Fizón
De Biquipedia
Se clama fizón á l'orgán u parte de lo cuerpo esmolata present en bels animals e plantas que por un regular espulsa bel tipo de vereno (por un regular dimpués d'estar clabato en la pilleta d'atro animal) u da una descarga eletrica. Un fizón verenoso ye diferent d'atros organs punchans en que se claba el mesmo, a esferenzia de las diens que se claban por la fuerza d'as mandibulas, u de las punchas que se clavan por azión de la bitima.
[editar] Zoolochía
Lo prinzipal tipo de fizón ye un orgán esmolato d'ataque u esfensa, en espezial cuan ye coneutado con una glandula de vereno, e adautado pa fer feridas punchando, como por exemplo lo fizón codal d'un arraclau. Entre los mamifers, l'unico que tien un fizón verenoso ye l'ornitorrinco masclo.
Lo fizión gosa estar en la parte de dezaga de l'animal, á man de la coda (si en tien). Entre los animals con fizón destacan las abellas e biespas. Lo fizón de l'arraclau no ye omologo con lo de los inseutos, ye produto de la comberchenzia ebolutiba.
Entre las abellas meleras (e nomás que entre ellas) lo fizón, un obipositor modificato como en atros imenopteros picadors, tián forma d'anzuelo, metendo-se en la carne de la bitima dimpués de soltar-se de lo cuerpo de l'abella, lo que fa que muera por peritonitis en pocos minutos. Lo fizón tien lo suyo propio ganglio (esenzialment un cerebro en miniatura) que li permite afondar en la carne de la bitima e liberar vereno por bels minutos. La custión de cómo tal rasgo ha puesto eboluzionar, cuan ye un una desbentacha clara para l'endibiduo, queda resuelta cuan se bei que los mamifers predators pueden desfer fazilment una colonia completa si no lis se fa fuyir. Si la colonia ye desfeita, las obreras, que son esterils, morirán sienes de deszendencia, asinas que nomás que con la esfensa de la colonia puede conseguir que lurs chens se trasmetan. Las puntas de los fizons aseguran que un ataque d'una abella nomás ye suizida si la bitima ye un mamifer, podendo fizar á atras abellas meleras (en batallas intercolonials) de contino. Asinas, baxo condizions naturals la traza suizida de lo fizón de l'abella nomás entra en chuego si l'atacant puet desfer tota la colonia. Lo fizón de totas las atras abellas e biespas no tien ixa punta, por lo que puet emplegar-se pa fizar a mamifers de contino, (u, més prezisament, fizar a mamifers y continar picando atros diyas)
Lo fizón u espina codal d'una raya ye una aleta dorsal modificata.
Pa criaturas como las medusas, lo fizón puet fer referenzia á los tentaclos que leban los cnidozitos pa agafar á las presas, e mientres que tiengan un paralís e no se puedan esfender.
Por estensión, lo términ s'aplica a begatas áa lo catirón (una dient modificato) de las serpiéns. Una espezie de serpién común en Surafrica sobremanera, Psammophylax rhombeatus, ye conoxita en anglés como skaapsteker u "fizón d'obellas".
[editar] Botanica
En botanica se clama fizón á lo pelo bueito y esmolato que i ha sopre una glandula que secreta liquido caustico, como los de las xordicas. Las puntas d'estos pelos gosan crebar-se en la ferida, metendo-ie lo liquido irritant.
