Aegypius monachus

*Aegypius monachus*
Aegypius monachus
Denominacions populars
vueitre negro
Estau de conservación
Cuasi menazau (IUCN)
Clasificación cientifica
Dominio:	Eukaryota
Reino:	Animalia
Filo:	Chordata
Clase:	Aves
Orden:	Accipitriformes
Familia:	Accipitridae
Chenero:	Aegypius
Especie:	Aegypius monachus
Descripción
*Aegypius monachus* L., 1766
Distribución cheografica

O vueitre negro^[1]^[2] (nombre cientifico Aegypius monachus L., 1766) ye una au carnucera de l'orden Accipitriformes y a familia d'as accipitridas. Ye a sola especie en o suyo chenero y una d'as cuatre especies de vueitres que se puede trobar en Europa, en chunto con o trencauesos, l'alica blanca y o vueitre alionau.

Ye un vueitre de mida graniza, con envergaduras d'alas que gosa pasar de 250 centimetros, y se conoix a-escape por a color de plumas negra u marrón fusca por tot, y porque, a diferencia d'o suyo parient o vueitre alionau, o cuello no lo tiene pelau sino con plumas dica la toza, de forma que fa recordar a capucha d'un monche (d'an viene o suyo nombre latín: «monachus» ye «monche»).

Descripción

O vueitre negro ye una accipitrida a-saber-qué gran, mas gran que os atros vueitres, que s'identifica fácil por a coloración d'as plumas en cheneral marrons tendendo a fusco-musco. A capeza no la tiene pelada como atros, sino que a parte sin pluma se limita a la cara y un poquet por a gorga, an que a piel espullada la tiene negra. Os uellos son tamién mas fuscos que os d'atros vueitres, con un iris negro que aparenta que tot lo uello lo en sía. O pico y as zarpas son color cenisa.

Ye mas solitario que a suya parient, o vueitre alionau, y por un regular acude ta os carnuzos solo u con a parella, no pas en banda. Cuan i plega mas tarde que os vueitres alionaus, no ye raro que o vueitre negro aprofite que ye mas gran pa enrestir-les y meter a raya a os alionaus y asinas poder minchar.

Fan o niedo en alto d'un árbol y lo tornan a aprofitar un anyo a par de l'atro. Forma parellas estables, cosa ni mica estranya entre as rapaces. Os dos pais s'ocupan de fer a cobada y d'alimentar a un solo pollet que crían cada anyada.

Presencia en Aragón

En o mes de marzo de 2021 se confirmó a presencia de lo menos dos parellas d'istos animals en Aragón, que dimanaría de a Reserva de Caza de Boumort (provincia de Leida) y d'un eixemplar liberau en o Pirineu catalán en 2014. O 5 d'abril d'ixe anyo os Achents de Protección d'a Naturaleza d'o Gubierno d'Aragón confirmón a presencia d'un niedo ocupau por una d'as dos parellas en suelo aragonés.^[3] De plantar buen piet, se tornaría la primer vez en un ciento d'anyos que os vueitres negros se reproducen en Aragón, dende que desapareixión ya fa mas d'un sieglo, y Aragón estaría alavez a tercera Comunidat Autonoma espanyola an que as cuatre especies de vueitre s'han tornau a reproducir.^[3]

Anque a especie se considera en ran de «cuasi menazada» deguntes a Unión Internacional por a Conservación d'a Naturaleza (IUCN), en o Estau espanyol a suya clasificación ye «vulnerable».^[3]