Floridura

De Biquipedia
Ir ta: navego, busca
Floridura
Moldy nectarines.jpg
Nectarinas floridas.
Clasificación scientifica
Dominio: Eukarya
Reino: Fungi
Divisions

Una floridura[1] ye un fongo que creixe en forma de filamentos multicelulars ditos hifas, en oposición a las levaduras, que son fongos que prenen un solo habito de creiximiento celular.

Las floriduras son un numero gran d'especies de fongos taxonomicament diverso. En las floriduras lo creiximiento de las hifas fa que se descoloreixcan y prengan una farcha borrosa, en especial sobre los alimentos. Lo ret d'hifas tubulars y ramificadas se diz "micelio", y visto como un tot se considera un solo organismo. Las hifas son por un regular transparents, asinas lo micelio pareixe como una tovura formada por un conchunto de filos sobre una superficie. Las paretz transversals (septos) pueden despartir compartimientos conectaus por tota la hifa, cadagún con un u uns quantos nuclios cheneticament identicos. La textura polsosa de muitas floriduras ye causada por la abundant producción d'esporas asexuals (conidios), que se forman por diferenciación en los cabos de las hifas. La traza de formación y la forma d'estas esporas ha estau un criterio tradicional pa clasificar las floriduras. Muitas d'estas esporas tienen una color viva, fendo a estos hongos mes envistables pa lo uello humán en esta etapa de lo suyo ciclo vital.

Las floriduras son consideradas microbios y no forman una agrupación taxonomica u filochenetica especifica, manimenos perteneixen a las divisions Zygomycota y Ascomycota. D'antes, muitas floriduras se clasificaban adintro de los Deuteromycota.

Las floriduras causan la biodegradación de materials naturals, que puede no estar un estropicio quan los alimentos se floreixen u se malmete la propiedat privada. Las floriduras tienen tamién un paper important en la biotecnolochía y en la sciencia de los alimentos en la producción de diferents minchars, bebidas, antibioticos, productos farmaceuticos y enzimas.

Floriduras comuns[editar | editar código]

Denominacions populars[editar | editar código]

Lo "Diccionario del Benasqués" d'Ángel Ballarín Cornel replega flloridura con la lochica pronunciación ribagorzana, que corresponde a la pronunciación de l'aragonés cheneral floridura. Esta parola se relaciona con lo verbo incoativo y pronominal florir-se[2], verbo que actualment en la mes gran part de l'Alto Aragón se presenta como florecer-se en ansotán encara como florexer-se[3], y en chistabín como floreixer-se[2] coexistindo con florir-se. Tamién existe lo verbo escalferir[3] d'uso mes local, y un verbo calmunir-se u calamunir-se que indica la putrefacción en condicions humidat[2] y que puede referir-se a la putrefacción de la ropa quan ye humida.

L'ALEANR da la distribución de diferents denominacions de lo pan floriu, estando pan florecido la mes estendillada en las localidatz de l'Alto Aragón que dica fa poco yeran aragonesofonas, quedando las formas floreciu en ansotán, cheso, en Hu 300, Hu 111, Hu 403, Hu 405, florido en Hu 202 y florito en Hu 200[4]. La forma flloriu ye documentada en aragonés benasqués y en lo catalán transicional de La Poblla de Roda.

Referencias[editar | editar código]

  1. (es) Ángel Ballarín Cornel: Diccionario del Benasqués. Institución Fernando el Católico, Zaragoza, segunda edición 1978. p 197, pronunciau /flloridura/ en benasqués.
  2. 2,0 2,1 2,2 (es) BLAS GABARDA, Fernando y ROMANOS HERNANDO, Fernando, Diccionario Aragonés: Chistabín-Castellano; Gara d'Edizions. Zaragoza, 2008. ISBN978-84-8094-061-0 p 139, pp 139-140, p 298.
  3. 3,0 3,1 (es) BARCOS, Miguel Ánchel, El Aragonés Ansotano: estudio lingüístico de Ansó y Fago; Gara d'Edizions. Zaragoza, 2007, p 201, p 210.ISBN 978-84-8094-058-0
  4. (es) Manuel Alvar: Atlas lingüístico y etnográfico de Aragón, Navarra y Rioja. Institución Fernando el Católico. Departamento de Geografía Lingüística, Institución Fernando el Católico de la Excma. Diputación Provincial de Zaragoza, 1983. Tomo II, Lamina 307, Mapa nº 258.