Arthropoda
De Biquipedia
| Arthropoda | ||||||
|---|---|---|---|---|---|---|
 clases d'Artropodos |
||||||
| Clasificazión zentifica | ||||||
|
Os arthropoda u artropodos son o phyllum d'o Reino Animal que presenta o lumero d'espezies més grant, son acuaticos u terrestres, olotrofos, necrofagos u parasitos, pero a mayoría erbiboros.
Contenius |
[editar] Morfolochía
Presentan simetría bilateral, cuerpo segmentato, pero a diferenzia d'os anelidos os segmentos se presentan en grupos (ditos tagmas), y o zeloma ye reduzito en l'adulto. Os diferents grupos de segmentos u tagmas son espezializatos en diferents funzions e presentan apendizes diferenziatos pa una clara dibisión d'o treballo (por exemplo pueden estar patas, antenas, mandibulas, etz...).
Bi ha un exoesqueleto (cuticla) segregato por a epidermis e formato por tres napas laminatas: epicuticla, exocuticla (de proteínas e lipidos) e endocuticla, (més dobla e formata por quitina e proteínas). A quitina ye un polisacarido nitrochenato duro, lichero, resistent e insoluble a l'augua, alcalis u azetos febles. En beluns o exoesqueleto tien entrants (apodemas), pa que s'intesen os musclos.
A cada segmento li corresponden 2 apendizes pars, encara que a begatas han desaparexito u s'han modificato. Con un exoesqueleto asinas de resistent un apendiz sería inmobil, pero os artropodos pueden mober-los grazias a l'articulazión: os apendizes son palancas bueitas con musclos boluntarios e pelos sensitibos, y encara que en a eboluzión s'ha produzito una dibersidat a saber-lo de formas, siempre bi ha dos sezions separadas por una articulazión de carauter primario: -Sezión coxal -Sezión d'o cabo.
O exoesqueleto da protezión, millora a locomozión, e a més proteche d'a desecazión, e ixo ha permeso a muitos artropodos de colonizar o meyo terreste, pero no sin incombenients, como por exemplo o creximiento e a mida.
O exoesqueleto ye un obstaclo pa o creximiento, e ixo se resuelbe con o creximiento a interbalos, produzindo-se o abandono d'una cuticla biella e o endurimiento d'una cuticula nueba. Por un regular bi ha 4-6 mudas. O exoesqueleto tamién imposa limitazions a la mida, e por ixo no pueden estar muito grants.
En o exoesqueleto puet aber-ie carbonato calzico, pigmentos (melanina, carotenoides, cromoproteidos, ezt...) e pueden tener e pelos (a begatas sensitibos), punchas e sedas.
Bi ha un sistema muscular complexo inserto en o exoesqueleto, con musclos estriatos, pa azions rapedas e lisos pa mobimientos biszerals.
A sezión coxal s'implanta en a membrana pleural, podendo estar simple u subdibidirse en protopodio, subcoxa e coxa, y en atros tres articlos.
As estruturas d'a base de l'apéndiz pueden adibir-se a las pleuras como escleritos pleurals. A soben o protopodio leba exitos (epidopoditos), por un regular respiratorios (branquias) y enditos (gnatobases si tienen funzión masticadora).
A sezión d'o cabo (telopodito) ye més bariable que l'anterior, car s'ha adautato a muitas funzión seguntes os grupos. En beluns s'ha dibidito en 2 partes: femoral e tibial, cadaguna formata por bels podomeros, en atros s'ha dibidito en tres partes: femoral, patelar e tibial.
A respirazión puet estar cutania, branquial, traquial e dica pulmonar.
O sistema zirculatorio ye deribato de l'anelidiano pero simplificato. A zirculazión no ye ubierta, e bi ha un conchunto de lacunas plenando entresillos e senos que forman o emozele. No bi ha basos berdaders, de fueras d'un corazón dorsal, tubular e un sistema arterial muito reduzito que no ye un poquet desembolicato que en os de respirazión branquial. O corazón ye en reyalidat un baso pulsatil con dos foratos d'almisión (ostiolos) con balbulas. A emolinfa zercula dende dezaga ta debant, sale d'o corazón por una aorta anterior, e as arterias la leban a los senos d'o emozele. A emolinfa zercula por o emozele entre as biszeras, tornando a la cambra pericardica y entrando en o corazón por os ostiolos, que tienen balbulas que no dixan que se'n torne ta dezaga.
A sistole se consigue por contrazión cardiaca, a diastole por contrazión de musclos de l'aparato locomotor.
L'aparato dichestibo ye completo, a boca tien apendizes, como mandibulas e maxilas, pa ensopinar e masticar, e palpos pa tastar. Os apendizes d'a boca son adautatos a diferents formas d'alimentazión.
