Kim (cinta de 1950)
- Iste articlo ye sobre una cinta estausunidense de cine d'aventuras de 1950; ta atros usos, se veiga Kim.
Kim (títol orichinal, enguerada en Aragón con o títol en castellano de Kim de la India, en aragonés Kim d'a India) ye una cinta de cine estausunidense de l'anyo 1950 de cine d'aventuras colonials d'espionache dramatico dirichida por Victor Saville seguntes un guión adaptau por Helen Deutsch, Leon Gordon y Richard Schayer basau en a novela Kim, publicada por Rudyard Kipling en 1901. La dirección de fotografía ye de William V. Skall y la Banda Sonora Orichinal d'André Previn, estando producida por Leon Gordon ta la productora cinematografica Metro-Goldwyn-Mayer. Os principals actors d'a cinta son Errol Flynn, Dean Stockwell, Paul Lukas, Robert Douglas, Thomas Gomez, Cecil Kellaway, Arnold Moss y Laurette Luez.
A cinta s'ambienta en o clamau Gran Chuego, a confrontación politica entre l'Imperio Britanico y l'Imperio Ruso mientres o sieglo XIX y las primeras anyadas d'o sieglo XX por o control politico d'Afganistán y d'o norte d'a India y Pakistán cuan istos dos países feban parte d'o Raj britanico. La cinta se rodó parcialment en escenarios naturals y edificios d'a India, en os estaus de Rachastán, Uttar Pradesh y Uttaranchal, pero tamién en Estaus Unius en as Alabama Hills (California), amán de California, esleyiu por o suyo pareixiu con o paso Khyber, en l'actual Pakistán. D'o rodache en India, destacan as escenas filmadas en La Martinière, en a ciudat de Lucknow, a capital d'Uttar Pradesh.
Argumento
[editar | modificar o codigo]En 1885 l'Imperio Britanico controla la India (lo clamau Raj britanico), en zarrando lo pàso a l'Imperio Ruso en as suyas aspiracions de plegar en l'Oceano Indico. Kim ye un nino popillo que fa bellos treballos ocasionals ta Mahbub Ali, un vendedor de caballos que amás treballa como espía ta los britanicos. Bel día Mahbub Ali conoix un plan d'os rusos ta provocar una sublevación en a India pero ye baixo vichilancia y veye difícil de comunicar ixa noticia a los suyos superiors. Simultaniament Kim ha conoixiu a un viello lama budista d'o Tibet que ye en una rechira ta trobar ixo que él clama o río d'a flecha y a on podrá limpiar-se espiritualment. Mahbub Ali fa que Kim se li adhiba como chela u aduyant en o suyo camín ta que sía Kim o portador d'o mensache a lo coronel Creighton, lo suyo superior.
Kim y lo monche budista marchan chuntos a traviés d'a Grand Trunk Road, una antiga rota comercial que trescruza la India de sud enta norte, y poquet a poquet enamplan la suya amistad. Bel día troban una base militar de l'exercito britanico y Kim para cuenta que la bandera d'o rechimiento d'o cual en ye lo cuartel ye d'un toro royo en campo verde, exactament la sinyal que li describiba su difunto pai. Kim prega de dentrar-ie pero ye deteniu por o talaya y prencipia una baralla. De resultas de tot ixo troban que Kim yera portador d'uns documentos que acreditan que ye fillo de Kimball O'Hara, un irlandés qui heba serviu d'antes mas en o rechimiento.
Encara que a Kim no li cuaca pas guaire la idea, lo lama decide que Kim ha d'educar-se entre la suya chent y paga los estudios de Kim en a millor escuela d'a India, a on estudian os fillos d'os militars y funcionarios britanicos destinaus en o país. D'atra man Mahbub Ali convence a lo coronel Creighton de que Kim ye poseyedor d'un gran talento natural ta l'espionache, cosa que sí que li cuaca muito mas a Kim, y fa que reciba formación como espía mientres as suyas vacancias, siempre que torne en a suya escuela cuan torne a escomencipiar lo siguient curso. Por una serie de circumstancias, Kim se acompanyando a lo suyo lama como enchaquia en a suya rechira pero en realidat ye vichilando a dos oficials de l'exercito ruso que son fendo labors d'espionache amán d'a muga pero aintro d'o territorio d'o Raj britanico y captando as voluntaz d'os nativos. Kim ya ha dentrau en o Gran chuego, por a puerta gran, y bien luego se trobará en periglo.
