Machairodontinae

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Machairodontinae
Reconstrucción infografica de l'aspecto que podeba tener un Smilodon fatalis en vida.
Denominacions populars
Macairodontins
Rechistro fósil	Dende o Mioceno dica o Pleistoceno
Clasificación cientifica
Dominio:	Eukaryota
Reino:	Animalia
Filo:	Chordata
Clase:	Mammalia
Orden:	Carnivora
Suborden:	Feliformia
Familia:	Felidae
Subfamilia:	Machairodontinae
Descripción
Machairodontinae GILL, 1872

Os macairodontins, cientificament Machairodontinae (en latín), fuen una subfamilia d'a familia d'os felidos de gran mida que en l'actualidat se troba extinctos. Se caracterizaban por a mida d'os dients canins superiors, desenvolicaus dica protruir como catirons difuera d'a boca, razón por a cual a sobén se los conoix con o nombre popular de «felidos de dients de sabre».

Descripción

Todas as especies de macairodontins conoixidas yeran felidos de mida gran, semellants a cualques especies de panterins modernos. Teneban a coda mas curta que en a mayoría de felidos actuals, y as patas zagueras mas curtas que as devanteras, por o que se crei que debeban haber sacrificau bella cosa d'achilidat y velocidat en favor d'una mayor fuerza, en comparanza con os atros grupos de felidos consideraus.

A suya principal caracteristica anatomica, a mas visible y a que les ha dau as suyas diferents denominacions populars, ye a mida d'os canins superiors. Istos dients son mas desenvolicaus en os adultos que en a resta de felidos conoixius, y en cuasi todas as especies yeran tan grans que debeban amaneixer por difuera d'os labios de l'animal en vida. En paralelo a ixes dients, os macairodontins sufrión una modificación de l'articulación temporo-mandibular que les permitiba ubrir a boca en un anglo superior a la resta de felidos, probablement con a sola razón que de liberar totalment a mandibula inferior d'os canins superiors tan granizos, pa poder mosigar.

O conchunto d'as diferenciacions morfolochicas d'o grupo fa pensar que os macairodontins yeran felidos especializaus en fer un tipo de caza que no se fa entre os suyos parients actuals. Se crei que os macairodontins depredaban principalment sobre especies de mamiferos mas grans que ellos, a os qui debeban inflichir feridas profundas con os canins y posiblement se retiraban dimpués a distancia prudencial, tot reducindo o tiempo de luita cuerpo-a-cuerpo a lo minimo.

Historia evolutiva

Grau d'ubertura de boca en un macairodontino d'o chenero *Smilodon*.

Un estudio chenetico de l'anyo 2005 trobó que as orichens d'o linache d'os macairodontins yeran diferenciadas d'a resta d'os Felidae modernos bien luego en a escala evolutiva. Isto significa que o primer antipasau d'o grupo se deseparó luego, en a historia evolutiva conchunta d'os felidos, perdendo-se a-escape o vinclo chenetico con o tronco principal (bien luego deixó d'haber-ie hibridación).^[1]

Os macairodontins entre éls, manimenos, sí que mantienen (u se considera que mantienen) una homocheneidat con variación acceptable, o que chustificaría d'alcuerdo con os autors d'o estudio mantener una subfamilia clasificativa solo que pa éls.^[1]

Historicament s'heba considerau tres tribus adintro d'a subfamilia Machairodontinae: Metailurini u metailurinins, Machairodontini u macairodontinins y Smilodontini u smilodontinins. Actualment os metailurinins se clasifican adintro d'os felins y no pas como macairodontins, considerando-se que a mida levement superior d'os canins d'ixes animals se deben a analochía morfolochica por converchencia adaptativa, y no pas a una verdatera relación filetica.

Tribu Machairodontini

Chenero Lokotujnailurus.
Chenero Homotherium.
Chenero Xenosmilus.
Chenero Miomachairodus.
Chenero Machairodus.

Tribu Smilodontini

Chenero Smilodon.
Chenero Paramachairodus.
Chenero Megantereon.

Extinción

En cheneral, se considera que a reducción d'as presas de mida gran d'as que dependeban ye entre as causas d'a suya extinción. As zagueras especies de macairodontins vivas fuen miembros d'os cheneros Smilodon y Homotherium, que desapareixón en America d'o Norte y o norte d'Europa respectivament, en o Pleistoceno tardano, fa bels 11.000 anyos, por o que heban coexistiu con l'hombre.

Se veiga tamién

Referencias

↑ ^1,0 ^1,1 (en) Lars W. van den Hoek Ostende, Michael Morlo, Doris Nagel. Fossils explained 52 Majestic killers: the sabre-toothed cats. Blackwell Publishing Ltd, Geology Today, Vol. 22, Num. 4, chulio-agosto de 2006 Abstract en linia.