Extremenyo (lingüistica)

De Biquipedia
Extremenyo
Estremeñu
Variedat de l'astur-leyonés
Asturleonese-subgroup.png
Extremenyo a o sud d'o grupo astur-leyonés
Localización cheografica
Estau {{{estau}}}
País {{{país}}}
Rechión {{{rechión}}}
Parlau en Flag of Extremadura, Spain.svg Extremadura
Bandera de Salamanca.svg Salamanca
Lugars principals
Estatus
Atras denominacions Castúo
Charradors 200.000
Oficial en {{{oficial}}}
Reconoixiu en {{{reconoixiu}}}
Regulau por {{{regulau}}}
Vitalidat
Escritors principals
Rasgos dialectals
{{{familia1}}}
Codigos
ISO 639-1 {{{iso1}}}
ISO 639-2 roa
ISO 639-3 ext
SIL ext

O extremenyo (estremeñu u castúo, termin que leva a confusión) ye una parla que se charra en o sud de Salamanca y en Extremadura, sobretot en o norueste. O extremenyo combina intresants caracters d'a luenga astur-leyonesa, consideraus substrato, con caracters propios d'o castellano meridional y que se troban en andaluz, murcián, en churro y dica en catalán valenciano. Ye una parla rechional u conchunto de parlas locals que a filolochía tradicional ha considerau como una variant rechional d'o castellano u un dialecto,[1] pero que actualment una colla de filologos heterodoxos consideran una luenga, [2] plegando dica l'inte de considerar-la d'o diasistema astur-leyonés,[3] encara que os caracters astur-leyoneses sigan minoritarios y sigan consideraus por un regular como restos d'astur-leyonés [4]. Os que consideran o extremenyo como una luenga diferent fan distinción entre o dialecto extremenyo d'o castellano, con caracters meridionals y a luenga extremenya, d'o norueste d'Extremadura, a on son més concentraus os caracters d'o substrato astur-leyonés.

Arcaísmos

Bi ha caracters que enantes estioron estendillaus por a mayoría u por gran parte d'a peninsula iberica, afectando a diferents idiomas y que huei se troban en variants d'ixos idiomas sin conexión cheografica, como se desvién con a distinción entre v y b propias d'o portugués y o valenciano, u a distinción entre sibilants sonoras y xordas.

  • En Serradilla se conserva una v labiodental: vedinu, verza, yervadina, y tamién se puet trobar en atros lugars pero con menor vitalidat.
  • En dos arias sin continuidat territorial entre a Sierra de Gata y Montehermoso y Malpartida de Plasencia se conserva a distinción entre as sibilants sonoras y xordas d'o luengache medieval, (que se representaban "s", "ss", "c", "Ç", "z") pero l'africada sibilant sonora antiga /ds/ ha esdevenido una /đ/ fricativa: iđí (“decir”) hađel (“fer”). Paix que este caracter se trobaba en tot Caceres y que duró més tiempo en o castellano do sudueste d'Avila.
    • En a parla de Malpartida de Plasencia u “chinato” a /s/ sonora y a /z/ plegan a lo mesmo resultau por haber-ie ceceyo, y d'esta traza rosa, beso y los hijos se diz u se pronuncia /rođa/, /beđo/, /lođ íhoh/.

Astur-leyonesismos

Entre os caracters astur-leyoneses, que son més marcaus en Cáceres, i trobamos:

  • As vocals finals –e, -u se cierran, prencipalment en a provincia de Cazres.
  • Bi ha una –i- semiconsonant que se puet explicar tanto por epentesi u d'una conservación: matancia, quiӨiáh ("talment")
  • Un feito asaber-lo d'intresant ye que en os casos que en astur-leyonés trobamos una –x- /ʃ/ que provién d'a evolución d'as silabas latinas GE, GI, IO, IU, IA, (que en aragonés ha dau /tʃ/, representau por a "ch"), en extremenyo se conserva como aspirada en cuenta de como -x- /ʃ/. Este fonema aspirau en esta situación ye producto d'a evolución conchunta con o castellano, que antes d'o sieglo XVII teneba o fonema /ʃ/ representau ortograficament con "x", y que dimpués evolucionó t'a velar que se representa "j" /X/, de fueras d'as zonas a on existiba o fonema aspirau que proveniba de F- inicial latina, (Andalucía, Montanya Cantabra): henhíba, ("cheniva"), hiélnu / hjélno ("yerno" en castellano cheneral, "chóven" en aragonés).
  • En parabras que en castellano tienen pl-, kl-, bl-, fl-, (que no necesariament provienen d'os grupos latins pl-, kl-, bl-, fl- que en castellano dan –ll- u –l- ), bi ha un cambio d'a l por a r: prato ("plato"), cravo ("clau"), ombrigo ("melico"), frauta ("flauta").
  • Cambio d'a –d preconsonantica ta –l en grupos derivaus de -D'T-, -T'C- y atros.
    • Bilma.
    • Relva.
    • Pielga < PEDICAM.
    • Pielgo corresponde a lo castellano piezgo.
  • D'acuerdo con esta tendencia a terminación latina -ATICU (que en aragonés ha dau -ache y en castellano -atgo > -azgo), da -algo en astur-leyonés, lo que se conserva en extremenyo de fueras d'a redolada de Mérida, a on que este sufixo se presenta como -ajo (noviajo).
  • Aspiración d'a s final d'as silabas, caracter d'orichen leyonés amagau por una evolución posterior propia d'o castellano. Ye documentau que bella zona d'o portugués a dicción d'a s final yera como o fonema prepalatal fricativo xordo, y se sabe que en bella zona d'o leyonés tamién se pronunciaba asinas.[6]
  • Sufixo diminutivo –ino, que amuestra en a microtoponimia a repoblación astur-leyonesa, pero que no ye tan vital en a macrotoponimia como en Salamanca y Zamora a lo norte d'o río Tacho[7] En a toponimia se puede trobar a terminación ín con apocope sin corresponder necesariament a lo sufixo (Ceclavín, Garcín, Alcollarín, Medellín y El Golfín, pero tamién Solarino).[5]
  • Parabras aisladas que amuestran a fonetica astur-leyonesa (astur-leyonesismos foneticos), que representan fosils lingüisticos que s'han resistiu a lo cambio fonetico que por castellanización ha afectau a quasi totz os atros casos (ye un feito analogo a los aragonesismos foneticos d'a parla baturra u d'a parla churra):
    • Conservación d'o grupo -MB-. Trobamos aislau lamber (en castellano ye lamer u en aragonés "laminar"), pero s'ha de notar que con fonetica astur-leyonesa bien conservada sería llamber).
    • Grupo –pl- evolucionando ta –l-: se conserva luvia ("plevia"), luver u lover ("plever")

