia
(Reendrezau dende Sabina tarabina)
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Juniperus thurifera

Dominio: Eukaryota
Reino: Plantae
División: Pinophyta
Clase: Pinopsida
Orden: Pinales
Familia: Cupresaceae
Chenero: Juniperus
Subchenero: J.thurifera
Juniperus thurifera
L.

O Juniperus thurifera ye una especie de sabina distribuita dende L'Atlas dica los Alpes Franceses y con centro de maxima abundancia en lo Sistema Iberico.

Caracteristicas[editar | modificar o codigo]

Árbol u arbusto de fuella perén, de mida meyana, por un regular de 4 a 12 m d'altaria cuan ye árbol y d'un metro de diametro de tronco, curto, grueso, un poquet retuerto en los eixemplars viellos, con crosta parda y grisenca, fibrosa y con crebazas lonchitudinals, esgallando-se a tiras. La corona ye muito densa, de color verda escura con forma conica u ovalata y en eixemplars remoldatos aplanata y irregular. Las brancas son gruesas y las fuellas con forma d'escata como ye normal en una cupresacia, adosatas a la branqueta verda, son como escatas romboidals y aspras a lo tacto. Produce piez masculins y femenins, los fruitos son redondeyatos de color azulenca u royenca seguntes l'estato de maduración.

Floreixe a partir de febrero y los fruitos maturan a la segunda anyada, pero tamién bi ha epocas en las que no fructifican.

Juniperus thurifera

Habitat[editar | modificar o codigo]

En la Peninsula Iberica se troba en altarias dende os 140 m (Sierra de Monegriello, comarca de los Monegros) dica los mes de 1800 en a Serranía d'Albarracín, poco en relación a los 3000 m que ocupan las sabinas de l'Atlas en Marruecos. Se troba bien en puestos que plegan a los -25º en hibierno y los 40º en verano. Aguanta anyadas secas en as que no caye que meyo litro d'augua de plevia por metro cuadrau y cuasi tota fuera de lo suyo periodo vechetativo. Ye capaz de clavar as radices en los suelos mes pedregosos como lenars, a on no creixe garra arbol peninsular.

Lo sabinar mes tipico de las parameras de lo Sistema Iberico oriental ye lo tarabinar con chinebro. La sabina ye present en cualques carrascals de paramera de lo Sistema Iberico.

Estau de conservación[editar | modificar o codigo]

Distribución d'os sabinars de Juniperus thurifera en a Peninsula Iberica.

Los antigos sabinars de la depresión d'Ebro plegaban dende la Sierra d'Alcubierre dica Zaragoza y Quinto. La mayor part de los sabinars de la depresión d'Ebro los han ido tallando dende la reconquiesta.

Lo sabinar de la Retuerta de Pina ha puesto durar dica huei porque yera propiedat reyal, pero ha retaculau dende lo sieglo XIX. La chent de los Monegros feban servir los suyos trallos pa fer vigas de casas y tamién cremaban la suya fusta pa fer una cenisa con propiedaz antisepticas.

Han quedau árbols molimentals aislaus de los sabinars que encrara quedan en los Monegros. En Villamayor de Galligo se troba la celebre sabina de Villamayor, que ye un testimonio d'estos antigos sabinars a man de Zaragoza y ye la zaguera que en queda; han sembrau sabinas a lo suyo costau pa que pueda reproducir-se.

En Exelsa bi ha atra sabina testimonial, de 10 m d'altaria[1]

La presencia d'eixemplars aislaus u de chicoz sabinars en la Muela de Borcha, en Oliet a man de Sant Per de los Griegos, en Arcaine, en Segura de los Banyos[2] y La Mata de los Olmos[3] fan de ligallo con los sabinars de lo Sistema Iberico.

Se diz que lo sabinar mes gran d'esta especie ye situau entre Arcos de Xalón y Maranchón inclindo los termins de las localidaz de Sagides, Chaorna, Judes, Iruecha, Codes y Mochales. Fa poco lo han declarau Puesto d'Intrés Comunitario (LIC).

Bi ha qui afirma que lo sabinar mes gran ye en realidat en Monterd d'Albarracín.

Denominacions[editar | modificar o codigo]

Lo nombre cientifico d'esta especie, thurifera, significa «productora d'encens», pus la suya fusta ye muito aromatica.

En l'aragonés de l'actual provincia de Teruel se debeba dicir tarabina u trabina,[4] porque ha deixau sinyal toponimico dende Castellot dica Chabalambre. Esta palabra se troba en benasqués pero con un significau diferent "arbol tallau caito en o suelo, se'n pueda aproveitar a fusta u no", y talment siga relacionau con l'aragonés cheneral "tarabidau".

En castellano se clama oficialment sabina albar (ye dicir "sabina blanquenca"), pero en bellas zonas entre lo Sistema Central y Sistema Iberico en dicen enebro, denominación común con lo chinebro.

Referencias[editar | modificar o codigo]

  1. Eduardo Viñuales Cobos (coordinador): Red natural de Aragón. nº 1, Ribera Baja del Ebro Prames, 2006. pp58
  2. Eduardo Viñuales Cobos (coordinador): Red natural de Aragón. nº 30, Cuencas Mineras Prames, 2010. pp60-63
  3. Eduardo Viñuales Cobos (coordinador): Red natural de Aragón. nº 15, Bajo Aragón Prames, 2007. pp159
  4. (an) Diccionario ortografico de l'aragonés (Seguntes la Propuesta Ortografica de l'EFA). Versión preliminar. Estudio de Filología Aragonesa. ISSN 1988-8139. Octubre de 2022.