O sistema nerbioso ye parexito a lo d'os anelidos, encara que con ganglios més grans e organs d'os sentitos més desembolicatos. Ye formato por un cerebro ganglionar dorsal que coneuta a trabiés d'un collar periesofachico con una doble catena nerbiosa bentral con 1 par de ganglios por segmento, con estructura en forma d'escalera. En os crustazios, insectos e miriapodos no bi ha que una cadena bentral de ganglios, produto d'a fusión d'os dos cordons nerbiosos, que encara pueden diferenziar-sen.
Presentan patrons d'intelichenzia complexos en os que l'aprendizache chuega un paper important. Bi ha gran desembolique d'os organs sensorials, dende sensilas con funzión tactil, olfatiba, auditiba, quimica e d'equilibrio dica o guello multifazetato.
Por un regular dioicos, con dimorfismo sexual e organs e conductos reproductos pars, Por un regular con fecundazión interna. Pueden estar obiparos u obobibiparos. A soben bi ha metamorfosis. Bi ha casos de partenochenesis.
[editar] Clasificazión
A clasificazión en clases ye clara pero agrupar ixas clases en superclases e subphyllum ye controbertito, sobre tot por o que fa a las clases fosils. Tamién bi ha unas clases que encara que sigan a man d'os artropodos berdaders no tienen totas as carauteristicas d'os artropodos, (onicoforos por exemplo).
- Protoarthropoda: no presentan totas as carauteristicas d'os artropodos, por exemplo os onicoforos.
- Trilobitomorpha: Trilobites e e atros grupos fosils no tan conoxitos.
- Quelicerata: con quelizeros
- Proboscifera: con os picnogonidos se duda si incluyir-los entre os anteriors
- Branquiata: con los crustazios.
- Traqueata: fueras d'os insectos as atras clases responden a la morfolochía d'o miriapodo
- Arquilopodos
- Quilópodos
- Diplopodos
- Paurópodos
- Sinfilos
- Insectos
[editar] Importanzia economica, sanitaria e alimentizia d'os artropodos
Dentro d'os artropodos bi ha exemplars d'intrés alimentizio, (marisco) d'intrés economico, (por os produtos que produzen u por os que destruyen), e d'intrés sanitario (foco d'infezions u por estar animals de fizada berenosa).
[editar] Alimentazión
Muitos crustazios se minchan, espezialment os decapodos, (cangrillos), tenendo importanzia economica os cangrillos marins. Tamién se minchan os perzebes. Minchar insectos u aracnidos no ye bien bisto en a cultura ozidental, pero bi ha culturas en atros países on se minchan dreitament os insectos (por exemplo os aborichens australians se minchan as formigas-bota y en atros países se minchan os escarbachos u os grillos de mida azeutable, e dica as tarantulas.
Encara que os insectos no se minchen en ozident, si que se consume a miel que produzen as abellas, estando l'apicultura una autubidat antiga e muito estendita. Os crustazions planctonicos, que no se minchan tradizionalment pueden estar endicadors de bancos de pesca.
Bi ha insectos que fizan con o suyo fizón (abellas, biespas), as arañas e ziengarras no tienen fizón e fizan con os quelizeros e forziclas respeutibament. Os arraclaus encara que sigan aracnidos fizan con un fizón e no pas con os quelizeros.
A fizadura d'os mosquitos ye con l'aparato bucal e no con garra fizón e puet trasmitir microbios u nematodos que causan malautías (malaria, malautía d'o sueño, elefantitis, etz...). Bi ha crustazios que pueden agüespar nematodos e platelmintos parasitos de l'ombre.
En agricultura os insectos se tienen en cuenta por o poder de esdebenir plagas. Ya en a Biblia menzionan as plagas de langostos. Atros insectos que pueden estar plaga son a mosca d'a fruita, o trips, as chinches, os polecons, a prozesionaria, o piollo de san Chusé, o escarbacho d'a pataca e as polillas. Pero l'ombre puet fer serbir un insecto contra atro, (depredadors u parasitoides), como ye o caso d'as biespas.
Bi ha artropodos con importanzia en a industria u artesanía produzindo sustanzias d'intrés comerzial. As abellas a més de produzir miel produzen zera. Os lepidoptero Bombus produze seda (cuco d'a seda). Un producto industrial produzito por un insecto ye o carmín e, d'atras espezies, se'n obtién laca. D'os meloidos se puet obtener un afrodisiaco (spanish fly).
Os insectos son eslabons intermediarios de catenas alimentarias que tienen en o suyo cabalto espezies utils pa l'ombre, tamién ye important en ixo a funzión polinizadora d'os insectos.
