Serba

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Carraz de serbas.

As serbas (tamién ditas en masculino, serbos) son os lulos caracteristicos d'os árbols y arbustos compresos en o chenero Sorbus, que perque las producen reciben o nombre popular de serberas.

Tecnicament, baixo criterios botanicos, as serbas son pomos carnosos producius per a maduración de l'ovario infero de cadaguna d'as flors que se disposan en una panicula u corimbo (inflorescencia) que caracteristicament fan ixas especies, que no sen puede pas considerar infructescencias per estar toz os lulos demanatos d'una flor individual.

Os fruitos de Sorbus son arronchadez, de color carateristicament roya, anque bi n'ha tamien de naranchas u amarelliscos. Cualques especies en o chenero los tienen comestibles, como la pixortera (Sorbus aucuparia) u la moixera u mostallonero (Sorbus aria), pero son especialment consumitas as que produz Sorbus domestica, la mes quiesta d'as especies europeas d'este chenero. O nombre d'a moixera en l'Alto Aragón oriental demana d'as suyas serbas, que particularment en a especie sen diz «moixes» (en bels puestos, deformato a moches > «monches»). En a zona occidental a serba de S. aria se i diz «mostallón», y l'árbol en consecuencia, mostallonero.

As serbas son tamién conoixitas en muitos lugars de tot Aragón con l'ambiguo y inespecifico nombre de «cerollas/acerollas», «zarolas» u «ceruellas» (as tres demanan d'o latín «cereŏla»), que comparten con os fruitos d'a cerollera domestica (Prunus domestica) y con altras especies en a mesma familia Rosaceae, especialment en o caso de Sorbus domestica, que per estar mes grandizas presentan cualque cosa de similitut con a dita fruita.

Se veiga tamién

• Cerolla.
• Sorbus.
• Ceresa.
• Sabuco.