Good bye, Lenin!

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

Good bye, Lenin!
Ficha tecnica
Dirección	Wolfgang Becker
Producción	Stefan Arndt
Guión	Wolfgang Becker Bernd Lichtenberg
Musica	Yann Tiersen Claire Pichet
Fotografía	Martin Kukula
Actors	Daniel Brühl Katrin Sass Maria Simon Chulpan Khamatova Florian Lukas Alexander Veyer
Datos y cifras
País(es)	Alemanya
Anyo	2003
Chenero	Comedia dramatica
Durada	121 min.
Idioma(s)	Alemán
Companyías
Distribución	Sony Pictures Classics
Presupuesto	4.800.000 euros
Ficha en IMDb

Good Bye, Lenin! (títol orichinal en anglés en Alemanya y estrenata con ixe mesto títol en Aragón) ye una cinta alemana de l'anyo 2003, endrezato por Wolfgang Becker, y o suyo reparto incluye a Daniel Brühl, Katrin Sass, Chulpan Khamatova, y Maria Simón.

A gran parti d'as escenas fuón presas en a Karl-Marx-Allee en a ciudat alemana de Berlín y arredol d'as Plattenbauten (edificios semilars a los bloques impersonals construitos en Aragón mientres o franquismo) amán de l'Alexanderplatz.

Sinopsi

Octubre de 1989 no yera o millor inte ta dentrar en coma vivindo en Republica Democratica Alemana, y ixo ye chusto lo que le pasa a la mai de Alexander Kerner (Daniel Brühl), Christiane, una muller orgüellosa d'as suyas ideyas socialistas y dirichent d'o Sozialistische Einheitspartei Deutschlands (Partito Socialista Unificato) entregata a la politica dimpues d'a marcha d'o suyo hombre a Alemanya Occidental, que tresbate l'esmo en vier a o suyo fillo ficato en disturbios a radiz d'una manifestación en contra d'Erich Honecker, con a policía de l'estato que tanto almira. Alex se veye enrolato en una complicata situación cuan a suya mai sale d'o coma ueito meses dimpués. Garra atra cosa podría afectar tanto a la suya mai como a cayita d'o Muro de Berlín y a victoria d'o capitalismo en a suya quiesta Alemanya Oriental, y ya advertiu por o medico de deixar-la reposar y sin grans disgustos, ta evitar una posible recayita, ocultará a la suya mai que o Muro de Berlín ha caito mientres ella yera malauta. Ta ixo, monta una serie de falsos telediarios, con aduya d'o suyo amigo Denis, en os que escribira a suya propia historia d'o país.

Por ixo, ta salvar a la suya mai, Alex convierte o piso familiar en una isla anclata en o pasato, una mena de zaguer bastión d'o socialismo en o que la suya mai vive creyendo que brenca no ha cambeato. O que prencipia como una mentira piadosa se transforma en una gran estafa cuan a chirmana d'Alex y bels vecins s'encargan de mantener a farsa ta que a mai d'Alex contine creyendo que brenca no heba cambeato. Una d'ellas ye Lara, una enfermera sovietica que Alex conquista mientres o coma d'a suya mai. Finalment muere sabendo por Lara, en una d'as escenas antes de vier o zaguer telediario que ha parau o suyo fillo, que Alemania ye agora un solo país y que o muro ye estato ubierto.

Paralela a la pelicula, tamien se planteya a busca d'o pai d'Alex.

