Tarabinar con chinebro

O tarabinar con chinebro u Juniperetum hemispherico thuriferae ye o sabinar mes tipico y estendillato d'os tarabinars d'o Sistema Iberico oriental y se troba entre os 1.200 y 1.350 d'altaria, on as precipitacions son arredol de 500 mm, no podendo aproveitar-ne que a metat en o periodo vechetativo d'a sabina. Os suelos son poco profundos, os restos vechetals humifican mal y se tornan en un humus dito mor, que fa dificil a expansión d'as selvas tanto esclerofilas como caducifolias.

A tarabina ye capaz de resistir climas muito continentals y muito secos. A tarabina estió muito estendillata en atros tiempos. Se sabe por rechistros polinicos que en as fases mes fridas y secas chusto dimpués d'o maximo d'a zaguera glaciación u Würm. A suavización d'o clima en o periodo postglaciar fació que bellas especies arborias la sustituisen y l'arrinconasen a las arias mes desfavorables.

O estrato arborio no plega a recubrir guaire o suelo, as coronas d'os árbols son luent de tocar-sen permitindo una buena iluminación d'os estratos inferiors.

O estrato arborio ye monoespecifico, y os atros arbols como carrascas u caixicos d'a especie Quercus faginea entran en zonas d'ecotono. En o estrato arbustivo domina o chinebro Juniperus communis hemisphaerica chunto con eixemplars chóvens d'a mesma sabina. En o suelo podemos trobar Arctostaphyllos uva ursi crassifolia y a vegatas un estrato muscinal poco denso.

Bibliografía

• Emilio Blanco Castro et al.: Los bosques ibericos una interpretación geobotanica. Editorial Planeta.

• Datos: Q13050262