Fútbol

De Biquipedia
Ir ta: navego, busca
Articlo d'os 1000
Logo olimpico d'o fútbol.
Partido de fútbol.

O fútbol, conoixito tamién como balonpie, ye un esporte d'equipe practicato a l'aire libre entre dos equipes d'once chugadors cadagún con a finalidat de ficar a pilota con os pietz en a portería de l'equipe contrario.

O chuego muderno fue creyato en Anglaterra dimpués d'a formación d'a Football Association, qualas reglas de chuego de 1863 son l'alazet d'o esporte en l'actualidat. L'organismo rector d'o fútbol ye a Fédération Internationale de Football Association, más conoixita por o suyo acronimo FIFA. A competición internacional de fútbol más prestichiosa ye a Copa Mundial d'a FIFA, reyalizata cada quatre anyos.

Actualment o fútbol ye más que un esporte. Ye amás d'un negocio y un espectaclo, un fenomen social.


Historia[editar | editar código]

Antecedents[editar | editar código]

Dende l'antiguedat os homes han chugato a chuegos con pilotas, os mas antigos d'os pareixitos a o fútbol que bi ha referencias son o ts'uh Kúh (en aragonés, chutar a pilota) descrito en un manual de exercicios militars d'a Dinastía Han en os sieglos III aC y II aC, y que consistía en chutar una pilota con os pietz ta una rete feita de diferents materials, con una variant d'o chuego en que bi heba de sortear bells chugadors. Cinco sieglos mas tarde en Chapón ye documentato un chuego anomenato kemari, en o que se teneba que mantener una pilota en l'aire pasando-la entre os chugadors.

O fútbol moderno[editar | editar código]

O fútbol actual fue establito en Anglaterra con a creyación d'a The Football Association en l'anyo 1863 a on s'establieron as bases d'as reglas actuals preniendo como base as d'o Codigo Cambridge pero fendo o cambeyo en d'os reglas, a limitación d'uso d'as mans ta transladar a pilota y a prohibición d'o contacto fisico brusco ta quitar a pilota a os rivals.

Una vegata establitas as reglas principiaron as competicions, en l'anyo 1871 la FA (Football Association) crea un torneyo que disputaron 12 d'os 50 equipes que yeran parti d'ella y que finalment estaría anomenato FA Cup (Copa d'Anglaterra) y que o suyo ganador estió l'equipe Wanderers FC. Un anyo dimpués o 30 de noviembre de 1872, Escocia y Anglaterra parteciparon en o primer partito oficial entre seleccions nacionals. O partito se chugó en o Hamilton Crescent, actual campo de críquet, en Partick, y terminó con marcador de empate a cero. Bells anyos dimpués entre chinero y marzo de 1884 se organizó a primera edición d'o British Home Championship, que dica l'anyo 1984 en que se fizo a zaguera edición estió a competición internacional mas antigua. A primera competición con formato de liga se disputó bells anyos dimpués, en 1888 y 1889 con a creyación d'a Football League en a que parteciporon 12 equipes afiliatos a la FA, y o ganador estió Preston North End Football Club. Ista competición estió consiederata como a primera división d'Anglaterra y se chugó dica l'anyo 1991, l'anyo siguient estió sustituita por a Premier League.

Fútbol en Aragón[editar | editar código]

Se veiga organización d'o fútbol en Aragón y a Categoría principal: Fútbol en Aragón.

O fútbol en Aragón ye organizato por a Federación Aragonesa de Fútbol, anque os clubs de mayor ran s'integran en competicions organizatas por a Federación Espanyola de Fútbol.

En a categoría masculina os clubs aragoneses s'integran en una escala de nueu categorías. As quatro primeras son organizatas por a Federación Espanyola de Fútbol. Dende a cinquena lo son por a Federación Aragonesa de Fútbol. As tres primeras categorías son profesionals. A quatrena categoría combina clubs semi-profesionals u amateurs y dende a cinquena totz os clubs son amateurs.

Tradicionalment l'equipe mas important, con millor palmarés y con mas seguidors ye o Reyal Zaragoza, anque actualment atros equipes como a SD Uesca y o CD Ebro que bi han puyato de categoría, y están actualment en a mas alta categoría d'a suya historia, han puyato tamién o suyo numero d'aficionatos.

O clubs aragoneses femenins de fútbol s'integran en una escala de tres categorías, organizata de forma pareixita a la masculina, pero con menos categorías, debito a la menor existencia de clubs. Todas as categorías son amateurs, anque a primera tien bells clubs semi-profesionals.

L'equipe femenín mas important d'Aragón ye o Transporte Alcaine que dende a temporata 2004/2005 chuga en a Primera División d'Espanya. Tamién bi ha de destacar-se a sección femenina d'o Club Deportivo Peñas Oscenses que chugó dos temporatas en a maxima categoría espanyola y actualment partecipa en a segunda división espanyola.

Se veiga tamién[editar | editar código]

Vinclos externos[editar | editar código]