Magnesio
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
O magnesio (elemento quimico de simbolo: Mg, y numero atomico 12) ye un metal blanco brillant, d'aspecto parellán a lo de l'archent. Ye o ueiteno elemento mas abundant en a naturaleza. A suya densidat ye 1,74 y por tanto a menor de toz os metals, fueras d'o litio y o berilio. Se funde a 650 °C y se volatiliza a 1.120 °C.
En aire seco se mantiene inalterable pero en presencia d'humedat se cubre d'una capa d'oxido que evita a oxidación posterior. Con o fuego s'enciende con una flama blanca muit viva.
Ye dúctil y maleable, y resulta imprescindible ta a fabricación d'aliacions licheras, muit útils ta l'aviación.
Usos
[editar | modificar o codigo]
Os compuestos de magnesio, en primeras l'oxido de magnesio, son emplegatos mas que mas como material refractario en os furnos ta fabricar fierro y acero, metals no ferrosos, vidre, y cimento. L'oxido de magnesio chunto con atros components s'emplega tamién en l'agricultura, y en as industrias quimicas y d'a construcción. aliau con l'aluminio s'usa ta fabricar envases de lata. As aliacions de magnesio son usatas tamién en components estructurals d'os automobils y de maquinaria. Un uso d'iste metal ye tamién a eliminación d'os sulfuros en o fierro y l'acero.
Atros usos son:
- Aditivo en propelents convencionals.
- Obtención de fundición nodular (Fe-Si-Mg).
- Achent reductor en a obtención d'uranio y atros metals a partir d'as suyas sals.
- O hidroxido de magnesio(Mg(OH)2, tamién dito leit de magnesia), o cloruro de magnesio (MgCl2), o sulfato de magnesio (MgSO4, u sals Epsom) y o citrato s'emplegan en Medicina pa la fabricación de medecinas.
- O polvo de carbonato de magnesio (MgCO3) ye emplegato por os atletas, como chimnastas y debantadors de peso, ta amillorar l'adherencia d'os obchectos. Os escaladors lo fan servir ta amillorar l'adherencia d'as mans a la roca.
- Atros usos encluyen flaixes fotograficos, pirotecnia y bombas incendiarias.
Rol biolochico
[editar | modificar o codigo]O magnesio ye important ta a vida, tanto l'animal como a vechetal. A clorofila ye una substancia complexa de porfirina y magnesio que interviene en a fotosintesi.
Ye un elemento quimico esencial ta l'hombre; a mayor parti d'o magnesio se troba en os uesos y os suyos ions exercen papels d'importancia en l'actividat de muitas coenzimas y en reaccions que penden de l'ATP. Tamién exerce un papel estructural, o ión de Mg2+ tien una función estabilizadora d'a estructura de cadenas d'ADN y ARN.
En función d'o peso y l'altaria, a cantidat diaria recomendata ye de 300-350 mg, cantidat que puet obtener-se facilment ya que se troba en a mayoría d'os alimentos, estando as fuellas verdas d'as hortalicias especialment ricas en magnesio.
Contenito en magnesio de bel alimento;
- Espinayes (1/2 taza) = 80 mg (miligramos)
- Leit descremata (1 taza) = 40 mg
Historia
[editar | modificar o codigo]O nombre procede de magnesia, que en griego designaba una rechión de Tesalia. L'anglés Joseph Black, reconoixió o magnesio como un elemento quimico en 1755. En 1808 Sir Humphrey Davey obtenió metal puro por meyo d'electrolisi d'una mezcla de magnesia y Oxido de mercurio (II) (HgO)
Abundancia y obtención
[editar | modificar o codigo]O magnesio ye o seteno elemento mas abundant en a crosta terrestre, manimenos no se troba libre, encara que dentra en a composición de mas de 60 minerals, estando os mas importants industrialment os depositos de dolomía, magnesita, brueta, carnalita y olivina.
En os Estaus Unius o metal s'obtiene prencipalment por electrolisi d'o cloruro de magnesio (MgCl2), obtenito de saleras y de l'augua d'a mar, metodo que ya emplegaba Bunsen;
Isotopos
[editar | modificar o codigo]O magnesio-26 ye un isotopo estable que s'emplega en a datación cheolochica, igual que l'Al-26. En as inclusions ricas en calcio y aluminio (CAI en anglés) de bel meteorito, os obchectos mas antigos d'o sistema solar, s'han trobat cantidaz de Mg-26 mayors d'as asperatas que s'atribuyen a la desintegración de l'Al-26. Istos obchectos, cuan s'han desprendito en etapas primerencas d'a formación d'as planetas y asteroides no han pasato por os procesos cheolochicos que fan desapareixer as estructuras condriticas (formatas a partir d'as inclusions) y por tanto alzan información sobre a edat d'o sistema solar.
En os estudios se compararoron os ratios Mg-26/Mg-24 y Al-27/Mg-24, ta determinar asinas, de forma indirecta, a relación Al-26/A-27 d'a muestra inicial en o momento en que ista se deseparó d'as rechions de polvo d'a nebulosa presolar, a partir d'a que se formó o nuestro sistema solar.
Precaucions
[editar | modificar o codigo]O magnesio ye extremadament inflamable, mas que mas si ye polvorizato. Reacciona exotermicament y a escape en contacto con aire u augua por o que ha de manipoliar-se con precaución. O fuego, de producir-se, no s'habrá de mirar d'amortar con augua; nomás un extintor ta fuegos de tipo D (sodio, aluminio, reactivos,...) u sía extintors de polvo especifico u CO2.
Referencias
[editar | modificar o codigo]- ↑ Bernath, P. F., Black, J. H., & Brault, J. W. (1985). "The spectrum of magnesium hydride". Astrophysical Journal 298.
Vinclos externos
[editar | modificar o codigo]
| Control d'autoridaz |
|
|---|
