Mammuthus primigenius
![]() |
Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla. |
Mammuthus primigenius | |
---|---|
Reconstrucción de mamuts lanutos en migración. | |
Denominacions populars | |
Mamut lanuto, mamut lanudo
| |
Estato de conservación | |
Dende o Pleistoceno dica l'Holoceno | |
Clasificación scientifica | |
Eukaryota | |
Animalia | |
Filo:
|
Chordata |
Mammalia | |
Proboscidea | |
Elephantidae | |
Mammuthus | |
M. primigenius | |
Descripción | |
Mammuthus primigenius
Blumenbach, 1799 |
O mamut lanuto (Mammuthus primigenius (Blumenbach, 1799)) estió una especie d'a familia Elephantidae que se distribuiba por as tundras d'Eurasia en a glaciación de Würm. Como atros mamiferos grans que cazaba l'hombre en o Paleolitico Superior s'extinguió mientres a desglaciación, fácil que por sobrecazada en as suyas zonas de refuchio. Manimenos sobrevivió més tiempo en a isla de Wrangel.
Descripción[editar | modificar o codigo]
Midiba 3 m d'altaria en a cruz. A suya piel yera cubierta por zerras con dica 1 m de largura y de color castanya muito escura y que hue se veyen royencas. A piel teneba muitas glandulas sebacias que permitiban aumentar a impermeabilidat. Teneba reservas de seu en a cabeza y dencima d'a cruz fendo una chepa. As orellas yeran chicas en comparanza con l'elefant africano. A trompa y as orellas yeran tamién cubiertas por pelo. A coda teneba una espansión en a base pa protecher a ubertura anal.
As defensas yeran més grans en os masclos que en as fembras, teneban una forma un poquet espiral ent'alto y afuera y encara podeban midir més de 4,5 m.
Distribución[editar | modificar o codigo]
O mamut lanuto amaneix a la fin d'a glaciación de Riss, a suya distribución se redució como ye natural en o periodo interglaciar Riss-Würm, pero se tornó a estender muito en a glaciación de Würm. Se podeba trobar dende o sud d'Espanya (a paúl d'el Padul (Granada) dica Escocia, y por l'este dica Siberia oriental. Cruzó Berinchia y s'estendilló tamién por Nordamerica.
Se crei que s'extinguió d'Europa fa bells 12.000 anyos y que persistió dica fa 10.000 en as peninsulas de Taimir y Ghydan (Siberia). En a isla de Wrangel se conoixen fósils dica os 3.700 anyos BP, y heban encomenzau a evolucionar enta o nanismo (as fembras midiban uns 1,8 metros d'altaria, qualquecosa menos que as formas continentals).
En la zona pirenenca amanix en os sedimentos aluvials de Font-rubí, Vall de Bianya en Olot, Sant Vicenç dels Horts, río Congost cerca de Granollers, Vallformosa, Arenys de Mar, Granada, Montgiscard, Tolosa, etc. en cambras y canyos karsticos d'Izturitze, Houaliech, Juncà, Lamarche, Sant Julià de Ramis, etc. u en atra clase de chacimientos como Gourdan, Pape, Olha 1, Gatzarria, Gerde, Coupe-Gorge, Harpons, Terté y Lherm. O zaguer mamut pirenenco conoixiu ye d'o Magdalenián meyo d'Izturitze, entre os 14.500 anyos BP y os 13.000 anyos BP.
Imáchens[editar | modificar o codigo]
Se veiga tamién[editar | modificar o codigo]
- Mammuthus lamarmorae
- Mammuthus columbi
- Mammuthus imperator
- Mammuthus trogontherii
- Mammuthus meridionalis
Bibliografía[editar | modificar o codigo]
- Oscar Arribas: Fauna y paisaje en los Pirineos en la Era Glaciar. Lynx Ediciones. ISBN 978-84-87334-71-9
Vinclos externos[editar | modificar o codigo]
Se veigan as imachens de Commons sobre o Mammuthus primigenius.
Wikispecies tiene un articlo sobre Mammuthus primigenius.