Tronco (anatomía)

Debuixo d'o tronco de una persona de sexo masculín (Gray's Anatomy).

O tronco ye, en anatomía, una d'as partis fundamentals d'o cuerpo chunto a o tozuelo y os miembros. En a suya parti superior se troba o tozuelo, y d'os suyos costatos salen os miembros superiors u toracicos d'alto, y os miembros inferiors u pelvianos d'abaixo.

Tanto dende d'un punto de vista topografico como funcional o escleto d'o tronco s'organiza en columna vertebral, tórax y pelvis:

• Columna vertebral

Eixe fundamental d'o cuerpo, central y posterior.

• Tórax

Caixa osia elastica que contiene os pulmons y o corazón, y en a parti superior d'a quala se fixan os miembros superiors u toracicos a traviés d'a cintura escapular, primer segmento d'o miembro correspondient. Ye decir, a cintura escapular no perteneixe a o tórax.

O tórax lo forman:

1. Porción dorsal d'a columna vertebral, por dezaga.
2. O esternón, debant y d'alto, en o centro.
3. As costiellas, por dezaga, debant y en os costatos.

• Pelvis

Especie de receptaclo en a parti inferior d'o tronco conformato por:

1. Os coxals
2. O sacro
3. O cóccix

Os coxals d'a pelvis son a más a cintura pelviana que fixa os miembros inferiors a o tronco, mientres que sacro y cóccix son a fin d'a columna vertebral.

Entre a pelvis y o tórax se troba en o individuo vivo l'abdomen, de paretz esencialment musculars.

O tronco aloxa os organos de l'aparato cardiopulmonar (corazón, pulmons y grans vasos), y os organos responsables d'a dichestión (estomaco, bodiellos) y glandulas anexas (figado, pancreas). A más contiene l'aparato urinario (rinyons, vuixiga), y l'aparato reproductor femenín (utero, ovarios, trompas de Falopio).