Silbes

Silbes
Localidat d'Aragón
Silbes con os tellaus caitos.
Entidat  • País  • Provincia  • Comarca  • Municipio	Lugar Aragón  Uesca Sobrarbe Boltaña
Altaria	1.002 m.
Codigo postal	22340
Parroquial  • Diocesi  •Arciprestato	Balbastro-Monzón Sobrarbe

Ista fuella ye escrita en baixo sobrarbés.

Silbes (Silves en castellán) ye un lugar aragonés d'o municipio de Boltaña, en a provincia de Uesca y Comarca d'o Sobrarbe. A suya población ye de 8 habitants (2005).

Silbes y ra suya altura fa bien ta bier os paisaches d'a redolada. Una borda en a suya era.

O lugar de Silbes ye una d'as entidaz poblacionals más protechidas d'a valle de Boltanya, por d'encima d'o recolón d'o Balupor y d'a faixa d'as esplugas de Seso, en l'alto d'una d'as garras d'a Punta d'a Ferrera (1392 m) que como una balconera mira ras valles de l'Ara y Campodarbe (a valleta d'o barranco d'a Ferrera). Silbes s'ancuentra por alto d'a marguin sud de l'Ara, por d'encima de Seso, y s'ha de puyar por una pista que ye bien tortuosa, que ranca dende ro puent d'o sanatorio (l'antiguo combento d'os agustinos de Boltaña) y ye siñalizada nomás que como si marchase ta Seso, pero que en aber-se fecho os primeros 600 metros en plano tien una esviadera t'alto, por a izquierda d'o caminante, que emprencipa a serpentiar t'arriba por bellos 3 Km por medio d'a bosquera y que ye imposible de fer-la con coche, nomás que caminando.

L'acceso ta os veículos s'ha de mirar en la otro canto d'a serreta, en a valle de Campodarbe, en a par d'ande se desemboca ro barranco d'a Ferrera y que ne sale d'un lateral d'a carretera A-1604 (Boltaña - Samianigo) nomás a bellos 2 Km d'a capital de l'Ara. Ixa pista enfila o monte debant d'a bista d'os caseros d'Espierlo, y puya 5,7 Km (d'alcuerdo con o retulo que hay a baixo a piet d'a carretera) ta Silbes, y dispués bello par de kilometros más t'allá d'iste lugar continua ta l'Aligar. Ista pista ye de tierra y s'ha pasau buenos anyos espaldada d'escorrenteras y aguazos que la feban bien rancia de pasar, pero atualmente (noviembre de 2007) se-i son fiendo labors de millora, amplando-la, y quitando-ne as peñas que fesen estorbo en pasar, y asinas se puet decir que ye posible puyar encluso con automobiles de turismo.

Bellas casas de Silbes yeran bien antiguas, pero s'espaldón en quedar-se albandonau o lugar. Chapitels, escudos, cuairons y trapaciaduras que teneban as casas alavez las saqueyón.

Silbes heba teniu casas siñorials en tiempos recientes, y bellos d'os habitantes d'a redolada en tienen recuerdo, pero en quedar-se albandonau de todo en os anyos 70, muchas d'as casas s'espaldón y una parte grande d'o patrimonio que teneba (mueble y inmueble) el debión de robar, pos que en mirar restas d'os cuairons y bastidas bien labraus que prometeban os mayores de Boltaña no se n'ancuentra denguno.

D'ixes zagueros habitantes d'o lugar en diz una canción d'A Ronda de Boltaña, pos a traviés d'os uellos d'un nino que marcha de días t'a escuela de Boltaña en retrata la vida como se feba d'antiguos en os lugars d'a balle d'a capital sobrarbenca por contraposición con a villa, que yera ya en ixes anyos (decadas d'os 50 y 60) fuertamente enfluenciada por a colonia de treballadors (venitos d'atros puestos) d'a Iberduero que teneba. Tanto más a l'estilo d'a tierra baixa, que se-les ne rediban d'os costumbres y d'a fabla mesmo a os montañeses d'os lugars amparaus.

O camino de Silbes, de tardada y al tornar. Ta baixo en a fusca.

En a canción d'a Ronda s'esplica bien lo duro que yera o camino de puyar ta Silbes, que en parabras d'o nino que en salir d'a escuela el feba yera bien pavoroso, pos pasaba por dintro d'as bosqueras d'ixa obaga d'o monde t'arriba y ye bien berdat que s efa asinas.

De tardada y al tornar chunto a l'Ara he de pasar por o puen que m'endreza ta o lugar. O camín he de puyar, me prencipio a xorrontar, boi cantando y as bruxas s'en irán. La Ronda de Boltaña, Baixando t'a escuela Banderas de humo, 1998

Vinclos externos

• Se veigan as imáchens de Commons sobre Silbes.
• (an) Estadisticas de Silbes en o portal AragonEsAsi