Elenco[2]
[editar | modificar o codigo]| Actor | Papel | Notas |
|---|---|---|
| Errol Flynn | Mahbub Ali | |
| Dean Stockwell | Kimball 'Kim' O'Hara Jr. | |
| Paul Lukas | Lama | |
| Robert Douglas | Coronel Creighton | |
| Thomas Gomez | Emisario | |
| Cecil Kellaway | Hurree Chunder | |
| Arnold Moss | Lurgan Sahib | |
| Reginald Owen | Mosén Victor | |
| Laurette Luez | Laluli | |
| Richard Hale | Hassan Bey | |
| Roman Toporow | Oficial ruso | |
| Ivan Triesault | Oficial ruso | |
| Mimi Aguglia | Vendedora de birolla | No acreditau |
| Patrick Aherne | Aduyant d'o cheneral | No acreditau |
| Fernando Alvarado | Mesache indio | No acreditau |
| Michael Ansara | Guardia de l'arem | No acreditau |
| Lailee Bakhtiar | Moceta india en a carrera | No acreditau |
| Bobby Barber | Conductor d'o carro | No acreditau |
| Steven Baron | Oficial choven | No acreditau |
| M.S. Bedi | Fillo esmerdazau | No acreditau |
| Hamilton Camp | Thorpe | No acreditau |
| Wallis Clark | Cheneral britanico en Craighton | No acreditau |
| Paul Collins | Estudiant britanico | No acreditau |
| Henry Corden | Conspirador | No acreditau |
| Bette Daniels | Miss Manners | No acreditada |
| Adeline De Walt Reynolds | Viella "maharanee" | No acreditau |
| Richard Glynn | Estudiant britanico | No acreditau |
| I.A. Hafesjee | Erudito indio | No acreditau |
| Timmy Hawkins | Estudiant britanico | No acreditau |
| Robin Hughes | Oficial britanico | No acreditau |
| Olaf Hytten | Mr. Fairlee | No acreditau |
| Curtis Loys Jackson Jr. | Estudiant britanico | No acreditau |
| Hassan Khayyam | Criau | No acreditau |
| George Khoury | Hombre choven | No acreditau |
| Walter Kingsford | Dr. Bronson | No acreditau |
| Lou Krugman | Guardia | No acreditau |
| Frank Lackteen | Uembra de Chunder | No acreditau |
| Edgar Lansbury | Oficial choven | No acreditau |
| Mitchell Lewis | Granchero camín d'Ambala | No acreditau |
| Richard Lupino | Talaya | No acreditau |
| M.S. Malek | Fillo esmerdazau | No acreditau |
| Peter Mamakos | Conspirador | No acreditau |
| John Mantley | Ordenanza | No acreditau |
| Donna Martell | Haikun | No acreditada |
| Keith McConnell | Mayestro | No acreditau |
| Merrill McCormick | Pastor de crabas | No acreditau |
| Francis McDonald | Escribient de cartas | No acreditau |
| George McDonald | Estudiant britanico | No acreditau |
| Lal Chand Mehra | Policía | No acreditau |
| Henry Mirelez | Wanna | No acreditau |
| Movita | Muller con nino | No acreditada |
| Jeanette Nolan | Mai de Foster | No acreditada |
| Maurice Panama | Oficial choven | No acreditau |
| Stanley Price | Vendedor d'augua | No acreditau |
| Rodd Redwing | Criau de Creighton | No acreditau |
| Danny Rees | Biggs | No acreditau |
| Lanny Rees | Papel menor | No acreditau |
| Frank Richards | Abul | No acreditau |
| Hayden Rorke | Comandant Ainsley | No acreditau |
| Christopher Severn | Estudiant britanico | No acreditau |
| Malik Tahir | Mesache indio | No acreditau |
| Mike Tellegen | Policía | No acreditau |
| Felipe Turich | Policía | No acreditau |
| Wilson Wood | Gerald | No acreditau |
Producción
[editar | modificar o codigo]A Metro-Goldwyn-Mayer heba anunciau en 1938 la realización d'a cinta, que heban de protagonizar Freddie Bartholomew (como Kimball 'Kim' O'Hara Jr.) y Robert Taylor (en o papel de Mahbub Ali; tanimientres en esclatar en 1939 la Segunda Guerra Mundial o prochecto quedó temporalment aparcau. En 1942 se reactivó, pensando-se en que los protagonistas estasen Mickey Rooney (como Kim), Conrad Veidt (como lo lama) y Basil Rathbone en o papel de Mahbub Ali, con guión de Leon Gordon y producida por Victor Saville, pero en estar en plena guerra se consideroron as posibles implicacions politicas y se descartó por segunda vegada en considerar que indios y rusos podrían sentir-se molestos en estar os malos d'a cinta cuan feban parte d'os Aliaus en a luita comuna con estausunidenses y britanicos contra lo Tercer Reich y l'Imperio chaponés.
