Indicación Cheografica Protechida Vin d'a Tierra Val de Xalón

Localización d'a IChP Vin d'a Tierra Val de Xalón

A Indicación Cheografica Protechida Vin d'a Tierra Val de Xalón ye una indicación cheografica protechida emplegada pa designar os vins d'a Tierra orichinarios d'a zona viticola de Val de Xalón. Ista indicación cheográfica fue reglamentada en 1998.

Orichens

En l'anyo 1798 escribe Jordán de Asso sobre o vin d'ista rechión:

[...] a villa de Calatorau, que tien actualment de nueva plantación 741 cafizadas en una canyada confrontant con termins de l'Almunia. [...] [L'Almunia] puya ta 8 mil alqueces de a 12 cantaros. No ye tan copiosa la d'Epila, que ye reducida a o que produce en o termin de Sunyén, tot de secano, pero ye de muit buena calidat

Tamién a meyaus d'o sieglo XIX comenta Madoz a puyada d'a producción en a zona debiu a la filoxera que atacaba a los vinyals franceses por ixas envueltas, creyando-se un alcuerdo comercial con o país vecín:

Os viticultors aragoneses vendeban dreitament a suya producción en as suyas propias localidaz a comisionistas de casas francesas que se desplazaban astí con obchecto de crompar vin. Istos comisionistas residiban en cuantas localidaz, normalment con gara u con produccions importants, y organizaban o transporte d'o caldo dica o suyo destín, que yera mas que mas a zona de Bordeus y Seta

En a decada de 1970 a superficie de vit cautivada en Val de Xalón yera de 16.300 Ha, por lo que nomás yera superada por as de Calatayú y Carinyena. I heba ta par d'alavez 16 bodegas en Morata, 7 en L'Almunia, 6 en Epila, 5 en Calatorau, 5 en Ricla, 4 en Lumpiac, 1 en Exarc, 1 en Mesons y 1 en Tierga.

Redolada

Se tracta d'una zona vertebrada por o río Xalón con diferents tipos de paisaches que van dende a estepa y as mesetas dica os humedals y riberas d'os ríos.

Clima

Os climas d'ista zona son prencipalment o mediterranio continental (con zonas de transición a o submediterranio continental calido) y o seco estepario. Amás en as zonas mas amanadas a la influyencia de Moncayo se troba un clima de transición mediterranio–oceanico.

As precipitacions anyals son baixas y as temperaturas son extremas tanto en verano como d'hibierno. Cal destacar tamién a presencia frecuent d'o cierzo, viento que bufa con component nord-este y que intensifica d'hibierno as baixas temperaturas y en verano suaveixe as temperaturas extremas.

Demarcación cheografica

S'incluyen os siguients municipios d'a provincia de Zaragoza: Aranda de Moncayo, Arandiga, Bárbols, Bardallur, Calatorau, Calcena, Cuart de la Uerba, Chodes, Ebreya, Epila, Exarc de Moncayo, Figueruelas, Gotor, Grisén, Illueca, L'Almunia de Donya Godina, Lucena de Xalón, Lumpiac, Mesons d'Isuela, Morata de Xalón, Morés, Nuella, Osella, Pedrola, Placiencia de Xalón, Pleitas, Purroi, Ricla, Rueda de Xalón, Saliellas de Xalón, Sabinyán, Santa Cruz de Griu, Sestrica, Tierga, Trasobars, Urreya de Xalón y Zaragoza.

Caracteristicas

S'admiten categorías de vins blancos con grau alcolico natural minimo de 11°, rosaus con 12° y tintos con 12'5°, asinas como vin de licor con un minimo de 15°.

Ugas

• Blancas: macabeu, garnacha blanca, chardonnay y moscatel d'Alexandría

• Tintas: moristel, carinyena, cabernet sauvignon, merlot, tempranillo, garnacha, graciano y syrah.

Producción y comercialización

Bodegas

I hai 8 bodegas que fan parti d'a indicación cheografica protechida:

• Epilense de Vinos y Viñedos (Epila)

Vinclos externos

• (es) Asociación de Vins d'a Tierra d'Aragón.
• (es) IChP Val de Xalón

• Datos: Q7909361