Chudería
Se conoix con o nombre de chudería a una parte d'una ciudat o lugar a on nomás que i viviban habitants chodigos. Gosaban estar lugars zarratos en sí mesmos, que no teneban so que un u dos puestos ta relacionar-se con a ciudat de que en feban parte y que se gosaban zarrar dezaga d'una puerta mientres a nueit. Son bella traza d'equivalent en os territorios de l'antiga Corona d'Aragón a institucions que en o sieglo XIX se conoixeban como ghettos. Gosaban tener una sinoga ta poder fer-ie as suyas ceremenias relichiosas, msmo que un cementerio fuera d'o nuclio urbán a on i apedacaban a os suyos difuntos.
Os chodigos que i viviban gosaban pagar os suyos impuestos dreitament a la Corona y no pas a os concellos de que en feban parte, encara que a ormino a Corona n'arrendaba la percepción d'as rentas d'as chuderías.
En o reino d'Aragón bellas chuderías estioron prou importants, en podendo destacar as siguients:
- Chudería d'Alagón (Alagón).
- Chudería d'Albarrazín (Albarrazín).
- Chudería d'Ariza (Ariza).
- Chudería de Balbastro (Balbastro, Semontano de Balbastro).
- Chudería de Biel (Biel, Cinco Villas).
- Chudería de Calatayú (Calatayú).
- Chudería de Chaca (Chaca, Chacetania).
- Chudería de Daroca (Daroca).
- Chudería d'Exeya d'os Caballers (Exeya d'os Caballers, Cinco Villas).
- Chudería de Fraga (Fraga).
- Chudería de Luesia (Luesia, Cinco Villas).
- Chudería de Luna (Luna, Cinco Villas).
- Chudería de Monclús (Monclús, Sobrarbe).
- Chudería de Mont Albán (Mont Albán, Cuencas Meneras).
- Chudería de Monzón (Monzón).
- Chudería de Ruesca (Ruesca).
- Chudería de Sadaba (Sadaba, Cinco Villas).
- Chudería de Sarinyena (Sarinyena).
- Chudería de Taust (Taust).
- Chudería de Tarazona (Tarazona).
- Chudería de Teruel (Teruel).
- Chudería de Uesca (Uesca).
- Chudería d'Uncastiello (Uncastiello).
- Chudería de Zaragoza (Zaragoza).