En plegar la India en a suya independencia en 1948 lo Gubierno indio aprebó la realización d'a cinta y, amás, heba esclatau a Guerra Fría y ya tornaba a estar posible de presentar en a gran pantalla a los rusos como los malos d'a cinta, asinas que en 1949 lo prochecto se reactivó, en contractando a la estrela infantil d'a Dean Stockwell y bien luego a Errol Flynn como protagonista. Paul Lukas y Errol Flynn filmoron a suyas escenas en escenarios reals y naturals en a India, pero as escenas a on amanixe Stockwell se filmoron en Hollywood, fendo-se servir dobles ta las escenas a on amanixe que se filmoron en a India, mesmo que ta las escenas con Huree Babu, Creighton Sahib y Lurgan Sahib, en iste caso porque encara no se sabeba cuals actors heban d'interpretar ixos papels. En chinero de 1950 se filmoron en California as escenas que faltaban.
Banda sonora
[editar | modificar o codigo]O filo conductor d'a banda sonora d'a cinta ye la canción D'Ye Ken John Peel?, mas que mas cuan amanixen en a cinta las tropas a lo servicio d'a Companyía Britanica d'as Indias Orientals, los clamaus exercitos d'a presidencia.
Recaudo
[editar | modificar o codigo]La cinta tenió prou exito de publico, en fer un recaudo de 2.896.000 dólars en Estaus Unius y Canadá y 2.465.000 dólars mas arredol d'o mundo, estando la cinta con mas recaudo d'as protagonizadas por Errol Flynn en parando cuenta d'a inflación.
Critica
[editar | modificar o codigo]En De cine 21 se diz que:[3]
En Fotogramas[4] charran d'a "solideza d'a suya realización" y d'as "convincents interpretacions".
Se veiga tamién
[editar | modificar o codigo]Referencias
[editar | modificar o codigo]- ↑ 1,0 1,1 (en) Enguero de Kim en Internet Movie Database.
- ↑ (en) Kim en Internet Movie Database.
- ↑ (es) Kim de la India, pequeño soldadito, en De cine 21.
- ↑ (es) Kim de la India en Fotogramas, 29 de mayo de 2008.
Vinclos externos
[editar | modificar o codigo]- (en) Kim en Internet Movie Database.
- (en) / (es) Kim en FilmAffinity.
- (en) Kim en l' American Film Institute Catalog de l'American Film Institute.
- (en) Kim en AllMovie.
- (en) Kim en TCM Movie Database.
- (en) Kim en Allociné.
- (en) Kim en Rotten Tomatoes.
- Cintas por títol
- Cintas de 1950
- Cintas ambientadas en a India
- Cintas ambientadas en Pakistán
- Cintas ambientadas en 1885
- Cintas con banda sonora orichinal d'André Previn
- Cintas con dirección de fotografía de William V. Skall
- Cintas con guión de Helen Deutsch
- Cintas con guión de Leon Gordon
- Cintas con guión de Richard Schayer
- Cintas con montache de George Boemler
- Cintas d'Estaus Unius
- Cintas de cine de drama
- Cintas de cine d'aventuras
- Cintas de cine d'espionache
- Cintas dirichidas por Victor Saville
- Cintas en anglés
- Cintas interpretadas por Arnold Moss
- Cintas interpretadas por Cecil Kellaway
- Cintas interpretadas por Dean Stockwell
- Cintas interpretadas por Errol Flynn
- Cintas interpretadas por Laurette Luez
- Cintas interpretadas por Paul Lukas
- Cintas interpretadas por Robert Douglas
- Cintas interpretadas por Thomas Gomez
- Cintas producidas por Leon Gordon
- Cintas rodadas en California
- Cintas rodadas en Lucknow
- Cintas rodadas en Rachastán
- Cintas rodadas en Uttar Pradesh
- Cintas rodadas en Uttaranchal