Queso
O queso u tamién formache (en latín, caseus formaticus) ye un alimento solido formato en cuallar a leit, podendo estar fermentato u no fermentato. Se puet emplegar leit de muitas especies animals, pero as más habituals gosan estar a de vaca, uella y craba. En atros países tamién se'n fa con leit de camello, dromedario, brúfol u yac.
Ye a conserva ideyal ya que no gosa malmeter-se con o paso d'o tiempo, sino que en ixucar-se milloran as suyas qualidatz en relación con o peso. Se fa cuallar a leit emplegando una combinación de cuallo (u belatro sustituto) y acidificación. As bacterias s'encargan d'acetar a leit, chugando tamién un papel important en a definición d'a textura y a sabor d'a mayoría d'os quesos. Beluns tamién contenen floriduras, tanto en a superficie exterior como en l'interior.
Ta cuallar a leit se fa servir una enzima d'orichen animal (o recubrimiento d'o estomago de vacas, crabas, uellas, ecetra.) u vechetal (figuera, cardo). En bells casos s'emplega como fermento a leit meyo fermentata que contien o estomago d'un ternasco chóven sacrificato una mica dimpués de mamar.
Ta os antigos griegos "o queso yera un regalo d'os dioses". Bi ha centenars de variedatz de queso. Os suyos diferents estilos y sabors son o resultato de l'uso de diferents especies de bacterias y floriduras, diferents nivels de nata en a leit, variacions en os tiempos de curación, diferents tractamientos en o suyo proceso y diferents razas de vacas, crabas u o mamifero de que s'emplege a suya leit. Atros factors incluyen a dieta d'o bestiar y l'adición d'achents saborizants como hierbas, especias u l'afumato. Que a leit sía u no pasteurizata tamién puet afectar a la sabor.
En bells quesos se cualla a leit adhibindo-les acidos como lo vinagre u o suco de limón. Manimenos, a mayoría s'acetan en grau menor gracias a las bacterias que le s'adhiben, que transforman os zucres d'a leit en acido lactio, continando con l'adición de cuallo ta rematar o proceso de cuallato.
Veyer tamién[editar | modificar o codigo]
Vinclos externos[editar | modificar o codigo]
Se veigan as imáchens de Commons sobre o queso.- (es) mundoquesos.com
- Información d'a producción d'o queso
