Inflorescencia

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

Inflorescencias d'Allium sp.

A inflorescencia (pronunciau /infloɾeˈɵɛnɵja/, "inflorezenzia") ye una estructura compuesta d'es verticilos florals de bellas plantas, en as quals as flors son sobre brancas u en l'estrimo d'un tallo. De traza formal, a estructura d'una inflorescencia remata aon ye la primer fuella normal u nomofilo. I ha inflorescencias en as quals no se i troba si que una flor, como lo caso d'a magnolia u o tulipán (inflorescencias unifloras), u inflorescencias con más flors (plurifloras).

As inflorescencias se composan d'un pedicelo u pedunculo, un receptaculo aon son as flors individuals u un raquis sobre o qual i son clavadas, y pueden tener a más a más bractias, que son follas modificadas exclusivas d'estas estructuras.

Inflorescencias ubiertas u racemosas

Son as inflorescencias en as quals se da un creiximiento de nuevos botons florals entre que dura la florada. Pa fer-lo, os meristemas apicals d'os diferents eixes siguen activos y por ixo producen nuevas flors individuals, dando como resultau una florada centripeta, en a qual as flors más extrimas pueden ser secas pero as centrals serán as zagueras en ubrir-se.

Este tipo d'inflorescencias se troban baixo formas diversas: racemos ("carrazos"), espigas, umbelas y capítols.

Imáchens

• 

  Racemo u "carrazo".

• 

  Panicula.

• 

  Espiga.

• 

  Umbela.

• 

  Corimbo.

• 

  Capítol.

Inflorescencias zarradas u cimosas

Son aquellas en as quals os meristemas apicals se consumen en producir flors. Por debaixo d'o botón floral terminal, atros botons laterals producen nuevos eixes. En esta clase d'inflorescencias todas as flors son terminals.

Anque por a suya estructura pueden fer recordar a la inflorescencia racemosa, a seqüencia d'apertura de flors ye de tot diferent, comenzando por as flors centrals a la contra de como fan aquellas.

Imáchens

• 

  Cima simple.

• 

  Cima compuesta.

• 

  Cima helicoidal.

Inflorescencias especials

• Sicono: A inflorescencia caracteristica d'o chenero Ficus, en a qual o receptaculo ye modificau y embolica las flors individuals de tot. Quan se fecunda, se torna una infructescencia con a mesma estructura; o que se conoix popularment como figo.
• Ciato: A inflorescencia caracteristica d'o chenero Euphorbia, como as leteruelas y a flor de pascua.

Se veiga tamién

• Infructescencia.
• Fruito compuesto.

Enlaces externos

• Se veigan as imachens de Commons sobre inflorescencias.