Ferrocarril de la val de Zafán

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Lo ferrocarril de la val de Zafán estió un ferrocarril que teneba un recorrito entre La Puebla d'Íxar (Aragón) y Tortosa (Catalunya), pasando por Alcanyiz. Prene nombre d'una val con fondón plan que bi ha en los termins municipals de La Puebla d'Íxar y d'Exatiel y que desemboca en lo río Martín, a dita val de Zafán.

Historia

Lo ferrocarril de la val de Zafán feba part d'un prochecto mes ambicioso que nunca no fue completato. Los primers prochectos d'un ferrocarril entre lo puerto de Sant Carles de la Ràpita y la Puebla d'Íxar son de 1863. La ideya de fer este ferrocarril talment tenese una función militar: dicen^{(i fa falta una fuent)} que los militars creyeban en la posibilidat d'una invasión procedent dende Francia. En caso d'una invasión francesa, dimpués de la barrera natural de los Pireneus los franceses habrían de ser aturatos en atra barrera natural, la barrera de l'Ebro, y un ferrocarril construito en la marguin dreita podría fer-se servir para ninviar tropas y suministros a tot ixe frent.

Las obras tardoron en encomenzar, dica que, en 1891 la Compañía del Ferrocarril del Val de Zafán encomenzó las obras d'explanación. Lo primer trampo, de 32 km entre La Puebla d'Íxar y Alcanyiz, s'inauguró en 1895. Lo trazato de la linia ferria curiosament no pasaba amán de lo lugar mes gran, Íxar, on no yera de lo intrés de la dreita local.^{(i fa falta una fuent)} Lugars mes chicoz como La Puebla d'Íxar conoixioron gracias a lo ferrocarril un mayor desembolique industrial (con fabricas como por eixemplo La Azucarera), y l'arribata de nuevas ideyas y ideyolochías comuns en las ciudaz d'ixas envueltas como l'anarquismo. Ixa modernidat no arribó, manimenos en Sant Per de Calanda, que continó estando un lugar d'economía rural, encara que este lugar ninviaba los excedents de población a traviés d'esta vía.^{(i fa falta una fuent)}

En la batalla de l'Ebro la linia tenió un important papel lochistico. La prolongación de la linia dica Tortosa remató en 1942, con man d'obra esclava (prisioners de guerra republicans). Lo caciquismo influyó muito en lo trazato d'esta part de la linia, que evitaba pasar por los nuclios habitatos de lugars grans como Val de Robres, on los grans terratenients no veyeban con buenos uellos una linia ferria que dase atras oportunidaz laborals a los treballadors.^{(i fa falta una fuent)} La explotación fue adchudicata dende o principio a Renfe.

Nombres populars que ha tenito han estato el Sarmentero (lo Baixo Martín estió una zona de vinyers enantes d'una plaga de filoxera), y Lo Banyero.

Con 31 anyos de funcionamiento, no remató a fer-se o zaguer tramo, entre Tortosa y Sant Carles de la Ràpita, a penar d'haber-se construito tota la explanación. En 1971 una sulsita en un túnel entre las estacions de lo Pinell de Brai y Prat de Comte estió a excusa que fació servir l'administración pa suprimir esta linia ferria o 17 de setiembre de 1973. Se diz que empresas locals d'autobuses contribuyoron a presionar pa que se cerrase.^{(i fa falta una fuent)}

Estato actual

Lo trazato de lo ferrocarril ye aproveitato actualment como vía verde entre Lo Baixo Aragón y las Tierras de l'Ebro de Catalunya. Se divide en diferents tramos: uno por la cuenca de lo Guadalop (comarca oficial dita Baixo Aragón), atro por la comarca de lo Matarranya, 46 km por la Tierra Alta, continando por lo Baixo Ebro. Manimenos, ye prevista l'adaptación de lo historico puent de lo sieglo XIX de lo ferrocarril de Tortosa, y la prolongación de la vía dica lo Parque natural de lo delta de l'Ebro. D'esta traza quedarán comunicatos por la vía verde lo Parque natural de los Puertos de Beceit con la desembocadura de l'Ebro.

Lo recorrito (110 km):

Alcanyiz - Val d'Algorfa (túnel de 2.136 m) -Val Chunquera/Valljunquera - Val del Tormo/la Vall del Tormo - Estación d'Arnes y Ledón/Lledó - Horta de Sant Joan - Bot - Prat de Comte - La Fontcalda - Estación de Lo Pinell de Brai - Benifallet - Estación de Cherta - Aldover - Roquetes y Tortosa.

Curiosidaz

Lo grupo musical tortosín "Quico el Célio, el Noi i el Mut de Ferreries" dedicó una canción a esta linia ferria, como critica a las limitatas infraestructuras que bi ha en las Tierras de l'Ebro.
D'alcuerdo con o periodista y investigador d'o paranormal Sebastià-Daniel Arbonés Subirats lo ferrocarril de la val de Zafán estió un ferrocarril maldato.^{(i fa falta una fuent)}

Vinclos externos

(es) La construcción del ferrocarril de Val de Zafán a Sant Carles de la Ràpita entre 1880 y 1906; ponencia de Josep Antoni Moreno presentata en lo III Congreso de Historia Ferroviaria que se fació en Xixón en septiembre de 2003.
Canción dedicata a lo ferrocarril de la val de Zafán por Quico el Célio, el Noi i el Mut de Ferreries