Ir al contenido

Prunus domestica

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Prunus domestica
Cerollera
Ciruellera en a Republica Checa.
Denominacions populars
ciruellera / cirgüellera, cergüellera, cirollera, cirolera, ciroldera, cirgollera, ceruellera, cergollera, circollera, ciruellero / cirgüellero, cirgüeller, cergüellero, cergüeller, cirollero, cirgüelero, cirgollero, ceruellero, cerollero, cergollero, cirgoller, cergoller, prunera / perunera, prunero / pruner, perunero, pirunero
Estau de conservación

Seguro (IUCN)
Clasificación cientifica
Dominio:
 Eukaryota
Reino:
 Plantae
División:
 Magnoliophyta
Clase:
 Magnoliopsida
Orden:
 Rosales
Familia:
 Rosaceae
Subfamilia:
 Amygdaloideae
Tribu:
 Amygdaleae
Chenero:
 Prunus
Especie:
 P. domestica
Descripción
Prunus domestica
LINNAEUS, 1753

A ciruellera[1][nota 1] u cirollera[1][2][nota 2] (nombre cientifico Prunus domestica [3] (L., 1753)), tamién dita prunera[1][nota 3] u perunera[1][nota 4] ye un árbol fruitero d'o chenero Prunus, en a familia d'as rosacias y subfamilia d'as amigdaloidias[4] (linache d'as almendreras), cautivau mas que mas por o suyo fruito comestible: a cerolla.

O chenero Prunus, a lo cual a ciruellera pertenece, ha seu obchecto de reclasificación recient[4] por o gran numero d'especies que concabeba; a presencia de muitas d'as cuals se debeba a la laxitut d'os caracters especificos con que s'heba descrito anteriorment o taxón.[4] A ciruellera, d'o suyo fruito dimana o nombre d'o chenero (lat. <PRUNA), se troba actualment claseficau en o subchenero Prunus.

Descripción

[editar | modificar o codigo]

Como muitos d'os fruiters Prunus propiament ditos, a ciruellera ye un árbol caducifolio de mida mediana, que anque gosa poder creixer dica 10 metros d'altaria, de regular no pasa t'alto d'os 5 metros. A corona ye ampla, diafana, con as ramas deseparadas, que con frecuencia parten de forcallos a baixa altaria. O tronco ye curto.

A crosta ye grisa u marrón, rugosa y firme estriada en o tronco y as ramas, pero ye lasa y brillant en as brancas chóvens, de color mas royisca.

As follas fan entre 4 y 10 cm de largaria por 2–4 cm d'amplo, ovadas, elipticas u ovo-lancioladas, de forma que recordan muto a las d'a manzanera.

As flors son solitarias, anque como en muitas rosacias pasa bellas vegadas amaneixen agrupadas. Os petalos son blancos, de 8 dica 13 mm de largos. Os estamens en multiplo de 5 son largos y tienen as anteras amariellas. O receptaclo ye infero, glabro u pubescent, y de 4–10 mm.

O fruito ye una drupa pura, monocarpelar, glabra, de forma elipsoidal y d'entre 3 y 6 cm de diametro. Recibe o nombre mayoritario de «cerolla»[2] en o dominio lingüistico aragonés, especialment en Sobrarbe, Alto Galligo, Chacetania, Semontanos de l'Alto Aragón y os Monegros, pero tamién tiene variants como «cerola», «cerolda», «acerolla», «ciruella», «ciruela», u «ceruella»,[2] (lat. <CEREŌLA) y en as comarcas mas orientals de l'Alto Aragón se documenta como «pruna»[2] (lat. <PRUNA).

Fitonimia

[editar | modificar o codigo]

A ciruellera, como o suyo fruito, tiene diferents nombres u fitonimos en aragonés, a mayoría d'os cuals vienen de l'hipotetico etimo latín *CEREOLARIA> u *CEREOLARIU>, y iste de <CEREŌLA, «cerulia/feita de cera», en referencia a o fruito: cerollera, cerollero, ciruellero/a (pronunciau /θiɾˈɡwe.ʝe.ɾo/[2] con protesi velar), cerolero, cirollera, cirgollera, cirigollero, ceriuellero/a (pronunciau /θeɾiˈɡwe.ʝe.ɾo/[2] con protesi velar), cercoller (zercollé[2]), cirulera, ciroldera, cirroldero, cirgoller, etc.

As variants con -ll- en aragonés se remontan seguntes Manuel Ariza Viguera a variants latinas como CEREOLEUM u CERULEUM[5], y se tornan a trobar en parolas y toponimos d'os dominios galaicoportugués (cerollo con o significau d'aranyón) y astur-leyonés (Cerulleda)[6].

Os eixemplars bordes que a sobén se troba en os arredols d'as zonas de cultura reciben o nombre de «cascabillers»[2], y os suyos fruitos, que por no recibir cultura gosan estar mas chicoz y inapofeitables que as cerollas, se documentan con o nombre popular de «cascabels»[2] u «cascabillos».[2]

Imáchens

[editar | modificar o codigo]

Notas

[editar | modificar o codigo]
  1. ↑ Con as variants cirgüellera, cergüellera, cirgollera, ceruellera, cergollera y circollera. Tamién en masculín ciruellero, cirgüellero, cirgüeller, cergüellero, cergüeller, cirgüelero, cirgollero, ceruellero, cergollero, cirgoller y cergoller.
  2. ↑ Con as variants cerollera, cirolera y ciroldera. Tamién en masculín cirollero y cerollero.
  3. ↑ Con as variants en masculín prunero y pruner.
  4. ↑ Con as variants en masculín perunero y pirunero.

Referencias

[editar | modificar o codigo]
  1. ↑ 1,0 1,1 1,2 1,3 (an) Diccionario aragonés-castellano-catalán. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024 (accesible vía web).
  2. ↑ 2,00 2,01 2,02 2,03 2,04 2,05 2,06 2,07 2,08 2,09 (an) VIDALLER TRICAS, Rafel, Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza 2004. ISBN 978-84-8986-235-7
  3. ↑ (la) LINNAEUS, C.. 1753. Species Plantarum. Tomo I. Pag. 475.
  4. ↑ 4,0 4,1 4,2 (es) Estudios sobre el género Prunus en el Neotrópico; consultau o 22 d'aviento de 2015.
  5. ↑ (es) Manuel Ariza Viguera: Geografía lingüística y toponimia de la "Pruna domestica" L. y de la "Pruna spinosa " L. en la Península Ibérica. Boletín de la Real Academia Española, ISSN 0210-4822, Tomo 55, Cuaderno 204, 1975, pp 37-82.
  6. ↑ (es) José Luís Pensado: Estudios asturianos. Volumen 10 de Llibrería llingüística. Academia de la Llingua Asturiana, 1999. ISBN 8481681806, 9788481681802. p 223.

Vinclos externos

[editar | modificar o codigo]
Obteniu de "https://an.wikipedia.org/w/index.php?title=Prunus_domestica&oldid=2337898"