Blaps

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

Iste articlo tracta sobre os escarabachos zapaters. Ta atros usos d'a palabra «zapater» se veiga Zapater (desambigación), y ta «zapatero», Zapatero (desambigación).

Blaps
Blaps mortisaga
Denominacions populars
Zapatero, escarabacho zapatero, cucaracho zapatero
Clasificación scientifica
Dominio:	Eukaryota
Reino:	Animalia
Subreino:	Eumetazoa
Filo:	Arthropoda
Clase:	Insecta
Orden:	Coleoptera
Suborden:	Polyphaga
Superfamilia:	Tenebrionoidea
Familia:	Tenebrionidae
Subfamilia:	Tenebrioninae
Tribu:	Blaptini
Chenero:	Blaps
Descripción
Blaps Fabricius, 1775

Os zapaters u escarabachos zapaters (scientificament Blaps -en latín-) son un chenero d'insectos coleopteros (escarabachos) en a familia d'os tenebrionidos, con alimentación detritivora.

Se caracterizan por a suya color totalment negra y brillant, a suya mida y movimientos lentos, y por tener os elitros remataus en punta de forma caracteristica. Tanto as larvas como os imagos s'alimentan de materia organica en descomposición y de fongos saprofitos, y anque consumen preferentment alimentos d'orichen vechetal si en tienen ocasión tamién aprofitan as restas animals y os productos manufacturaus por l'hombre.

Descripción[editar | modificar o codigo]

Os zapaters son escarabachos de color negra uniforme y exoesqueleto brillant, con as patas zagueras un poquet mas largas que as atras quatro, y con os elitros remataus en punta, debantada como si fese un poquet de volader por a coda de l'abdomen, o qual ye una caracteristica d'iste chenero.

As patas son largas y fuertes, o que causa que o cuerpo vaiga prou separau d'o suelo quan l'insecto camina. As patas zagueras, por estar mas largas, fan que lateralment l'animal pareixca que va una mica abocau t'abant.

Son animals de movimientos lentos, y confian a suya defensa a la producción de substancias que fan fortor u que irritan as mucosas d'os posibles depredadors. Manimenos, en as especies freqüents en a Peninsula Iberica, istas substancias son quasi imperceptibles a os sentius humans, dica o punto en o que caldría amanar-se l'insecto a la cara ta sentir-ne levement a ulor. Van dirichidas especialment contra radedors, como as ratas y os ratolichons, y atros mamiferos de taxia olfactiva con os que a sobén comparten l'habitat.

Costumbres[editar | modificar o codigo]

Os zapaters son escarabachos mayoritariament nocturnos. De nueitz deambulan mirando l'alimento, y s'amagan en as horas de luz en qualsiquier puesto fusco, como debaixo d'una simple piedra, una pila de lenya u l'interior d'os muebles.

Qualques especies son freqüents en entornos humanizaus, y no ye mica raro trobar-las en poblau u encara en l'interior d'as casas. En os lugars ye muit común de trobar-los en cambras como as bodegas y os repostes, a on que se fican en as horas nocturnas, atraidos por a ulor de floridura u d'alimento, y dimpuesas no en saben surtir.

Encara que en a naturaleza cosumen sobre tot materia organica d'orichen vechetal, y de feito as larvas se troban mas que mas en a madera calamonada, en os femeros y en os pudridors, os adultos (mas móbils) no desaprofitan a posibilidat d'alimentar-se tamién con productos d'orichen animal y manufacturaus por l'hombre, como queso, pan y embutius.