Astur-leyonesismos en as parlas comarcals y locals

Bi ha características astur-leyonesas en bella variant, por eixemplo: En as Hurdes se conserva a –e final (que se puet pronunciar –i) dezaga de r, d u Ө: mare, rede, sede, peci, hoci, encara que se pierda u s'apocope en as terceras presonas: diz, tien, vien.

Meridionalismos

Os caracters propios d'o castellano meridional son més marcaus en Badajoz:

  • Se conserva a h aspirada provinient de F- inicial latina, a sobén sonora y nasal: harina, ahumao, ecetra... Encara que s'haiga quiesto considerar un astur-leyonesismo (se troba en l'asturián oriental), no en ye porque en asturián ye un caracter minoritario y propio de l'aria macrocheografica de parlas de transición gradual natural ta o castellano. Por atra parte l'aspiración se considera que yera cheneral en castellano medieval, y encara se troba en castellano d'a Montanya Cantabra y en andaluz.
  • Como en andaluz y en castellano d'a Montanya cantabra a /j/ velar se pronuncia aspirada, por haber evolucionau a –x- en un puesto a on se conservaba un fonema pareixiu a la j velar pero aspirau.
  • Aspiración d'a s final d'as silabas, caracter d'orichen leyonés pero con una superposición d'os dos caracters anteriors, que ha impediu que o fonema prepalatal fricativo xordo d'a luenga medieval evolucione como una j velar castellana.
  • A “s” de final de silaba s'aspira como ye caracteristico en tot o castellano meridional.
  • Confusión entre /r/ y /l/, con tendencia a la l: peol' ("peyor"), muhel ("muller").
  • Muita tendencia a la caita d'a /-d/ intervocalica, común con muitas variants meridionals d'o castellano e con o valenciano: /deo/ ("dido").
  • O yeismo y o refilamiento (yeismo con o fonema /ž/: [žéno], ("pleno", lleno en castellano standard) [akežo], ("aquello") [hožo] ("foyo", hoyo en castellano) se troban en quasi tot Badajoz, pero en Caceres no dominan que en o Nordeste, trobando-se en bella localidat d'o sudeste y una zona occidental.

Literatura

O extremenyo de Caceres tien representación literaria en a presona de José María Gabriel y Galán, que publicó Extremeña en 1902. O extremenyo de Badajoz tien representación literaria en a presona de Luís Chamizo, que escribió El miajón de los castúos en 1921.

Variedatz d'o extremenyo

Variants d'o extremenyo son:

Referencias

  1. ↑ (es) Rafael Lapesa. Historia de la lengua española. Editorial Gredos. (1981)
  2. ↑ (en) Extremaduran en www.ethnologue.com.
  3. ↑ (es) Proel
  4. ↑ Michael Metzeltin "Las lenguas románicas estándar (historia de su formación y de su uso)" Volumen 16 de Llibrería llingüística. Editor Academia Llingua Asturiana, 2004
  5. ↑ 5,0 5,1 (es) Alonso Zamora Vicente: Dialectología española. Editorial Gredos, segunda edición, 1989, pp 116-118.
  6. ↑ (es) Paul M. Lloyd: Del latín al español. Editorial Gredos, 2003, pp 554-556.
  7. ↑ (es) Diego Catalán, Alvaro Galmés de Fuentes: Las lenguas circunvecinas del castellano, cuestiones de dialectología hispano-románica. Paraninfo.

Bibliografía

Wikipedia
Ista luenga tien a suya propia Wikipedia. Puetz vesitar-la y contribuir en Wikipedia en extremenyo.
Obteniu de "https://an.wikipedia.org/w/index.php?title=Extremenyo_(lingüistica)&oldid=1913566"