Curiosidaz

• O director ye Wolfgang Becker (Renania d'o Norte-Westfalia, 1954); a filmografía d'o cual se compone d'as cintas Schmetterlinge (1987) y Das Leben ist eine Baustelle (1997) entre atras. Tamien ye l'autor de l'episodio d'a serie de television Tatort titulato Blutwurstwalzer (1991) y d'o telefilm Kinderspiele (1992).
• Os suyos protagonistas son Daniel Brühl, Katrin Saβ, Chulpan Jamatova y a cuasi debutant Maria Simon.
• O guión ye escrito por o propio director en colaboracion con o debutant Bend Lichtenberg.
• O director de fotografía ye Martin Kukula, que ya treballo con Becker en Das Leben ist eine Baustelle, y a banda sonora ye compuesta por Yann Tiersen (Amélie).
• Un d'os personaches secundarios en a trama ye un taxista dito Stefan Walz, que estió astronauta mientres a RDA. O personache ye inspirato en l'astronauta y mito d'a RDA Sigmund Jähn, encara que iste no remató como taxista dimpues d'a reunificación, sino como consultor d'a DLR (Deutsches Zentrum für Luft- und Raumfahrt e.V. u Achencia Espacial Alemana), heredera de l'Achencia de l'antiga Alemanya Oriental, y mas tardi de l'Achencia Espacial Europea.
• O piso d'a mai d'Alex ye ubicato en o districto berlinés de Friedrichschain y gran parti d'as escenas fuón presas astí, mesmo una d'as mas importants; cuan a mai d'Alex decide de salir d'o piso; manimenos Friedrichshain ye nomás mencionato por Denis que en as noticias montatas dimpués d'a escena.
• Cuan Alex chunto con o suyo amigo paran a cambra ta que la suya mai torne y lo trobe tot igual, a musica de fundo y a velocidat d'o film ye a mesma que cuan Alex en A Clockwork Orange tien relacions con dos mesachas en a suya cambra.
• L'edificio que Alex y Denis emplegan en o suyo informe sobre a Coca Cola ye o mesmo que Billy Wilder fació servir en a cinta One, Two, Three. (1961).
• S'insertó material d'archivo en un contexto esferent y manipulato dichitalment.
• En dos escenas Denis leba una camiseta negra con simbols verdes, parellanos a o codigo de The Matrix. Una posible explicación ye que o disenyo ye una ideya d'o propio Dennis ta una cinta, y que Matrix, en consecuencia, ye socialista como a Coca Cola, seguntes una broma d'o filme.

Errors

• Cuan Alex coloca en viellos embalaches d'a RDA os nuevos productos de birolla que han prencipiato a vender-se en Berlín oriental, se veye un paquet de Jacobs Kaffee. O logo d'o paquet no ye o logotipo d'ixas envueltas sino una versión mas nueva de l'anyo 2000.
• Cuan os instaladors d'antenas parabolicas se miran un partito de fútbol ta comprebar o funcionamiento de l'antena, a imachen corresponde a l'Eurocopa de 1996, mientres que a escena ye de 1990.
• Un d'os sinyals alemans que se veyen en a celebración d'a victoria de l'equipo alemán en o Mundial ye d'una decada dimpues d'a Reunificación.
• En una vesita d'Alex a un supermercato dimpués d'a Reunificación d'Alemanya, una treballadora ye etiquetando latas de Pepsi con un disenyo que no s'adoptaría dica bels anyos dimpués, bien dentrados os anyos 1990.
• Cuan Denis l'amuestra a Alexander a cinta d'un casorio, aquel leva mesa una camiseta con motivos (plevia dichital) de The Matrix, un filme estrenato en 1999.

Premios

• Se presentó en o Festival Internacional de Cine de Berlín de 2003, an que consiguió o Premio Ánchel Azul a la millor cinta europea.
• Ganó lo Premio Especial d'o Churato en o Semana Internacional de Cine de Valladolit en 2003.
• Consiguió os Premios d'o Cine Europeu 2003 a Millor Pelicula, Millor Actor (Daniel Brühl) y Millor Guionista, asinas como toz os premios d'o publico (Millor Director, Millor Actor y Millor Actriz, iste zaguero ta Katrin Saß).

Veiga-se tamien

• Die fetten Jahre sind vorbei.

Vinclos externos

• (en) Pachina web oficial d'a cinta.
• (en) Good bye, Lenin! en IMDb.