A Cort
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
- Iste articlo ye sobre a Cort. Ta atros emplegos de Cort se veiga Cort (desambigación).
| A Cort | |
| Lugar d'Aragón | |
 Casas de a Cort dende o restaurant d'a localidat. | |
| Entidat • País • Provincia • Comarca • Municipio |
Lugar Aragón.svg){kind=small} UescaRibagorza La Foradada d'el Toscar |
| Partiu chudicial | Boltanya |
| Población • Total |
5 hab. (2018) |
| Altaria • Meyana |
958 m. |
| Distancia • 115 km • 32 km • 9 km |
enta Uesca enta Graus enta Murillo de Llena |
| Codigo postal | 22452 |
| Parroquial • Diocesi • Arcipestrau |
Balbastro-Monzón Sobrarbe-Ribagorza |
| Coordenadas | |
A Cort («la Cort» en aragonés ribagorzano; /a'kor/, /la'kor/; en castellano y oficialment «Lacort») ye un lugar aragonés d'o municipio de a La Foradada d'el Toscar, en a comarca de Ribagorza y a provincia de Uesca. A suya población ye de 5 habitants (2018[1]).
Cheografía
O lugar d'a Cort se troba a 958 metros d'altaria sobre o nivel d'a mar, amán d'o collau d'a Foradada por a suya baixant de a Fueva. Con l'adaptación d'a carretera que atraviesa o dito puerto, actual Nacional N-260, se troba alto u baixo a 1 Km d'o punto de coronación d'o puerto.
A Cort ye en as garras d'a sierra Ferrera, en dominando a valleta d'un barranquet (a la sazón, «barranco de a Cort») que ye afluent d'o río d'a Nata. En chunto con as Corz que tamién ye pedanía d'a Foradada y se troba por l'altra man d'un sarrau (que fa que no s'albiren d'entre ellos) son os dos solos nuclios que a Ribagorza tiene fuera d'a cuenca de l'Esera por toda a metat occidental d'a comarca.
Por a suya posición cheografica, tanto a Cort como as Corz fan parte efectiva d'a depresión y subcomarca sobrarbenca que ye a Fueva, participando en bels d'os suyos costumbres y tradicions, como por eixemplo a romería anyal ta la Virchen de Bruís.
As poblacions mas amán de a Cort son todas d'o municipio d'a Fueva: a Cabezonada a poquet mas de 2 Km y Sant Per a 3, aldea y cabecera de l'antigo municipio d'o Toledo d'a Nata respectivament. Ta Fuent de Campo a distancia ye de menos de 5 km, y l'Atiart y Sant Chuan, en o sarrau d'o Toledo, tamién son en a zona.
Economía
A economía en a Cort tradicionalment s'heba relacionau con a ganadería y, en menor mesura, con l'agricultura que se practicaba en faixas, pus a localidat careix de fincas de gran extensión por a suya posición tan elevada.
En l'actualidat en a Cort i ha activos un restaurant amán d'a carretera nacional y una casa de turismo rural.
Toponimia
O nombre de a Cort ye una clara referencia a una cort ta'l bestiar (d'o latín < *COHORS, *COHORTIS). Iste tipo de corrals, muit populars en a montanya altoaragonesa, sirven ta amallatar as ramadas en os puestos de paso. Bels autors han sinyalau que a palabra «cort» tamién ha designau historicament cualques tipos de faciendas rurals y propiedaz sinyorials rusticas[2] en Aragón.
L'uso de l'articlo inicial en o nombre pareix que podría haber variau con os anyos. En o sieglo XV i ha indicios que fan pensar que encara se podría haber emplegau a forma completa -con L-, porque en o Fogache de 1495 un d'os vecinos de a Foradada y as suyas aldeyas se feba decir Johan de la Cort, entendendo-se que podría estar vecino en a Cort.
Parla
A parla d'a Cort s'estudió en os anyos 1990, drentro d'un estudio sobre a parla d'a Fueva que fizon Fernando Romanos y F. Sánchez. A suya adscripción ye plenament fovana,[3] y anque o lugar perteneixca a un municipio con cabecera en a comarca de Ribagorza, no se considera substancialment diferent de a resta de lugars de o Toledo d'a Nata y baixo Penyas en cheneral.[3] O sinyor Lázaro de Casa Lacort estió a persona enquestada d'iste lugar (agosto de 1995).
Demografía
| ||||||||||||||||||
| ||||||||||||||||||
| ||||||||||||||||||
| ||||||||||||||||||
| ||||||||||||||||||
| 1990- : población de dreito. Fuent: Intercensal en l'INE, Series de población en l'INE y Relación d'unidatz poblacionals en l'INE. | ||||||||||||||||||
Referencias
- ↑ (es) «Lacort» en a subpachina «Relación de unidades poblacionales» d'o Instituto Nacional de Estadística, consultada o 21 de marzo de 2012.
- ↑ (es) Estudio sobre os toponimos con «Cort» en Aragón, consultau o 24 d'aviento de 2010.
- ↑ 3,0 3,1 (es) BLAS GABARDA, Fernando et ROMANOS HERNANDO, Fernando, El Aragonés de Baixo Peñas; Gara d'Edizions. Zaragoza, 2005. ISBN 84-8094-054-9
| Lugars d'o municipio de la Foradada d'el Toscar | |
|---|---|
| As Colladas | Esplluga | La Foradada d'el Toscar | A Cort | As Cortz | Murillo de Llena | Navarri | Senz | Vacamorta | Víu |